Ingijishainga “Byambo bya Kutendekelako bya Mambo a Lesa”—Kutendekelamo Mwisambo

1. Ñanyi kingijisho kya katataka kyo twatambwila kya kwingijisha mu mwingilo?

¹ Baibolo wa katataka wa Binembelo bya Ntanda Ipya uji na kipungu kyawama ku ntendekelo kya kuba’mba “Byambo bya Kutendekelako bya Mambo a Lesa.” Mu milaka imo, bino byambo bebinemba mu tumabuku tucheche. Twakonsha kwingijisha byepi kino kingijisho kya katataka pa kunengezha bya kwisamba mu mwingilo? Byo kiji kuba’mba mu kino kipungu muji binembelo bibena kwamba pa mitwe ya mu Baibolo yapusana pusana byonkatu biji buku wa Ukupelulula, kyakonsha kuwama kwikingijisha kutendekelamo misambo.

2. Mwakonsha kwingijisha byepi “Byambo bya Kutendekelako bya Mambo a Lesa” mu mwingilo?

² Mwakonsha kwingijisha bwipuzho 8 ne kwamba’mba: “Tubena kwisambako na bakwetu mu nyaunda mambo bantu bavula balanguluka’mba, ‘Nanchi twafwainwa kupamo Lesa mambo pa buyanji bwa bantu nyi?’ [Mu manyaunda amo, kyakonsha kuwama kumwesha mwina nzubo bwipuzho.] Mwalangulukapo amba ka? [Lekai akumbule.] Baibolo wakumbula bulongo buno bwipuzho.” Tangai mu Baibolo kinembelo kimo nangwa kukilapo byo bamwesha ne kwisambapo. Mwina nzubo inge wamwesha lusekelo, mwakonsha kumumwesha mepuzho 20 aji mu byambo bya kutendekelako ne kumwambila’mba asalepo bwipuzho bo mukesambapo kimye kyo mukabwelako. Nangwa mwakonsha kumupa buku ye mufunjishamo Baibolo walumbulula bulongo mutwe ye mubena kwisambapo.

3. Twakonsha kwingijisha byepi “Byambo bya Kutendekelako bya Mambo a Lesa” kutendekelamo misambo mu nyaunda inge tubena kwisamba na bantu babula kwitabila mu bupopweshi bwa bena Kilishitu?

³ Mepuzho 4 ne 13 kufika ku 17 akonsha kwingila bulongo inge mubena kwingijila mu nyaunda muji bantu babula kwitabila mu bupopweshi bwa bena Kilishitu. Kya kumwenako, mwakonsha kwingijisha byambo biji mu bwipuzho 17 ne kwamba’mba “Tubena kufwakesha bantu ne kwingila mwingilo wa kuya na kukwasha bisemi. Nanchi mwakonsha kuswa kuba’mba bisemi bibena kupita mu makatazho avula lelo jino nyi? [Lekai akumbule.] Bavula besongola batana’mba bino byambo bya kuba’mba: “Mwanamukazhi naye wafwainwa kwikala na mushingi mukatampe ku mwatawanji,” bikwasha bingi. [Kechi mwafwainwa kwamba’mba bino byambo byafuma mu Efisesa 5:33 ne. Inge mubena kwisamba na mwanamukazhi, mwakonsha kutanga byambo biji mu Efisesa 5:28.] Nanchi mwalanguluka’mba kulondela jino jifunde kwakonsha kwimukwasha mu masongola enu nyi?”

4. Bika byo mwakonsha kuba pa kupwisha kwisamba na muntu wabula kwitabila mu bupopweshi bwa bena Kilishitu?

⁴ Inge mwapwisha kwisamba, ilayai kimye kya kukamonañana jikwabo. Kampe mwakonsha kwingijisha kinembelo kikwabo kiji mu bwipuzho bo mwisambilepo. Inge mwaikala na kimye kyafwainwa, mubuulai kuba’mba byambo byo mwisamba nanji byafuma mu Baibolo. Kwesakana na byo mwisambilepo kimye kyafumako ne byo amona Baibolo, mwakonsha kumupa buku ye mwamona’mba wakonsha kumukwasha.—Monai kya mukachi mu Mwingilo Wetu wa Bufumu wa December 2013..