Nanchi Yehoba Ummona Byepi?
1. Mambo ka Baibolo o aikela nobe kimbonyi?
1 Bimye binga byo mutala mu kimbonyi? Atweba bavula twingijisha kimbonyi kimye kyonse kabiji kitukwasha kuyuka po twafwainwa kuwamishako. Baibolo bamupashañanya ku kimbonyi. Kutanga Baibolo kwitukwasha kuyuka byo tuji mukachi ka muchima, kwesakana na bitumona Yehoba. (1 Sam. 16:7; Yako. 1:22-24) Mambo a Lesa “akebakeba ne kupima milanguluko ya mu michima ne mo yayila.” (Hebe. 4:12) Kutanga Baibolo moba onse ne kulanguluka langulukapo kwakonsha kwitukwasha byepi kumona mo twafwainwa kuwamishako pa kuba’mba twikale basapwishi bafikilamo?—Sala. 1:1-3.
2. Baibolo wakonsha kwitukwasha byepi kwipesapesa?
2 Ingijishainga Baibolo Nobe Kimbonyi: Mashimikila a mu Baibolo aamba pa bakalume ba Yehoba bakishinka etufunjisha byubilo Lesa byo atemwa. Kya kumwenako, Davida walwilangako jizhina ja Lesa. (1 Sam. 17:45, 46) Isaya wipaine kusapwila mu nyaunda yakatezhe bingi. (Isa. 6:8, 9) Na mambo a kutemwa Bashanji ba mwiulu, Yesu kechi wamonanga mwingilo wa kusapwila nobe kisendwa kyanema ne, bino wamumonanga nobe kajo. (Yoa. 4:34) Bena Kilishitu ba mu myaka kitota kitanshi basapwilanga bingi na mukoyo. Baketekejile mwi Yehoba kabiji kechi bakebanga kuleka kusapwila ne. (Byu. 5:41, 42; 2 Ko. 4:1; 2 Timo. 4:17) Kulanguluka languluka pa byaubanga bano bakalume bakishinka kwitukwasha kuwamishako byo twingila mwingilo wetu wa kusapwila.
3. Mambo ka o kyanemena kubula kukankazhama pa kuwamishako mumo mubena kukebewa lupimpu?
3 Kuwamishako Bilubo Byetu: Kechi kitukwasha ne inge twatala mu kimbonyi, pano bino twabula kuwamisha pabena kubula kumweka bulongo. Twakonsha kwipuzha Yehoba amba etukwashe kwipesapesa po twafwainwa kuwamisha ne kwingijilapo. (Sala. 139:23, 24; Luka 11:13) Mambo a kuba’mba kimye kyashalako kyakepa kabiji tukeba kukwasha bantu kupuluka, kechi twafwainwa kukankazhamanga kuwamishako mumo mubena kukebewa lupimpu ne.—1 Ko. 7:29; 1 Timo. 4:16.
4. Ñanyi bintu bimwekela muntu utajisha mu mambo a Lesa ne kuba byo atanga?
4 Biji muntu mukachi ka muchima byo byanema kwi Yehoba kukila mwekelo ya pangye. (1 Pe. 3:3, 4) Ñanyi bintu bimwekela muntu utajisha mu Mambo a Lesa ne kuba byo atanga? Uno muntu ‘kechi umvwatu ne, bino wingila mwingilo, kabiji ukekala na lusekelo mu bintu byo oba.’ (Yako. 1:25) Ibyo, tukekala na lusekelo ne kwingila bulongo mwingilo wa kusapwila na mambo a kuba’mba tukasamishanga “lukumo lwa Yehoba nobe kimbonyi.”—2 Ko. 3:18.