Nanchi Mubena Kwingijisha JW Library Nyi?

JW Library ke mutanchi ye mwakonsha kwingijisha pa kukopolola Baibolo, mabuku, mavidyo ne byambo byo bakopela mu mawi mu foni wenu, mu kompyuta nangwa mu kiñambañamba kikwabo.

BYO MWAKONSHA KUMUKOPOLOLA: Yai pa intaneti kwingijisha kiñambañamba kyenu ne kukopolola JW Library kufuma pa app store. JW library mwakonsha kumukopolwela mu biñambañamba byapusana pusana. Inge mwaya pa intaneti, shinkulai ka app store ne kukopolwela byo mubena kukeba pa kiñambañamba kyenu. Inge kechi muji na intaneti pa nzubo yenu ne, mwakonsha kuya ku Nzubo ya Bufumu, mu butala bwa mabuku bwa bena kengi nangwa mu shitolo mo bapotesha makabekabe muji intaneti. Inge mwakopolola mabuku mu kiñambañamba kyenu, mukeengijishangatu kwa kubula kuya pa intaneti. Na mambo a kuba’mba pa JW Library babikapo bintu bya katataka, mwafwainwa kumushinkulanga kimye kyonse pa kuba’mba mukopololenga byo babikapo.

MAMBO KA A KWIKELA NA JW LIBRARY? JW Library wakonsha kwimukwasha bingi pa kufunda Baibolo pa bunke bwenu nangwa kimye kya kupwila. Kabiji wakonsha ne kwimukwasha kimye kyo muji mu mwingilo inge mubena kwingila busapwishi bwa kushukilwa.