Kwashainga bo Mufunjisha Baibolo Kwikala na Bulunda Bwakosa ne Yehoba

Yehoba ukeba’mba tumwingijilenga na mambo a kumutemwa. (Mat 22:37, 38) Kutemwa Lesa ko kulengela bo tufunjisha Baibolo kupimpula bwikalo bwabo ne kutwajijila kuchinchika inge babena kupita mu meseko. (1Yo 5:3) Kabiji kutemwa Lesa ko kukebalengela kufuukulapo kubatizhiwa.

Kwashainga bo mufunjisha Baibolo kuyuka’mba Lesa wibatemwa bingi. Mwafwainwa kwibepuzhanga mepuzho nabiji a kuba’mba: “Kino kibena kukufunjishapo ka pe Yehoba?” nangwa’mba “Kino kimwesha byepi amba Lesa wakutemwa?” Bakwashai kuyuka Yehoba byo abena kwibakwasha pa muntu pa muntu. (2Mo 16:9) Babuulai Yehoba byo akumbwile milombelo yenu ne kwibatundaika kuyuka Yehoba byo abena kukumbula milombelo yabo. Kituletela bingi lusekelo inge bo tufunjisha Baibolo bayuka amba Yehoba wibatemwa, ne kumwesha kuba’mba nabo bamutemwa kabiji bakeba kwikala balunda nanji.

TAMBAI VIDYO WA KUBA’MBA KWASHAINGA BO MUFUNJISHA BAIBOLO KWIKALA NA BULUNDA BWAKOSA NE YEHOBA, APA BINO MUKUMBULE ANO MEPUZHO:

• 

  Ñanyi lukatazho lwajinga ne Jade?

• 

  Neeta wakwashishe byepi Jade?

• 

  Jade wapwishishe byepi lukatazho?