Buku wa Lumwekesho Waambapo’mba ka pa Bwikalo Bwenu bwa Kulutwe?

1. Ñanyi kintu kyanema kyafwainwa kufuukulapo bantu bonse?

BANTU lelo jino bafwainwa kufuukulapo bya kuba. Nanchi bafwainwa kufuukulapo kutundaika Yehoba Lesa kuba’mba ye Kalama wa bilengwa byonse nyi, inyi kutundaika mulwanyi wanji wakanama aye Satana Diabola? Muntu yense wafwainwa kusalapo ye akeba kwingijila. Kintu kyo bakasalapo kuba kikebalengela kwikala na bumi bwa myaka ne myaka nangwa ne. (Mat. 25:31-33, 46) Bakebabika tuyukilo twa lupulukilo nangwa twa lonaiko mu kimye kya “malwa akatampe.”—Lum. 7:14; 14:9-11; Ezi. 9:4, 6.

2. (a) Kinembelo kya Bahebelu 10:35-39 kibena kwitutundaika kuba ka? (b) Buku wa Lumwekesho wakonsha kwitukwasha byepi?

² Tangai Bahebelu10:35-39. Umvwe mwafuukulapo kutundaika bukalama bwa Yehoba, ko kuba’mba mwafuukulapo kintu kyanema bingi. Pano luno mubena kukeba kukwasha bantu bakwabo kufuukulapo kutundaika bukalama bwa Yehoba. Mwafwainwa kwingijisha byambo biji mu buku wa Lumwekesho kwibakwasha. Uno buku waamba pa bintu bikamwekela bantu babula kukookela Yehoba, kabiji waamba ne pa mapesho akekala na batundaika bukalama bwanji mu bukishinka. Onkao mambo, twafwainwa kufunda pa ano mapesho awama. Kuba bino kuketukwasha kutwajijila kwingijila Yehoba. Kabiji byo twafunda biketulengela kukwasha bakwetu nabo kufuukulapo kutwajijila kwingijila Yehoba.

3. Ñanyi bintu byo tusakwisambapo mu uno mutwe?

³ Mu uno mutwe, tusakwisamba pa ano mepuzho: Ñanyi mapesho akekala na bantu batundaika bukalama bwa Lesa? Ñanyi bintu bikamwekela bantu batundaika lukinyama wachijisha ye baambapo mu buku wa Lumwekesho?

MAPESHO AKATAMBULA BANTU BAKISHINKA

4. Ñanyi jibumba mutumwa Yoano jo amwene saka jaimana pamo ne Yesu mwiulu?

⁴ Mutumwa Yoano wamwene mu kimwesho mabumba abiji atundaika bukalama bwa Yehoba bakatambula mapesho a bumi bwa myaka ne myaka. Jibumba jitanshi ke ba 144,000. (Lum. 7:4) Abano bafuma pano pa ntanda kabiji bo balenga kafulumende nangwa’mba Bufumu pamo ne Yesu mwiulu. Bakalamanga pamo nanji pano pa ntanda ponse. (Lum. 5:9, 10; 14:3, 4) Mu kimwesho, Yoano wibamwene saka baimana pamo ne Yesu pa Mutumba wa Ziona.—Lum. 14:1.

5. Kika kikamweka ku ba 144,000 bakiji bomi pano pa ntanda?

⁵ Kutendekatu kimye kyajingako batumwa kufika ne luno, bantu bavula bebasala kwikala mu jino jibumba ja ba 144,000. (Luka 12:32; Loma 8:17) Nangwa byonkabyo, Yoano bamubuujile’mba mu moba a kupelako, pakashalatu bacheche ba mu jino jibumba bakekala bomi pano pa ntanda. Bano ‘bashalapo’ bakebabika ‘tutetesho’ twapelako twakwibalengela kwitabilwa kwi Yehoba malwa akatampe saka akyangye kutendeka. (Lum. 7:2, 3; 12:17) Mu kimye kya malwa akatampe, bano bashalapo bakebatwala mwiulu ne kwinunga ku bakwabo baji mu jibumba ja ba 144,000 bafwile bakishinka. Inge baya mwiulu, bakalamanga pamo ne Yesu mu Bufumu bwa Lesa.—Mat. 24:31; Lum. 5:9, 10.

6-7. (a) Ñanyi jibumba jikwabo jamwene Yoano, kabiji ñanyi bishinka byo twafwainwa kufunda pa jino jibumba? (b) Mambo ka bashalapo ne “jibumba jikatampe” o bafwainwa kukebela kuyuka biji mu Lumwekesho kitango 7?

⁶ Yoano byo amwene jibumba jikaya mwiulu, wamwene ne “jibumba jikatampe.” Jino ke jibumba ja kukankalwa kubala. (Lum. 7:9, 10) Pano ñanyi bishinka byo twafwainwa kuyuka pa jino jibumba? Yoano bamwambijile’mba: “Bano bo boba bafuma mu malwa akatampe, kabiji bachapa minkukumba yabo ne kwiitokesha mu mashi a Mwana Mukooko.” (Lum. 7:14) Jino “jibumba jikatampe” byo jikapuluka malwa akatampe, jikekalanga pano pa ntanda ne kwiyowa mapesho awama bingi.—Sala. 37:9-11, 27-29; Maana. 2:21, 22; Lum. 7:16, 17.

⁷ Umvwe tukaya mwiulu nangwa tukekalanga pano pa ntanda, bonse tukeyowa mapesho o baambapo mu buku wa Lumwekesho kitango 7. Kinetu kino kimye kikawama bingi ku mabumba onse abiji a bakalume ba Lesa. Tukekala bingi na lusekelo mambo twasajilepo kutundaika bukalama bwa Yehoba. Ñanyi bintu bikwabo buku wa Lumwekesho byo aambapo pa malwa akatampe?—Mat. 24:21.

BIKAMWEKELA BANTU BALENGULULA LESA

8. Malwa akatampe akatendeka byepi, kabiji bantu bavula bakobapo ka?

⁸ Mu mutwe wafumako twafunjile’mba makafulumende a bumulwila ntanda akalukuka Babilona mukatampe, ko kuba’mba bupopweshi bwa bubela bwa ntanda yonse. (Lum. 17:16, 17) Kino kikalengela malwa akatampe kutendeka. Nanchi kino kikalengela bantu kufuukulapo kupopwela Yehoba nyi? Ine. Mambo Lumwekesho kitango 6 umwesha’mba pa kyokya kimye kikakatazha bingi, bantu babula kwingijila Yehoba bakanyemena ku bipamo bya busulu ne bya bumulwila ntanda byo baesakanya ku mitumba kuba’mba bebazhikijile. Na mambo a kuba’mba bano bantu kechi batundaikanga Bufumu bwa Lesa ne, Yehoba ukebamona’mba balwanyi banji.—Luka 11:23; Lum. 6:15-17.

9. Mambo ka bantu ba Lesa o bakapusenako mu kimye kya malwa akatampe, kabiji ñanyi kintu kikebamwekela?

⁹ Bantu ba Yehoba bakapusanako bingi pa kyokya kimye kikakatazha bintu. Bo bonkatu bakengijilanga Yehoba Lesa pano pa ntanda ne kukaana kutundaika “lukinyama.” (Lum. 13:14-17) Balwanyi ba Yehoba bakazhingila na mambo a kuba’mba bantu ba Lesa batwajijila kwikala bakishinka. Kino kikalengela makafulumende a bumulwila ntanda kukwatankana pamo ne kulukuka bantu ba Lesa pano pa ntanda ponse. Baibolo utela kuno kulukuka amba kwa Gogi wa Magogi.—Ezi. 38:14-16.

10. Kwesakana na byaamba Lumwekesho 19:19-21, Yehoba ukobapo ka inge bantu banji bakebalukuke?

¹⁰ Pano nga Yehoba ukobapo byepi inge bantu banji bakebalukuke? Yehoba wakumbula’mba: “Bukaji bwami bukakolomoka.” (Ezi. 38:18, 21-23) Buku wa Lumwekesho kitango 19 waamba pa bintu bikwabo bikamweka. Yehoba ukatuma Mwananji kuya na kuzhijikila bantu banji ne kushinda balwanyi babo. “Mazhita a mwiulu” a bamalaika bakishinka ne ba 144,000 pamo ne Yesu bakalwa nkondo na Gogi wa Magogi. (Lum. 17:14; 19:11-15) Ñanyi bintu bikafuma mu ino nkondo? Bantu bonse ne mabumba balengulula Yehoba bakebonaunatu bonse pelu!—Tangai Lumwekesho 19:19-21.

MASONGOLA AKEKALAKO INGE NKONDO YAPWA

11. Ñanyi kintu kyanema kikamweka kyo baambapo mu buku wa Lumwekesho?

¹¹ Fwanyikizhai bantu bakishinka pano pa ntanda byo bakekala na lusekelo Lesa byo akazhiya balwanyi banji! Kinetu bakasangalala bingi! Nangwa kya kuba bilengwa bya mwiulu bikekala bingi na lusekelo Babilona Mukatampe byo bakamonauna, pano bino kuji ne kintu kikwabo kikebasangajika bingi. (Lum. 19:1-3) Ke “masongola a Mwana Mukooko” o baambapo mu buku wa Lumwekesho.—Lum. 19:6-9.

12. Kwesakana na byaamba Lumwekesho 21:1, 2, ñanyi kimye kikekalako masongola a Mwana Mukooko?

¹² Pano ñanyi kimye kikekalako ano masongola? Saka bakyangye kulwa nkondo ya Amagedonyi, ba 144,000 bonse bakaya mwiulu. Kino kechi kyo kimye kikekalako masongola a Mwana Mukooko ne. (Tangai Lumwekesho 21:1, 2.) Masongola a Mwana Mukooko akekalako inge balwa nkondo ya Amagedonyi ne kushinda balwanyi ba Lesa bonse.—Sala. 45:3, 4, 13-17.

13. Ñanyi bintu bikamweka kimye kya masongola a Mwana Mukooko?

¹³ Ñanyi bintu bikamweka kimye kya masongola a Mwana Mukooko? Byonkatu masongola byo aleta pamo wamulume ne wamukazhi, ne ano masongola akaleta pamo Yesu Kilishitu Mfumu ne ba 144,000, nangwa’mba “musongwa” wanji. Ano masongola akalenga kafulumende mupya ukalama pano pa ntanda pa myaka 1,000.—Lum. 20:6.

MUZHI WAWAMA NE MAPESHO O MUKEKALA NAO KULUTWE

14-15. Lumwekesho kitango 21 waesakanya ba 144,000 ku ka? (Monai kipikichala kya pa nkupiko.)

¹⁴ Kabiji buku wa Lumwekesho kitango 21, waesakanya ba 144,000 ku muzhi wawama utelwa’mba “Yelusalema Mupya.” (Lum. 21:2, 9) Uno muzhi uji na bitendekesho 12 bya mabwe po banembele “mazhina 12 a batumwa 12 ba Mwana Mukooko.” Mambo ka bino byambo o byalengejile Yoano kumvwa bulongo? Mambo wamwene jizhina janji jo banembele pa jibwe jimo. Kinetu waumvwine bingi bulongo!—Lum. 21:10-14; Efi. 2:20.

¹⁵ Uno muzhi wa kifwanyikizho wapusanako bingi na mizhi ikwabo. Wajinga na mukwakwa mukatampe ye bawamishe na ngolode, bibelo 12 byajinga bya ba mangalite, nsakwa ne bitendekesho bebiwamishe na mabwe a buneme kabiji byo bapimine bulongo. (Lum. 21:15-21) Nangwa byonkabyo, Yoano wamwene’mba kuji kintu kyabulapo mambo waamba’mba: “Kechi namwenemo nzubo ya Lesa mu yewa muzhi ne, mambo Yehoba Lesa wa Bulume Bonse ye nzubo yanji yazhila, ne Mwana Mukooko pamo. Kabiji uno muzhi kechi wakebewenga juba nangwa ñondo kusaminamo ne, mambo lukumo lwa Lesa lo lwasamijilemo, kabiji lampi wanji wajinga Mwana Mukooko.”(Lum. 21:22, 23) Aba baji mu Yelusalema Mupya bakamumonanga Yehoba. (Hebe. 7:27; Lum. 22:3, 4) Onkao mambo, Yehoba ne Yesu yo nzubo ya Lesa iji mu uno muzhi.

16. Ñanyi bintu Bufumu bwa Lesa byo bukobila bantu mu Bukalama bwa Myaka Kiumbi?

¹⁶ Bashingwa bomvwa bingi bulongo kulanguluka pa uno muzhi. Aba baji na luketekelo lwa kwikala pano pa ntanda nabo bafwainwa kulangulukanga pa uno muzhi. Mu Bukalama bwa Myaka Kiumbi bwa Bufumu bwa Lesa, Yelusalema Mupya ukaleta mapesho avula bingi ku ba pano pa ntanda. Yoano wamwene ano mapesho apichilenga nobe “mukola wa mema a bumi.” Kabiji ku bushiya ne bushiya bwa mukola kwajinga “bichi bya bumi” byajinga na mabuula a “kubukilako bisaka bya bantu.” (Lum. 22:1, 2) Bantu bonse bakekalangako pa kyokya kimye bakamwenamo mu bino bintu byawama. Mu kuya kwa moba, bantu bonse ba lukookelo bakekala balumbuluka. Kechi kukekala kukolwa, misongo nangwa kujila ne.—Lum. 21:3-5.

17. Kwesakana na byaamba Lumwekesho 20:11-13, bañanyi bakamwenamo mu Myaka Kiumbi ya Bukalama?

¹⁷ Pano bañanyi bakamwenamo mu ano mapesho? Batanshi bakamwenamo ke jibumba jikatampe jikapuluka pa Amagedonyi pamo na baana babo bakasemwa mu ntanda ipya. Kabiji Lumwekesho kitango 20 walaya kuba’mba bantu bafwa bakebasangula. (Tangai Lumwekesho 20:11-13.) Bantu bakishinka “baoloka” ne “babula koloka” bafwile kala bakebasangula ne kwikala pano pa ntanda. Bantu babula koloka ke boba babujile kwikala na kimye kya kufunda pe Yehoba. (Byu. 24:15; Yoa. 5:28, 29) Nanchi kino kibena kulumbulula’mba bantu bonse bakebasangula mu Myaka Kiumbi ya Bukalama ne kwikala pano pa ntanda nyi? Ine. Aba bakaine kufuukulapo kwingijila Yehoba saka bakyangye kufwa kechi bakebasangula ne, mambo bajinga na kimye kya kumwesha umvwe bafwainwa kwikala na bumi mu paladisa pano pa ntanda nangwa ne.—Mat. 25:46; 2 Tesa. 1:9; Lum. 17:8; 20:15.

LWESEKO LUKAPELAKO

18. Bintu bikekala byepi pano pa ntanda myaka 1,000 byo ikapwa?

¹⁸ Myaka 1,000 byo ikapwa, bantu bonse bakekalanga pano pa ntanda bakekala balumbuluka. Kafwako bakekala na bundengamambo bo twaswaine kwi Adama ne. (Loma 5:12) Mafingo a bundengamambo o bafingile Adama bakeafumyapo. Onkao mambo, bonse bakekalanga pano pa ntanda ‘bakekala na bumi’ mambo po po bakekala balumbuluka myaka 1,000 byo ikapwa.—Lum. 20:5.

19. Mambo ka o kukekela lweseko lwapelako?

¹⁹ Twayuka’mba Yesu wakaine Satana kumulengela kubula kwikala wakishinka. Byo bamwesekele kwi Satana watwajijile kwikala wakishinka. Pano nanchi bantu bonse bakatwajijila kwikala bakishinka inge Satana akebeseke nyi? Muntu yense ukakumbula buno bwipuzho kimye Satana kyo bakamufumya mu kalengwa kabula kupela ku mpelo ya myaka 1,000. (Lum. 20:7) Bantu bakatwajijila kwikala bakishinka mu lweseko lukapelako bakatambula bumi bwa myaka ne myaka ne kwiyowa bwanabwabene. (Loma 8:21) Aba bakasatuka bakebonawina pamo na Diabola ne bandemona banji.—Lum. 20:8-10.

20. Bungauzhi buji mu buku wa Lumwekesho bwimulengela kumvwa byepi ku muchima?

²⁰ Bintu biji mu buku wa Lumwekesho byo twisambapo bimulengela kumvwa byepi ku muchima? Nanchi muji na lusekelo pa kuyuka’mba mukamwenamo mu buno bungauzhi nyi? Nanchi kino kechi kimulengela kwikala na kizaku kya kubuulako bakwenu kuba’mba nabo beye mu bupopweshi bwa kine bwa Lesa nenyi? (Lum. 22:17) Twaumvwa bingi bulongo byo twisamba pa bintu byawama bikamweka kulutwe, kabiji ne atweba twakonsha kwamba byonka byaambile mutumwa Yoano amba: “Amena! Iyai, Nkambo Yesu.”—Lum. 22:20.