Pwanañanainga Pamo na Bantu Batemwa Yehoba

Mambo ka o twafwainwa kupwanañenanga pamo na bantu batemwa Yehoba? Mambo bantu bo tupwanañana nabo bakonsha kwitulengela kuba byawama nangwa byatama. (Man 13:20) Akino kyo kyamwekejile Mfumu Yehoashi. Kupwanañana na Yehoyada Ñanga Mukatampe kwamulengejile kutwajijila kuba “byaoloka kwi Yehoba.” (2Mo 24:2) Pano bino, Yehoyada byo afwile, Yehoashi wasatukijile Yehoba na mambo a kupwanañana na babi.—2Mo 24:17-19.

Mu myaka kitota kitanshi, mutumwa Paulo waesakenye kipwilo kya bena Kilishitu ku “nzubo ikatampe,” kabiji bantu baji mu kipwilo ku “bipe,” nangwa’mba bingijisho bya mu nzubo. Twikala “kipe kya mwingilo wanema” inge ke tuchinuzhuke kupwanañana na bantu boba bintu bifichisha Yehoba ku muchima, nangwatu ba mu kisemi kyetu nangwa ba mu kipwilo. (2Ti 2:20, 21) Onkao mambo, twayai tupwanañanenga na bantu batemwa Yehoba mambo baketutundaika kumwingijila.

TAMBISHAI VIDYO WA KUBA’MBA BYA KUKANA KUPWANAÑANA KUBI, APA BINO MWISAMBE ANO MEPUZHO:

• Ñanyi mashinda amo mo twakonsha kutendekela kupwanañana na bantu babi?

• Mu vidyo ye twatamba, ñanyi bintu byakwashishe bena Kilishitu basatu kuleka kupwanañana na babi?

• Ñanyi mafunde a mu Baibolo akonsha kwimukwasha kusala bulongo balunda?