Nanchi Mwinengezha ku Malwañano Akonsha Kwikalako mu Kyalo Nyi?

Mpelo ya ino ntanda byo yafwenya kala pepi, twafwainwa kuketekela kuba’mba malwañano, bumbanzhi ne makondo bisakuyangatu na kuvujilako. (Lum 6:4) Twakonsha kwinengezha byepi ku bintu bya uno mutundu byakonsha kumweka kulutwe?

• Inengezhai Kutwajijila Kwikala Bakishinka: Yukaipo mafunde a mu Baibolo ne mashimikila amo akonsha kwimukwasha kutwajijila kuketekela mwi Yehoba ne mu jibumba janji kabiji akonsha kwimukwasha kutwajijila kubula kwivwanga mu bya pano pa ntanda. (Man 12:5; jr 125-126 mafu. 23-24) Kino kyo kimye kyo twafwainwa kukosesha bulunda na balongo ne banyenga mu kipwilo.—1Pe 4:7, 8

• Nengezhai bya Kwingijisha: Nengezhai kwa kunyemena kwawama, kajo kavula ne bya kwingijisha bikwabotu. Kabiji nengezhezhai jimo ne byo mukanyema. Monai inge mwalonga byonse bikakebewanga mu kyola, kubikapotu ne bya kuvwala pa kanwa, bya kuvwala ku maboko ne mali. Tambulai manambala a bakulumpe mu kipwilo, kabiji ne anweba mwafwainwa kwibapa manambala enu a foni.—Isa 32:2; g17.5 3-7

Mu kimye kya milukuchi, twajijilai kulomba, kwikala na lufunjisho lwa pa bunke ne kutanwa ku kupwila. (Fp 1:10) Chinuzhukainga kuya ku mapunzha akwabo kanatu inge mubena kunyema. (Mat 10:16) Paingapo bakwenu kajo ne bintutu bikwabo bya kwingijisha.—Lo 12:13.

TAMBAI VIDYO WA KUBA’MBA NANCHI MWINENGEZHA KU BYA MALWA NYI?, APA BINO MUKUMBULE ANO MEPUZHO:

• Yehoba wakonsha kwitukwasha byepi inge kwamweka bya malwa?

• Ñanyi bintu byo twafwainwa kuba pa kwinengezha?

• Twakonsha kukwasha byepi bakwetu baponenwa na bya malwa?