Funjilai ku Bangauzhi —Yoela
1. Twakonsha kumwesha byepi kwikepesha byonka byaubile Yoela?
1 Yoela wajinga ñanyi? Yoela wajinga “mwana Petwele.” (Yoe. 1:1) Uno ngauzhi wasapwijile mambo a Yehoba, kabiji kechi winemekele ne. Ne atweba byo byo twafwainwa kubanga, kimye kyo tuji mu mwingilo twafwainwa kwingijishanga Baibolo pa kuba’mba tupane munema kwi Yehoba. (1 Ko. 9:16; 2 Ko. 3:5) Kabiji ano mambo otusapwila etulengela kwikala na lwitabilo lwakosa. Ñanyi byambo byaawile Yoela byakonsha kwitulengela kutwajijila kwingila mwingilo wa kusapwila?
2. Kuyuka’mba juba ja Yehoba jafwenya pepi kwitulengela kuba ka?
2 “Juba ja Yehoba Jafwenya Kala ke Pepi.” (Yoe. 1: 15): Bino byambo nangwa kya kuba papita myaka yavula po bebyambijile, bibena kufikizhiwa. Bintu byatama byuba bantu pano pa ntanda nabiji; misalululo ne kwitwendeleka kimye kyo tubena kusapwila bimwesha’mba tubena kwikala mu moba apelako. (2 Timo. 3:1-5; 2 Pe. 3:3, 4) Kuyuka kuba’mba juba ja Yehoba jafwenya kala pepi, kwitulengela kubula kulabikwa ne kutatu muchima pa mwingilo wa kusapwila.—2 Pe. 3:11, 12.
3. Mambo ka o kyanemena kwingila mwingilo wa kusapwila, byo tubena kunangijila ku malwa akatampe?
3 “Yehova mo Mwakufyama Bantu Banji.” (Yoe. 3: 16): Kino kyepelo kibena kulumbulula Yehoba byo akazhikijila bantu banji kimye kya ku malwa akatampe. Tumvwa bingi bulongo kuyuka’mba Yehoba ukazhikijila bantu banji bakishinka. (Lum. 7:9, 14) Umvwe saka twingila mwingilo wa kusapwila, Yehoba uketukwasha, kabiji tukekala na lwitabilo lwakosa ne kuchinchika ku malwa akatampe abena kwiya.
4. Mambo ka o twafwainwa kubujila kwakamwa byo tubena kunangijila ku malwa akatampe?
4 Byambo byaawile Yoela bamo bibalengela bingi moyo, pano bino bantu ba Lesa baketekela’mba Yehoba ukebapokolola. (Yoe. 2:32) Onkao mambo, byo tubena kunangijila ku malwa akatampe, twayai tutwajijile kusapwila mambo awama a bufumu bwa Lesa kwa kubula moyo, kwesekana na kinembelo kya Yoela 2:23 kyaamba’mba “sekelai, musangalele mwi Yehoba Lesa wenu.”