BYA KUPWISHA LUPATO

1 | Kwikala Na Misalululo Ne

Lufunjisho lwa mu Baibolo:

“Lesa kechi uji na misalululo ne, bino mu bisaka byonse muntu umwakamwa ne kuba byaoloka ye witabilwa kwi aye.”—BYUBILO 10:34, 35.

Byo Kilumbulula:

Yehobaa Lesa kechi utala pa kyalo kyetu, mutundu, kikoba, nangwa kisho ne. Pakuba umona byo tuji mukachi. Kya kine, “muntu umonatu pangye ya mubiji, pakuba Yehoba utala mu muchima.” —1 Samwela 16:7.

Byo Mwakonsha Kuba:

Nangwa kya kuba kechi tumona mu michima ya bantu ne, pano bino, twakonsha kulondela byuba Lesa ne kubula kwikala na misalululo. Ibikaingako kumona byubilo biji na muntu umo umo. Inge mwamona kuba’mba mwatendeka kwikala na milanguluko yatama pa bantu bamo, kampe na mambo a kikoba nangwa kyalo ko bafuma, lombai kwi Lesa kuba’mba emukwashe kuleka ino milanguluko. (Salamo 139:23, 24) Inge mwalomba kufuma panshi ya muchima kwi Yehoba kuba’mba emukwashe kubula kwikala na misalululo, mwakonsha kushiinwa kuba’mba ukomvwa milombelo yenu ne kwimukwasha.—1 Petelo 3:12.

a Yehoba jo jizhina ja Lesa.—Salamo 83:18.

“Kyo kyajinga kimye kitanshi kwikala pamo na muzungu mu mutende . . . Pano naikele mu kisemi kya balongo ne banyenga betemwa kya kine mwaya ntanda yonse.”—BA TITUS

Jishimikila ja Bwikalo—BA TITUS

Bashinjile Lupato

Ba Titus bajinga mu jibumba ja tupondo jazhingijile na mambo a mizhilo ya kafulumende yatundaikanga misalululo. Baambile’mba: “Twayanga ku mapunzha ko bakanyanga bantu bafita, nabiji ku mahotela ne mu bishimikwa bya malwa, na kulwa na bantu.” Ba Titus baambile’mba lupato lo lwibalengejile kwikala bingi na bukaji, kabiji banungilepo’mba: “Inge natendeka kutoboka na mwanamulume nangwa mwanamukazhi, yami natendekelangapo kumupumamo.”

Ba Titus batendekele kupimpula byubilo byabo kimye kyo batendekele kufunda Baibolo na Bakamonyi ba kwa Yehoba. Kutanga Baibolo kwapimpwile ndangulukilo yabo. Batundaikilwe bingi na mulaye wa ntanda iji kulutwe mukabula “lufu, mabingo, kujila ne misongo.”—Lumwekesho 21:3, 4.

Patanshi, ba Titus kibakatezhe bingi kuleka kushikwa bakwabo. Baambile’mba: “Kyankatezhe kupimpula milanguluko ne byubilo byami.” Bino bintu byo bafunjile pa kinembelo kya Byubilo 10:34, 35, kyaamba’mba Lesa kechi uji na misalululo ne, bibakwashishe bingi.

Ñanyi bintu byafuminemo? Ba Titus balumbulwile’mba: “Nashiinwe kuba’mba Bakamonyi ba kwa Yehoba bo bupopweshi bwa kine byo namwene byo betemwa bene na bene nangwa kya kuba baji na bikoba byapusana pusana. Nangwatu saka nkyangye kubatizhiwa kwikala Kamonyi, umo mu kipwilo muzungu wangichile ku nzubo kwanji kuba’mba tuye na kujiila pamo kajo. Kyajingatu nobe kiloto. Kyo kyajinga kimye kitanshi kwikala pamo na muzungu mu mutende ne kujiila nanji pamo kajo mu nzubo yanji. Pano naikele mu kisemi kya balongo ne banyenga betemwa kya kine mwaya ntanda yonse.”