“Langulukainga . . . pa Bintu Byafwainwa Kutotwa ku Bantu”

Kulanguluka pa ñanyi bintu byonkabyo? Filipai 4:8 waamba pa kulanguluka pa bintu bya kine, bintu byanema, bintu byaoloka, bintu bilengela muntu kwilama bulongo, bintu bileta butemwe, bintu bitelwa bulongo, bintu byawamisha ne bintu byafwainwa kutotwa ku bantu. Akino kechi kibena kulumbulula’mba bena Kilishitu bafwainwa kulangulukangatu pa bya mu Baibolo kimye kyonsetu ne. Nangwa byonkabyo, bintu byo tulangulukapo byafwainwa kwikala bintu bitokesha Yehoba ku muchima. Kechi twafwainwa kulangulukanga pa bintu byakonsha kwitulengela kubula kwikala bakishinka ne.—Sl 19:14.

Kyakatazha bingi kuchinuzhuka kulanguluka pa bintu byabula kufwainwa. Kechi twafwainwatu kukana bikeba mibiji yetu ya bundengamambo ne, bino twafwainwa kukana ne bya bujimuku bya kwa Satana “lesa wa buno bwikalo.” (2Ko 4:4) Na mambo a kuba’mba Satana ye ubena kulama ino ntanda, bintu byo batambisha pa TV, byo bamba pa waileshi, pa Intaneti ne byo banemba mu mapepala a byambo byatama bingi. Twafwainwa kujimuka bingi na bintu byo tulangulukapo, mambo bintu byo tulama mu muchima bimwekela mu byo tulanguluka ne mu byo tuba.—Ya 1:14, 15.

TAMBAI VIDYO WA KUBA’MBA: CHINUZHUKAINGA BINTU BYAKONSHA KUPWISHA BUKISHINKA BWENU—BYA KISANGAJIMBWE BYATAMA, APA BINO MUKUMBULE ANO MEPUZHO:

• 

  Ñanyi bintu byatambilenga mulongo pa foni wanji, kabiji byamulengejile kwikala byepi?

• 

  Kinembelo kya Ngalatiya 6:7, 8 ne Salamo 119:37 byamukwashishe byepi?