“Fwenyai Kwipi Ne Lesa, Kabiji Ne Aye Ukafwenya Kwipi Ne Anweba”

Saka Akyangye Kuleka Byubilo Byatama—Ne Kimye kyo Alekele

MWANAMUKAZHI umo wa jizhina ja Sandra wikala mu kyalo kya Mexico, witelele mwine amba nsatuki wa mu kisemi. Kubula kumuta muchima ne kubula kumumwesha kifyele, kwamulengejile kubula kukoma bulongo mu myaka yanji ya mu bukamwale. Waamba’mba: “Mu myaka yami yonse ya bukamwale nelangulwishengatu namba nanchi kika kyonaikelako, kyawamatu ne kufwa.”

Kimye kyo akijinga pa Sukulu, Sandra watendekele kutoma maalwa apotanga bashanji pa nzubo. Mu kupita kwa kimye, watendekele kwipotela mwine kabiji kino kyamulengejile kwikala ke kitomi. Waamba’mba: “Kechi nakebelenga kwikala mumi ne.” Na mambo a bijikila, Sandra watendekele kwingijisha bizhima. Kabiji waamba’mba: “Mutumwa wa maalwa, bizhima, ne jamba yaesakana yonasendanga mu kakyola kami byo byankwashanga kulubako ku makatazho ami.”

Sandra byoapwishishe sukulu wanji wa bunaase, waikele ke kitomi wa mama nafwa. Wakebele ne kwiipaya mwine. Bino wapulukile.

Sandra walombele bukwasho ku bipwilo bya bupopweshi byapusana pusana byavula kuba’mba bimukwasheko ku mupashi ne kuleka kwikala na kijikila, bino kechi byamukwashishe ne. Byoamwene amba kechi byakonsha kumukwasha ne, waalukijile kwi Lesa ne kumujijila javula amba: “Anweba Lesa, nanchi muji kwepi? Nga mambo ka o mwabujila kunkwasha?” Kimye Kamonyi wa kwa Yehoba kyo esambile nanji, wiumvwine kuba’mba nanchi kechi nasuulwa ne. Kino kyalengejile kutendeka lufunjisho lwa Baibolo lwa pa bunke. Sandra watundaikilwe bingi kimye kyo aishile kufunda kuba’mba “Yehoba uji kwipi na bonse balajika michima.”—Masalamo 34:18.

Kamonyi wamufunjishenga Baibolo wamukwashishe bingi Sandra kumvwisha amba Yehoba Lesa wayuka’mba kechi twakosa ne, mambo a bundengamambo ne bumbulwakoloka botwaswana kufuma kwi Adama. Sandra waishile kuyuka amba Lesa wayuka’mba kechi twakonsha kulondela mizhilo yanji yonse mu bololoke ne. (Masalamo 51:5; Loma 3:23; 5:12, 18) Wasekejile bingi pa kuyuka amba Yehoba kechi ulondalonda mambo etu ne, kabiji kechi ukeba’mba tube bintu byo twakonsha kukankalwa kuba ne. Nyimbi wa masalamo washikishe kuba’mba: “Anweba Yehoba, inge mwaji mulondalonda kulenga-mambo kwetu, anweba Nkambo, inge ñanyi ukakonsha kupuluka?”—Masalamo 130:3.

Bukine bwa mu Baibolo bwakijishemo kusangajika Sandra bwajinga bwa kitapisho kya bukuzhi bwa kwa Yesu Kilishitu. Kupichila mu kino kitapisho kya bukuzhi, Yehoba momo amweshesha lusa ku bantu balukokelo kwikala bantu baitabilwa kwi aye nangwa kyakuba bambulwakoloka. (1 Yoano 2:2; 4:9, 10) Ee, twakonsha kutambula “lulekelo lwa mizhilulwila yetu” ne mu jino jishinda tukakwashiwa kushinda milanguluko ya kwiumvwa amba twasuulwa.—Efisesa 1:7.

Kabiji Sandra wafunjile mafunjisho anema bingi ku kyakumwenako kya mutumwa Paulo. Paulo wamusanchijile bingi Lesa pa lusa lwanji lwa kumulekelako bubi bwanji ne kumukwasha kushinda bulwi bwa bundengamambo bwamwishijilenga pa kimye ne pa kimye. (Loma 7:15-25; 1 Kolinda 15:9, 10) Paulo wapimpwile bwikalo bwanji, ‘wipuminepumine pa mubiji wanji, ne kumuleta mu buzha’ pa kuba’mba atwajijile kwikala mu jishinda jaitabilwa kwi Lesa. (1 Kolinda 9:27) Kechi walekele bundengamambo kumutangijila nobe muzha ne.

Ne Sandra naye bundengamambo bwatwajijile kumwishila, pano bino watwajijile kwibushinda. Walombele na mukoyo bukwasho kwi Yehoba kuba’mba ebushinde kabiji ne kuba’mba amubile lusa. (Masalamo 55:22; Yakoba 4:8) Byoayukile amba Lesa wamutemwa, Sandra wapimpwile bumi bwanji. Waamba’mba: “Nji na lusekelo bingi lwa kufunjisha bakwetu Baibolo kimye kyonse.” Kabiji Sandra wajinga ne na jishuko ja kukwasha kolojanji wamukazhi ne nkasanji wamukazhi kuyuka Yehoba. Ano moba byo ‘abena kwingila mingilo yawama,’ wifuukwila aye mwine kukwashañana mu kwingijisha busendwe bwanji bwa bunaase pa kupwila kwa nkambi kwa Bakamonyi bakwa Yehoba.—Ngalatiya 6:10.

Nga bintu byo epizhizhe kwingijisha Sandra kyajinga byepi? Waambishatu kuba’mba: “Mulanguluko wami wakasuluka. Kechi ntoma malwa, kupepa fwanka, nangwa kwingijisha bizhima ne. Kechi nebikeba nangwa pachechetu ne. Nataine kyo nakebelenga.”

[Mabulañano pa peja 9]

“Nataine kyo nakebelenga”

[Kitenguluzha pa peja 9]

Mafunde a mu Baibolo Engila

Ano o mafunde amo a mu Baibolo akwasha bavula kuleka kwibipisha na bibijisho byatama:

“Twikoseshe atwe bene ku bubipisho bonse bwa mubiji ne bwa muchima, kasa tulumbulula buzhile bwetu mu moyo wa kwakamwa Lesa.” (2 Kolinda 7:1) Lesa upesha boba betokesha bene ku bubipisho bwa kuchinuzhuka byubilo byatama.

“Kumwakamwa Yehoba ko kushikwa bubi.” (Byambo bya Mana 8:13) Kwikala na moyo wakwakamwa Lesa kukwasha muntu kuleka byubilo byatama, ne kuleka kwingijisha bizhima mu jishinda jatama. Muntu wapimpula byubilo byanji kechi usangajikatu Yehoba ne, bino kimukwashako ne kwizhikijila ku bikola byatama.

‘Nekenenai bamfumu ne ba lūsa.’ (Titusa 3:1) Mu mapunzha avula, kwikala na bizhima bimo bimo nangwa kwibingijisha ke kulala muzhilo. Bena Kilishitu bakine kechi bekala na bizhima byo bakanya mu mizhilo nangwa kwibingijisha ne.