Mashinda a Kwisambilamo

Kutendeka Mafunjisho a Baibolo pa Kibelushi Kitanshi mu June

“Tubena kufwakesha balunda netu na kwisamba nabo buno bwipuzho bwanema. [Bamweshai bwipuzho butanshi buji pa jipa japelako ja Kyamba kya Usopa kya June 1.] Mwalangulukapo amba ka pa buno bwipuzho?” Lekai bakumbule. Isambai nabo byambo biji panshi ya bwipuzho butanshi ne kutanga nabo kinembelo kimo pa binembelo byo bamwesha. Panyuma ya kuba bino, bapai magazini, ne kumvwañana nabo byo mwakonsha kubwelako pa kuba’mba mukesambe bwipuzho bwalondelapo.

Kyamba kya Usopa June 1

“Pa mwaka pa mwaka, bantu bafika ku 6,000,000 bafwa na mambo a kupepa fwanka. Abya, kujipo bimo byo mulangulukapo amba byakonsha kukwasha kukepeshako luno lukatazho nyi? [Lekai bakumbule.] Bantu bavula basankilapo nangwa kuchinuzhuka fwanka panyuma ya kufunda Lesa byo amona kyubilo kya kupepa fwanka. Kya kumwenako, kino kinembelo kya mu Baibolo kilengela bamo kulangulukilako bakwabo babula kupepa fwanka. [Tangai 1 Kolinda 10:24.] Uno magazini walumbulula muntu byo akonsha kuleka kupepa fwanka inge ke alanguluke pa mmweno ya Lesa pa fwanka.”

Labainga! May–June

“Tubena kufwakasha na kwisamba pa lukatazho lumo lubena kupitamo bantu bavula bingi. Bantu bamo balanguluka pa kwiipaya na mambo a kupopomenwa bingi na makatazho mu bwikalo. Inge muntu wafika pa kipimo kya kukeba kwiipaya, abya nanchi mwalanguluka’mba kine ukeba kufwa nyi, inyi ukebatu kupwisha buyanji bo abena kupitamo? [Lekai bakumbule.] Monai mulaye wa mu Baibolo wakwasha bantu bavula kubula kulanguluka pa kwiipaya. [Tangai Lumwekesho 21:3, 4.] Uno magazini waambapo bishinka bisatu byakonsha kukwasha muntu kutwajijila na bumi nangwa kya kuba ubena kupita mu makatazho.”