Bintu Byawama Bimwenamo Bantu Bakookela Lesa

Ngauzhi Mosesa waambile’mba inge twakookela mikambizho ya Lesa, uketupesha. (Mpitulukilo ya mu Mizhilo 10:13; 11:27) Kechi tukookela Lesa na mambo a kuchina kwitukambula ne. Byubilo byawama byo aji nabyo byo bitulengela kumukookela mambo twamutemwa kabiji kechi tukeba kumufichisha ku muchima ne. Mambo a Lesa aamba’mba: “Kutemwa Lesa kulumbulula’mba tulondelenga mikambizho yanji.”—1 Yoano 5:3.

Pano tumwenamo byepi mu kukookela mikambizho ya Lesa? Monai bishinka bibiji.

1. TWIKALA NA MAANA

“Amiwa yami Yehoba Lesa wenu, yenka wimufunjisha kuba’mba mumwenemo, . . . wimutangijila mu jishinda jo mwafwainwa kuyamo.”—ISAYA 48:17.

Yehoba Lesa wituyuka bingi bulongo kabiji witupa mafunde o twafwainwa kulondelanga. Pa kuba’mba tufuukulenga bintu bulongo twafwainwa kufundanga Mambo a Lesa kimye kyonse ne kwingijishanga byo tufunda mu bwikalo bwetu.

2. TWIKALA NA LUSEKELO

“Batokwa ke boba bomvwa mambo a Lesa ne kwialama!”—LUKA 11:28.

Lelo jino bantu bavula balondela mizhilo ya Lesa bekala bingi na lusekelo. Mwanamulume umo wa ku kyalo kya Spain wazhingilanga bingi bukiji kabiji watemenwe bingi kuzhachisha bakwabo pa kubula mambo ne bakazhi banji pamo. Juba jimo watangile mu Baibolo byambo byanembele ngauzhi Mosesa pe Yosefwa mwana wa kwa Yakoba wakokele muchima. Yosefwa bamupoteshe mu buzha kabiji bamukashile pa kubula mambo. Nangwa byonkabyo, Yosefwa watekenye, kechi washinkenye ne, kabiji wibalekejileko mambo. (Ntendekelo, bitango 37-45) Uno mwanamulume wa ku Spain waambile’mba: “Kulanguluka pa byapichilemo Yosefwa kwankwashishe kwikala na byubilo nabiji, kutekanya, lusa ne kwikanya. Kino kyandengela kwikala bingi na lusekelo mu bwikalo bwami.”

Mambo a Lesa etukwasha kuyuka byo twakonsha kumonanga bakwetu. Monai kino byo bekilumbulula mu mutwe walondelapo.