Nanchi Mukyangye Kunemba Kikachi Kyenu kya Mashi Nyi?
Mwafwainwa kunemba kikachi kya DPA (kikachi kya mizhilo ya kwimwimenako ku kipatela) kyo banengezhezha Bakamonyi babatizwa. Byo kiji kuba’mba “kechi mwayuka bikamweka kesha ne,” kyanema bingi kulangulukapo ne kunembela jimo muchi ye mukeba ne mashinda o mwakonsha kuswa kwimubukilamo umvwe mwaponenwa na misongo ipulumukatu. (Yako. 4:14; Byubilo 15:28, 29) Pa kuba’mba kimupeleleko kuba bino, banengezha vidyo ya Transfusion-Alternative Health Care—Meeting Patient Needs and Rights. Tambai ino vidyo kabiji ne kulombapo pa kupituluka mu byo mwafunda kwingijisha mepuzho aji panshi po.—Yukai’mba: Na mambo a kuba ino vidyo iji ne na bipikichala bimo bya kutumbula bantu, bansemi bafwainwa kumona kana bakonsha kwiitambila pamo na baana babo nyi, nangwa ne.
(1) Mambo ka bamingilo ba mu bipatela ne badokotala bamo o babena kupesela peselapo jikwabo pa mambo a kwingijisha mashi? (2) Tongolaipo mashinda asatu akatazha a kutumbwilamo bantu aubiwapo kala kwa kubula kwingijisha mashi. (3) Badokotala banga kuzhokoloka mwaya ntanda yonse bakeba kubuka balwazhi kwa kubula kwingijisha mashi? Kabiji mambo ka o bakebela kuba bino? (4) Bintu ka bya katataka badokotala byo batana pa mambo a kwingijisha mashi? (5) Ñanyi bizumba biji mu kubikwa mashi? (6) Bintu ka badokotala bavula byo bayuka pa mambo a mfweto iji mu kwingijisha michi yabulamo mashi? (7) Ki ka kilengela mashi kukepa mu mubiji? Muntu wikala byepi umvwe mashi akepa mu mubiji? Muntu wakepa mashi mu mubiji bakonsha kumukwasha byepi? (8) Nga maselo achila (red-cells) akonsha kulengwa byepi bukiji bukiji mu mubiji wa mulwazhi? (9) Mashinda ka o babena kwingijisha a kukepeshako kufuma kwa mashi kimye kya kutumbula muntu? (10) Abya michi yabulamo mashi yakonsha kubuka baana babacheche nangwa bakulumpe baji mu misongo ikatampe nyi? (11) Ñanyi jishinda jimo jawama kulondela ja kubukilwamo bulongo? (12) Mambo ka o kyanemena bena Kilishitu kusajila jimo jishinda ne michi yabulamo mashi? Twakonsha kuba byepi kino?
Kuswa mashinda amo a kubukilwamo akubula kwingijisha mashi aji mu ino vidyo, kiji ku muntu mwine kwesakana na jiwi janji ja mu muchima jafundwa na Baibolo. Nanchi mwasala michi ne mashinda a kubukilwamo kwa kubula kwingijisha mashi o mukeba anweba bene ne baana benu ne kwianemba pa kikachi kyenu kya mashi nyi? Umvwe mubena kukeba kuyukilako byavula pa mambo a bino bintu, monai buku wa “Butemwe bwa Lesa” kitango 7 ne byambo bikwabo byatongolwa mu kino kitango. Kabiji ne kya mukachi kya mu Mwingilo wetu wa Bufumu wa November 2006 kiji na mutwe wa kuba’mba, “Nakonsha Kufuukulapo Byepi pa Mambo a Tubibese twa Mashi ne Mashinda a Kubukilwamo Avwangamo Kwingijisha Mashi Ami?” Monai ku ba’mba mwanemba bulongo byo mwasalapo pa kikachi kyenu kya mashi. Mwafwainwa kubula bomwasala bakwimwimenako ne ba mu kisemi kyenu babula Bakamonyi byo mwafuukulapo.
[Kitenguluzha pa peja 3]
• Nanchi mwasalapo michi ne mashinda a kubukilwamo a kubula kwingijisha mashi o mukeba anweba bene ne baana benu nyi?
• Nanchi musenda kikachi kyenu kya mashi na mambo a bikola bipulumukatu nyi?