Ma Bisiketi o Bapeele Tubakabwa
BA NICK bekala mu Oregon mu U.S.A. banembele’mba “mu kimye kya kisalo mu 2014, nayanga na kololako maulu saka nasenda ne tubakabwa twami tubiji tucheche. Mu taunyi mo nayanga natanganga Bakamonyi saka baimana na twa kutanchikapo mabuku. Bavwalanga bingi bulongo ne kumwesha lusekelo bantu bonse bapitanga.
“Bakamonyi batele bingi muchima bantu ne tubakabwa twami tubiji. Juba jimo, ba Elaine baimene kwipi na ka kutanchikapo mabuku bapele tubakabwa twami tubiji ma bisiketi. Kufumatu popo inge napichila kwajinga bakamonyi twakebanga kuya konka kuba’mba betupe ma bisiketi.
“Byo papichile bañondo, tubakabwa twami batwajijile kwitupa ma bisiketi kabiji ne amiwa nesambanga na ba Bakamonyi bya mu Baibolo. Pano bino, kechi nakasulukile kwisambanga nabo bya mu Baibolo ne, mambo najinga na myaka 70 kabiji kechi nayukile byaitabijilemo Bakamonyi ne. Kabiji na mambo a kuba’mba nalefwilwe na byo bafunjishanga mu machechi avula, nafuukwilepo kutanganga Baibolo bunke bwami.
“Kabiji namonanga Bakamonyi bakwabo saka baimana kwipi na twa kutanchikapo mabuku. Nabo bakasulukijile bingi bantu. Bakumbulanga mepuzho onse o nebepuzhanga aamba pa Baibolo. Kino kyandengejile kwibaketekela bingi.
“Juba jimo ba Elaine bangipwizhe amba: ‘Nanchi mwayuka kuba’mba banyama ke bupe bwitupa Lesa nyi?’ Nakumbwile’mba, ‘Ee nayuka byobyo!’ Kepo ba Elaine batangile kinembelo kya Isaya 11:6-9. Kino kinembelo kyamfikile bingi pa muchima kabiji nakebelenga kufunda byavula pa Baibolo. Nangwa byonkabyo, kechi nakebanga kusendapo mabuku abo o batanchikanga ne.
“Mu kuya kwa moba, naumvwanga bingi bulongo kwisamba bya mu Baibolo ne ba Elaine ne ba bamwatawabo ba Brent. Pa kuba’mba ngubenga byaubanga Yesu, bantundaikile kutanga buku wa Mateo kufika ku Byubilo. Natangile ano mabuku onse byonka byo bambuujile. Naswile kutendeka kumfunjisha Baibolo kwi ba Brent ne ba Elaine. Natendekele kufunda Baibolo mu kisalo mu mwaka wa 2016.
“Natengelanga bingi kufunda Baibolo ne kupwila pa Nzubo ya Bufumu. Najinga bingi na lusekelo pa kufunda byaamba Baibolo. Byo papichile mwaka umo, nabatizhiwe ne kwikala Kamonyi wa kwa Yehoba. Luno nji na myaka 79 kabiji nji bingi na lusekelo mambo nataana bupopweshi bwa kine. Nsanchila bingi Yehoba pa kundeta mu kisemi kyanji kya bapopweshi ba kine.”