Banabakazhi Babiji Bafwilwa
SANDRA mwanamukazhi wafwilwa wikala mu Australia, wakankamene bingi kimye kyafwile bamwatawanji. Kwesakana na kwamba kwanji mwine, waambile’mba: “Kya nkumishe bingi kine, mulunda nami wataikiletu nobe kukopa kwa jiso. Nkankalwa ne kuvuluka byo naendele kufuma ku kipatela kufika ku nzubo, nangwatu byo naubile pa jo ja juba jonse. Mu milungu yalondejilepo, binyenge byandetejile bingi misongo mu mubiji.”
Sandra uji ne na mukwabo wakikulumpe wafwilwa pa myaka 6, jizhina janji Elaine. Elaine wasungile bamwatawanji ba Davida mu misongo yabo pa bañondo 6 saka bakyangye kufwa na kansa. Pa nyuma ya kufwa bamwatawanji, bulanda bwamukwachile bingi kya kuba pa kimye kicheche wakankelwenga ne kumona. Myaka ibiji yalondejilepo waponene pa bantu. Dokotala wanji kechi watainemo kikola mwi aye ne, pano bino, wataine kuba’mba Elaine wajinga na binyenge byabaya bingi. Onkao mambo, wamwambijile’mba aye ku nzubo akekanjikizhe kujila. Elaine waambile’mba: “Kyataile kimye kyabaya bingi pa kuba’mba bulanda bwami bupwe,” kabiji waambile’mba inge naikala bunke “nailenga ku kibamba kya kukachi na kwikumbakanya bivwalo byajinga bya ba Davida ku mutwe wami.”
Ee kine, kufwisha mutemwe obe wa pa muchima kuleta kusasata, mambo mu kufwilwa muji bintu byavula kechi kufwishatu mulume konka ne. Kya kumwenako, kwajinga bimye bimo Sandra byo eumvwinenga kuba’mba kechi ye iye ne. Byonkatu byumvwa banabakazhi bakwabo bafwilwa, waubile bingi binyenge. Sandra uvuluka’mba: “Bamwatawami bo bafuukulanga bintu bulongo, pano byo bafwile kine byankatezhe. Kechi nalaalanga tulo ne. Mubiji waikalangatu wakokelela, kabiji nakankalwanga ne bya kuba.”
Byonka byapichilemo Sandra ne Elaine, pa juba pa juba kuzhokoloka ntanda yonse byo babena kupitamo bantu. Misongo, mapuso, makondo, bukapondo ne bumbanzhi bwavula, bibena kulengela kibelengelo kya banabakazhi bafwilwa kukomenakotu kikupu.a Banabakazhi bavula ba uno mutundu bekala na bulanda, pano kechi bebumweshatu ne, mambo a kubula bya kuba. Nga balunda ne balongo bakonsha kubapo ka pa kuba’mba bakwashe banabakazhi bafwilwa? Mutwe walondelapo uji na byambo bimo byakonsha kukwasha.
[Tubyambo twa mushi]
a Banabakazhi bamo bajitu nobe bafwilwa, mambo bamwata wabo bebakana. Nangwa kya kuba kwabana ne kwikana kuleta makatazho akwabo, mafunde aambiwapo mu mutwe walondelapo, akonsha kukwasha banabakazhi baji mu buno bwikalo.