Jishinda Jawama ja Kubukilwamo jo Jepi?

Mukulumpe wa madokotala umo, aye Dr. Michael Rose waambile’mba: “Mulwazhi yense ubukwa kwa kubula kwingijisha mashi, ko kuba’mba ubena kubukiwa mu jishinda jawama bingi.” Mashinda ka avwangiwamo mu kwingijisha “muchi wabulamo mashi”? Mwafwainwa kuyuka bino bintu pa kuba’mba mukakonshe kufuukula bulongo jishinda jo mukeba kubukilwamo ne kusayiwa. Tambai vidyo ya No Blood—Medicine Meets the Challenge. Panyuma ya kwiitamba, monai umvwe mwakonsha kukumbula ano mepuzho alondelapo.—Yukai kuba’mba: Na mambo a kuba mu ino vidyo muji bipikichala bipi bya bantu bo babena kusaya, bansemi bafwainwa kumona umvwe kya kuba baana babo bafwainwa kwiitamba nangwa ne.

(1) Ñanyi ene mambo Bakamonyi ba kwa Yehoba o bakaina kubikwa mashi? (2) Pa mambo a kubukiwa, jishinda ka Bakamonyi ba kwa Yehoba jo bakeba kubukilwamo? (3) Ñanyi lūsa balwazhi lo baji nalo? (4) Mambo ka o kyaikela kyafwainwa kabiji kya maana kusala jishinda ja kubukilwamo kwa kubula kwingijisha mashi? (5) Umvwe mashi avula afuma mu mubiji, ñanyi mashinda abiji a bukiji bukiji badokotala o bengijisha? (6) Ñanyi mashinda ana a kubukilwamo kwa kubula kwingijisha mashi? (7) Badokotala bakonsha byepi (a) kukepeshako mashi kufuma, (b) kuzhikijila maselo achila, (c) kulengela mashi kuvula mu mubiji, kabiji (d) kubwezhamo mashi aonaika mu mubiji? (8) Lumbululai jishinda ja kubukilwamo ja kwingijisha (a) munkinyi wa kusungilamo mashi amo (hemodilution) kabiji ne (b) munkinyi uwamisha mashi afuma pa kilonda (cell salvage.) (9) Bi ka byo mwafwainwa kukeba kwimubula pa mambo a mashinda a kubukilwamo kwa kubula kwingijisha mashi. (10) Nanchi kusayiwa kukatampe kabiji kwakatazha kwakonsha kubiwa kwa kubula kwingijisha mashi nyi? (11) Bintu ka byawama bibena kufuma mu mwingilo wa badokotala?

Kuswa mashinda amo a kubukilwamo amweshiwa mu vidyo kwaimena pa muntu mwine kwesakana na jiwi janji ja mu muchima jafunjishiwa na Baibolo. Nanchi mwafuukulapo jishinda ja kubukilwamo kwa kubula kwingijisha mashi jo mukeba anweba bene ne baana benu nyi? Ba mu kisemi kyenu babula Bakamonyi bafwainwa kwibabula byo mwafuukula ne ene mambo o mwafuukwila byobyo.—Monai Mwingilo Wetu wa Bufumu wa December 2002 ne wa December 2003, mapeja 3-4.