Kechi Mwafwainwa Kwilengulula Amba Kuba Mwaingila Ne
1. Ki ka kilengela bamo kukankalwa kutendeka mafunjisho a Baibolo?
1 Nanchi mwilengulula kutendeka mafunjisho a Baibolo na mambo akuba amba mwakonsha kukankalwa nyi? Bakalume bamo bakala nabiji Mosesa ne Yelemiya, nabo beumvwine kubula kufikilamo kwingila mwingilo ye bebapele. (Lupu. 3:10, 11; 4:10; Yele. 1:4-6) Onkao mambo, ne bantu bavula nabo byobyo beumvwa. Bakonsha kupwisha byepi luno lukatazho?
2. Mambo ka o twakonsha kubujila kwingilangatu busapwishi bwa ku nzubo ku nzubo ne kulekela bakwetu kuba’mba bafunjishenga mafunjisho a Baibolo?
2 Twafwainwa kuvulukanga kuba’mba Yehoba kechi witupa mwingilo wakila bulume bwetu ne. (Sala. 103:14) Mwingilo wetu wa kulenga “baana ba bwanga” ne “kufunjisha bantu” twakonsha ku mwingila. (Mat. 28:19, 20) Yehoba kechi wapanatu uno mwingilo ku bantu baji na bya bupe bya kufunjisha ne. (1 Ko. 1:26, 27) Onkao mambo, kechi twafwainwa kwingilangatu busapwishi bwa ku nzubo ku nzubo, ne kulekela bakwetu kuba’mba bafunjishenga mafunjisho a Baibolo ne.
3. Yehoba witukwasha byepi kuyuka mwingilo wa kufunjisha bantu Baibolo?
3 Yehoba ye Witufunjisha: Mwingilo wa kulenga baana ba bwanga wafuma kwi Yehoba. (2 Ko. 3:5) Kupichila mu jibumba janji, Yehoba witufunjisha bukine buji mu Baibolo bwabula kuyukapotu ne bantu bafunda bamu ino ntanda. (1 Ko. 2:7, 8) Wanemba mashinda afunjishishangamo Yesu mu Baibolo, pa kuba’mba twiengijishenga. Kabiji ubena kwitufunjisha kupichila mu kipwilo. Kunungapo, Yehoba witupa bya kwingijisha pa kufunjisha bantu Baibolo. Witupa bingijisho, nabiji buku wa Baibolo ufunjisha walumbulula bukine bwa mu Baibolo mu jishinda japela kumvwa. Kufunjisha mafunjisho a Baibolo kechi kwakonsha kukatazha ne.
4. Mambo ka, o twafwainwa kuketekela kuba’mba Yehoba uketukwasha?
4 Mosesa ne Yelemiya bakonsheshe kwingila mwingilo ye bebapele na bukwasho bwa Yehoba. (Lupu. 4:11, 12; Yele. 1:7, 8) Ne atweba twafwainwa kulomba Yehoba kwitukwasha. Ne ene mambo, ke akuba’mba kimye kyo tufunjisha bantu Baibolo, twibafunjisha bukine bwa Yehoba, kintu kisangajika Lesa. (1 Yoa. 3:22) Onkao mambo, ibikilai kikonkwanyi kya kwingilako mwingilo wa kufunjisha bantu Baibolo awo waikala mwingilo wawama.