Ikalai Bajimuka Kimye kyo Muji mu Mwingilo
1. Mambo ka o twafwainwa kwikela bajimuka kimye kyo tuji mu mwingilo?
1 “Nobe mikooko mukachi ka misuka” bakalume ba Lesa babena kusapwila “mukachi ka kisemi kyatama ne kyaluwankana.” (Mat. 10:16; Fili. 2:15) Masawakya a malwañano, kwitumanyika ku mabumba a bantu ne kwituyanjisha kimye kyonse ku bantu bakanama, kino kimwesha kuba’mba bantu babi “bakataminangakotu.” (2 Timo. 3:13) Ñanyi binembelo byakonsha kwitukwasha ‘kwikala bajimuka’ mu mwingilo?—Mat. 10:16.
2. Bintu ka byakonsha kwitulengela kufuma mu nyaunda imo ne kuya na kwingijila mu nyaunda ikwabo?
2 Ikalai Bajimuka: Byambo bya Mana 22:3 bitukwasha kuyuka bya ‘kufyama’ ku bintu bileta malwa. Labainga ne kukenkenta! Bintu bijitu bulongo mu nyaunda yenu byakonsha kupimpulwa kyakubazhimukilatu. Kampepo mwamona bakapokola babena kwingila bingi nangwa bantu bavula mu mukwakwa. Kimye kimo bamo bena mazubo bakonsha kukana kwibasapwila. Mu kifulo kya kukankazhama, kyawama kufumapo bukiji ne kuya kukwabo.—Mana 17:14; Yoa. 8:59; 1 Tesa. 4:11.
3. Jifunde jiji mu Musapwishi 4:9, twakonsha kwijilondela byepi mu mwingilo?
3 Ingijilainga Pamo: “Meso abiji maya,” byo byaamba Musapwishi 4:9. Kimye kimo mwapijilwa kwingila bunke bwenu mu mwingilo, nanchi kijitu bulongo kwingila bunke nyi? Mu mapunzha amo kijitu bulongo. Mu mapunzha akwabo kechi kiji bulongo nyenga nangwa wakyanyike kwingila bunke bwanji mu busapwishi bwa ku nzubo ku nzubo ne, kikatakata panyuma ya kuzhika juba. Kyatanyiwa kuba’mba kyanema kwingila babiji. (Sapwi. 4:10, 12) Kimye kyo mubena kwingila mu bujimi mwakonsha kuta maana ne kubena kwingijila bakwenu. Inge mubena kwingijila pamo na bakwenu mu nyaunda imo, kyakonsha kuwama kwibalaya inge ke muye.
4. Atweba bonse mu kipwilo, twakonsha kwikala byepi bazhikijilwa byo twingila mu mwingilo?
4 Byo ‘babena kwitukenkentela myeo yetu,’ bakulumpe mu kipwilo baji na mwingilo wa kwitutangijila kwesakana na bibena kukebewa pa kipwilo. (Hebe. 13:17) Yehoba witulaya kwitupesha inge ketwikele mwafwainwa bena Kilishitu ne kukwatankena pamo na bakulumpe. (Mika 6:8; 1 Ko. 10:12) Twayai atweba bonse bakalume ba Lesa twibikengako kusapwila bulongo mu nyaunda yetu, pano bino twafwainwa kwikala bajimuka.