Nanchi Mukyangye Kunemba Kikachi Kyenu kya Mashi Nyi?

Mwafwainwa kunemba kikachi kya DPA (kikachi kya mizhilo ya kwimwimenako ku kipatela) kyanengezhewelwa Bakamonyi babatizwa. Byo kiji kuba’mba “kechi mwayuka bikamweka kesha ne,” kyanema bingi kulanguluka ne kunembela jimo muchi ye mukeba ne mashinda o mwakonsha kuswa kwimubukilamo umvwe mwaponenwa na misongo ya kupulumukatu. (Yako. 4:14; Byubilo 15:28, 29) Pa kuba’mba kimukwasheko kuba bino, kuji vidyo yanengezhiwa ya Transfusion-Alternative Health Care—Meeting Patient Needs and Rights. Tambai ino vidyo kabiji ne kulombapo pa kupituluka mu byo mwafunda na bukwasho bwa ano mepuzho aji panshi po.—Yukai’mba: Na mambo a kuba ino vidyo iji ne na bipikichala bimo bya kutumbula bantu, bansemi bakonsha kumona kana bakonsha kwiitambila pamo na baana babo nyi, nangwa ne.

(1) Mambo ka bamingilo ba mu bipatela ne badokotala bamo o babena kupesela peselapo jikwabo pa mambo a kwingijisha mashi? (2) Tongolaipo mashinda asatu akatazha a kutumbwilamo bantu aubiwapo kala kwa kubula kwingijisha mashi. (3) Badokotala banga kuzhokoloka mwaya ntanda yonse bakeba kubuka balwazhi kwa kubula kwingijisha mashi? Kabiji mambo ka o bakebela kuba bino? (4) Bintu ka bya bukumo badokotala byo batana pa mambo a kwingijisha mashi? (5) Ñanyi bizumba bijimo mu kubikiwa mashi? (6) Bintu ka badokotala bavula byo bafika pa kuyuka pa mambo a mfweto iji mu kwingijisha michi yabulamo mashi? (7) Ki ka kilengela kukepelwa mashi mu mubiji? Muntu wikala byepi umvwe wakepelwa mashi mu mubiji? Muntu wakepelwa mashi mu mubiji wafwainwa kukwashiwa byepi? (8) Nga maselo achila (red-cells) akonsha kulengwa byepi bukiji bukiji mu mubiji wa mulwazhi? (9) Mashinda ka abena kwingijishiwa a kukepeshako kufuma kwa mashi kimye kya kutumbula muntu? (10) Abya michi yabulamo mashi yakonsha kubuka baana babacheche nangwa bakulumpe baji mu misongo ikatampe nyi? (11) Ñanyi jishinda jimo jawama kulondela ja kubukilwamo bulongo? (12) Mambo ka o kyanemena bena Kilishitu kusajila jimo jishinda ne michi yabulamo mashi? Twakonsha kuba byepi kino?

Kuswa mashinda amo ne michi imo yabulamo mashi yamweshiwa mu ino vidyo, kiji ku muntu mwine kwesakana na jiwi janji ja mu muchima jafunjishiwa na Baibolo. Nanchi mwasalapo michi ne mashinda a kubukilwamo kwa kubula kwingijisha mashi o mukeba anweba bene ne baana benu nyi? Umvwe mubena kukeba kuyukilako byavula pa mambo a bino bintu, monai Kyamba kya Usopa kya Kibemba kya June 15, 2004, ne kya October 15, 2000 pa mutwe wa kuba’mba “Mepuzho Kufuma ku Batanga” kabiji ne kya mukachi kya mu Mwingilo wetu wa Bufumu wa November 2006 kiji na mutwe wa kuba’mba, “Nakonsha Kufuukulapo Byepi pa Mambo a Tubibese twa Mashi ne Mashinda a Kubukilwamo Avwangamo Kwingijisha Mashi Ami?” Mwafwainwa kubula ba mu kisemi kyenu babula Bakamonyi byo mwafuukula ne ene mambo o mwafuukwila byobyo.