Bañanyi Bakatemwa Kino Kibaaba?
1. Ñanyi bintu byo twafwainwa kulangulukangapo kimye kyo tubena kutanga Kyamba kya Usopa ne Labainga! kabiji mambo ka?
1 Kyamba kya Usopa ne Labainga! banembela bantu bonse. Onkao mambo bibaba bikalamo byamba pa mitwe yapusana pusana. Kimye kyo tubena kutanga kibaba kiji kyonse kijimo twafwainwa kulangulukanga pa bantu bo kyakonsha kufika pa muchima ne kumonapo jishinda jo twakonsha kwingijisha pa kwibashila.
2. Ñanyi bibaba bitanwa mu Kyamba kya Usopa ne Labainga byakonsha kufika bantu pa muchima?
2 Nanchi mu Kyamba kya Usopa kya katataka mujipo jishimikila ja mu Baibolo jo mwisambilengapo na muntu ye mwingila nanji nyi? Nanchi mujipo kibaba kibena kwamba pa kisemi, kyo mwakonsha kwingijisha pa kukwasha mulongo wenu nyi? Nanchi mwayukapo muntu ubena kukeba kuya ku kyalo kyo bamwesha mu Labainga nyi? Abya nanchi bibaba biji mu Kyamba kya Usopa nangwa Labainga byakonsha kuzakula bantu boba bya busulu nangwa bengila mu kafulumende bekala mu nyaunda yenu nyi? Kyakumwenako, Kyamba kya Usopa nangwa Labainga muji bibaba byamba pa makatazho apitamo bakikulumpe, byakonsha kwingila bulongo ku mazubo ko balamina bakote. Bantu batala pa bije bya mizhilo bakonsha kutemwa bibaba byaamba pa bumbanzhi.
3. Ambaipo byamwekele bimwesha ene mambo o kyawamina kupa bantu Kyamba kya Usopa nangwa Labainga wakonsha kwibafika pa muchima.
3 Byamwekele: Bamulume ne mukazhi bekala mu South Africa panyuma ya kutambula Labainga wa October 2011 wajinga na mutwe wa kuba’mba “Bya Kukomesha Baana (Ifya Kukusha Bwino Abana),” batumine foni ku masukulu 25 aji mu nyaunda yabo. Bakulumpe pa masukulu 22 batambwile Labainga ne kupa baana basukulu. Bamulume ne mukazhi bakwabo monka mu South Africa nabo bashile Labainga ku masukulu akwabo aji mu nyaunda yabo. Bafunjishi bapa sukulu umo baingijishanga ne Labainga kimye kya kufunjisha. Bano bamulume ne mukazhi babujile kalama wa mwanzo byo baingijishe Labainga. Kabiji kalama wa mwanzo watundaikile bipwilo biji mu mwanzo wanji kusapwilanga pa masukulu. Ofweshi wa musampi watambwijile sawakya wakuba’mba wafwainwa kunemba akwabo.
4. Mambo ka o twafwainwa kupa bantu bavula Kyamba kya Usopa ne Labainga?
4 Kyamba kya Usopa ne Labainga byamba ene mambo bintu bimo kyo bibena kumwekela ne byo twakonsha kufunjilako. Byamba pa Baibolo ne pa Bufumu bwa Lesa, kabiji ‘bisapwila lupulukilo.’ (Isa. 52:7) Onkao mambo, twafwainwa kupa bantu bavula. Jishinda jawama kuba bino ke kwiipuzha anweba bene amba, ‘Bañanyi Bakatemwa Kino Kibaaba?’