Mwafwainwa Kwisamba Kishinka Kimo ne Kusha Kyamba kya Usopa ne Labainga

Mu Kyamba kya Usopa ne mu Labainga muji bibaba byapusana pusana. Mu kifulo kya kwisamba mitwe yonse na mwina nzubo, kyawama kwambatu pa mutwe umo. Umvwe twatako muchima kumona bintu byo biji pa nzubo po twafika kabiji twayuka ne bibaba biji mu Kyamba kya Usopa ne mu Labainga, tukayuka kibaba kyo twakonsha kwisamba na mwina nzubo. Umvwe twamona tubintu tuji pa lubanza twatemwa kukaisha banyike, twakonsha kwisamba pa kibaba kyaamba pa kisemi. Umvwe twatana wamulume, twakonsha kwisamba nanji pa mutwe watemwa kwamba babalume, nabiji kafulumende wawama. Nangwa kya kuba twisambatu pa kishinka kimo, bino umvwe wamwesha lusekelo twakonsha kumushila Kyamba kya Usopa ne Labainga.