BYAFWAINWA KWIKALA BENA KILISHITU
Byakonsha Kwimukwasha Kwikala na Mukoyo wa Kutanga Mambo a Lesa
Nanchi mukeba kuchinchika mu bya malwa byonka byachinchikile Danyela nyi? Danyela watanganga bingi Mambo a Lesa, kuvwangakotu ne bungauzhi. (Da 9:2) Kutanga Baibolo kukemulengela kutwajijila kwikala na lwitabilo. Mu ñanyi jishinda? Lwitabilo lwenu lwa kuba’mba Yehoba ukafikizha byo alaya lukakoselako. (Yos 23:14) Kukalengela ne butemwe bo mwatemwa Lesa kubayilako kabiji kukemutundaikanga ne kuba byaoloka. (Sl 97:10) Pano mwakonsha kutendeka byepi? Langulukai pa bino byalondelapo.
Ñanyi bintu byo nafwainwa kutanga? Mutanchi wa kutanga wawama mwavwangwa ne kunengezha kupwila. Mwakonsha kumwenamo inge ke mupesepese bishinka byo mwabula kumvwisha biji mu mutanchi wa kutanga Baibolo kwa mulungu ne mulungu. Bamo bafukuulapo kutanga pa bungauzhi bwa mu Baibolo, bipangwa bya mupashi wa Lesa byapusana pusana, byaendele mutumwa Paulo mu mwingilo wa bumishonale nangwa pa bilengwa byalenga Yehoba. Kabiji inge mwavulukapo bintu bimo bya mu Baibolo byo mwabula kumvwisha, mwakonsha kunembapo pamo pa kuba’mba mukapesepesepo.
Kwepi ko nakonsha kutaana byambo? Bintu bimo byo mwakonsha kuba ke kutamba vidyo wa kuba’mba, Bya Kwimukwasha Kupesapesa bya Buneme Biji mu Mambo a Lesa. Kabiji mwakonsha ne kupesapesa pa bufumu bukatampe bwa pano pa ntanda bwimenwako na binyama biji mu Danyela kitango 7.
Kimye kyalepa byepi kyo nafwainwa kwikala na kutanga? Kutanga kimye kyonse kwitukwasha kukosesha bulunda bwetu ne Lesa. Mwakonsha kutangangatu pa kimye kicheche, bino mu kuya kwa moba mwanungako. Kutanga Mambo a Lesa kuji nobe mubena kupoya mabwe a buneme; inge mwatana mabwe a buneme, popo mukekala na kizaku kya kutwajijila kupoya! (Man 2:3-6) Mukekala na mujojo wa kutanga Mambo a Lesa, kabiji kutanga kukekala ke mutanchi wa kimye kyonse.—1Pe 2:2.
BINYAMA BYATONGOLWA MU DANYELA KITANGO 7 BIMENAKO KA?
BWIPUZHO BUKWABO:
Nga bungauzhi buji mu Danyela 7:8, 24 bwafikile byepi?
JUBA JIKWABO:
Binyama biji mu Lumwekesho kitango 13 bimenako ka?