Nanchi Mwayuka Mashinda o Mukeba Kwimubukilamo Nyi?
Muno mu Zambia muji bipatela byavula bingi bibena kutumbula bantu kwakubula kwibabika mashi. Nanchi mwayuka mashinda apusana pusana o babena kwingijisha kwakubula kubika muntu mashi nyi? Mwafwainwa kwiayuka pa kuba’mba mukakonshe kusala bulongo muchi ye mukeba kwimupa kabiji ne jishinda ja kwimutumbwilamo kwakubula kwimubika mashi. Tambai vidyo wa No Blood—Medicine Meets the Challenge. Panyuma ya kwiitamba, lombaipo ne kumona byo mwafundamo kupichila mu kukumbula ano mepuzho alondelapo.—Yukai kuba’mba: Na mambo a kuba mu uno vidyo muji bipikichala bipi bya bantu bo babena kutumbula, bansemi bafwainwa kumona umvwe baana babo bafwainwa kumutamba nangwa ne.
(1) Ñanyi ene mambo Bakamonyi ba kwa Yehoba o bakaina kwibabika mashi? (2) Pa mambo a muchi, Bakamonyi ba kwa Yehoba bakebako muchi wa byepi? (3) Ñanyi lūsa bantu bakolwa lo baji nalo? (4) Mambo ka o kyanemena kukebako muchi mwabula mashi? (5) Umvwe mashi avula afuma mu mubiji, ñanyi mashinda abiji badokotala o bengijisha bukiji bukiji? (6) Ñanyi mashinda ana o bengijisha kutumbwilamo muntu kwakubula kumubika mashi? (7) Badokotala bakonsha byepi (a) kukepeshako mashi kufuma, (b) kuzhikijila maselo achila, (c) kuvuzha mashi mu mubiji, (d) kubwezhamo mashi aonaika mu mubiji? (8) Lumbululai biji jishinda ja (a) kwingijisha munkinyi wa kusungilamo mashi amo (hemodilution) (b) ja munkinyi uwamisha mashi afuma pa kilonda (cell salvage.) (9) Bi ka byo mwafwainwa kukeba kuyuka pa mambo a muchi mwabula mashi? (10) Nanchi muntu bakonsha kumutumbula umvwe uji na kikola kikatampe kwakubula kumubika mashi nyi? (11) Nga badokotala ano moba babena kuswa kuba ka?
Kuswa michi imo iji mu uno vidyo kwaimena pa muntu mwine kwesakana na jiwi janji ja mu muchima jafunjishiwa na Baibolo. Nanchi mwasalapo muchi ne mashinda a kwimutumbwilamo kwakubula kwimubika mashi anweba ne baana benu, ne kunemba kikachi kya DPA kya mikambizho ya kwimwimenako ku kipatela nyi? Umvwe mubena kukeba kuyukilapo byavula pa mambo a bino bintu, pitulukai bulongo mu kibaba kya “Mepuzho Kufuma ku Batanga” kiji mu Kyamba kya Usopa kya Kibemba kya June 15, 2004, ne October 15, 2000. Ingijishai mutanchi uji mu kya mukachi kya Mwingilo Wetu wa Bufumu wa November 2006 kya kuba’mba “Nakonsha Kufuukulapo Byepi pa Mambo a Tubibese twa Mashi ne Mashinda a Kubukilwamo Avwangamo Kwingijisha Mashi Ami?,” pa kuba’mba musale mashinda o mukeba nangwa o mubula kukeba. Kyapelako, monai kuba’mba mwanemba bulongo pa kikachi kyenu kya DPA muchi ne mashinda a kwimutumbwilamo o mukeba. Mwafwainwa kubula muntu ye mwatongola kwimwimenako kabiji ne ba mu kisemi kyenu babula Bakamonyi muchi ne mashinda o mukeba ne ene mambo o mwibisajila.