Ingijishainga Mavidyo pa Kufunjisha bo Mufunjisha Baibolo

Mavidyo, bipikichala ne bintutu bikwabo bilengela muntu kutako bingi muchima, kumvwisha ne kuvuluka byo afunjile. Kala, Mufunjishi wetu Mukatampe aye Yehoba, waingijishanga bimwesho pa kufunjisha bakalume banji bintu byanema. (Nt 15:5; Ye 18:1-6) Kabiji Mufunjishi Wayukisha aye Yesu, naye waingijishanga bifwanyikizho ne bishimpi. (Mat 18:2-6; 22:19-21) Mu myaka ya kulutwe kuno, kingijisho kimo kibena kwingila bingi bulongo pa kufunjisha bantu ke mavidyo. Nanchi mubena kwingijisha mavidyo pa kufunjisha bantu nyi?

Betunengezhezha mavidyo jikumi a kwingijisha pa kufunjisha bantu mu buloshuwa wa Mambo Awama Afuma kwi Lesa! Mutwe wa vidyo yense wakwatankana na bwipuzho buji mu byambo bifiita biji mu buloshuwa. Mu buloshuwa uji pa jw.org babikamo tumisabilo twakwituvululamo kimye kyo twafwainwa kutambisha ano mavidyo. Kabiji tuji ne na mavidyo akwabo aamba pa biji mu mabuku o twingijisha pa kufunjisha bantu.

Nanchi mubena kwisamba pa mutwe wakonsha kukatazha ye mufunjisha Baibolo kumvwisha nyi? Nanchi kuji makatazho amo abena kupitamo ye mufunjisha Baibolo nyi? Kebai mavidyo pa jw.org® ne pa JW Broadcasting® pa kuba’mba mutaane vidyo usakumukwasha. Kampe mwakonsha kutamba vidyo pamo na ye mufunjisha Baibolo ne kwisambapo.

Pa ñondo pa ñondo betunengezhezha mavidyo akatataka. Inge mubena kutamba ano mavidyo, langulukainga pa byo mwakonsha kwiengijisha pa kufunjisha bantu Baibolo.