2 | “Lutekenesho lwa mu Binembelo”

BAIBOLO WAAMBA’MBA: “Bintu byonse byanembelwe kala bebinembele’mba tufunjileko, kuba’mba mu kuchinchika kwetu ne mu lutekenesho lwa mu Binembelo twikale na luketekelo.” —LOMA 15:4.

Mwatala Bino Byambo

Baibolo witukosesha na byambo bya lutundaiko bitukwasha inge twalefulwa. Kabiji Baibolo witubuula’mba katatakatu makatazho onse o tupitamo akapwe.

Bino Byambo byo Byakonsha Kwimukwasha

Atweba bonse tupita mu makatazho; bino aba baji na binyenge bekala na makatazho avula bingi. Baibolo wakonsha kwitukwasha byepi?

Baibolo witukwasha kwikala na milanguluko yawama. (Filipai 4:8) Kinetu witubuula byambo bya lutundaiko bitukwasha kuyuka bya kuba na makatazho etu.—Salamo 94:18, 19.
Baibolo witukwasha kuleka kwikala na ndangulukilo ya kuba’mba kechi twanema ne.—Luka 12:6, 7.
Mashimikila avula a mu Baibolo etukwasha kushiinwa’mba kechi tuji bunke ne, ne kuba’mba Lesa aye Mulenga wetu wituyuka bulongo.—Salamo 34:18; 1 Yoano 3:19, 20.
Baibolo walaya’mba Lesa ukafumyapo makatazho onse. (Isaya 65:17; Lumwekesho 21:4) Uno mulaye witukwasha kutwajijila kuchinchika inge tubena kupita mu makatazho.

Baibolo byo Abena Kukwasha Bantu Jessica

Binyenge Binkatazha

“Byo najinga na myaka 25, naakamwanga bingi kabiji ku kipatela bantaine na kikola kya binyenge. Milanguluko ya bintu byatama byo napichilemo kala yangyanjishanga bingi. Badokotala bambujile’mba najinga na binyenge na mambo a bintu byatama byo napichile mu bwikalo bwami byo navulukanga. Kununga pa kutoma muchi, nafwainwe ne kwisambanga na muntu wakunkwasha kuleka kwikala na ndangulukilo yatama.”

Binkwasha Baibolo

“Inge napopomenwa bingi, nkankalwa bya kuba, ngikala na bijikila byavula kabiji nkankalwa kulaala. Inge bwaila, milanguluko yatama ivula bingi kabiji impezha kalango. Pa Salamo 94:19 paamba’mba Lesa witutekenesha ne kwitusangajika inge bijikila bituvujila. Onkao mambo, nalamine Baibolo ne buku mo nemba Binembelo bya lutundaiko kwipi na mwanya. Inge nakankalwa kulaala, natanganga Binembelo bimo bya mu Baibolo byankwashanga kwikala na milanguluko yawama.

“Baibolo witutundaika kuleka kulanguluka pa bintu byapusanako na bikeba Lesa. Kala nalangulukanga’mba kafwako byonji, kechi nanema ne, kabiji kafwako wantemwa ne. Bino nafunda’mba ino ndangulukilo yapusana na byaamba Baibolo. Mambo Baibolo umwesha’mba Lesa wa butemwe kabiji Shetu wa kifyele wituta muchima pa muntu pa muntu. Mu kuya kwa kimye nalekele kwikala na milanguluko yatama. Nafunda kwimona byonka Lesa byo amona. Kuba bino kwankwasha kuleka kwikala na milanguluko yatama.

“Mbena kutengela kimye milanguluko yatama ne makatazho onse byo akapwa. Kuyuka’mba binyenge byonse bikapwa kumpa bulume bwa kuchinchika makatazho o mpitamo ne kwikala na luketekelo lwawama lwa kulutwe.”