3 | Funjilai ku Bantu bo Banemba mu Baibolo

BAIBOLO WATONGOLA . . . Banabalume ne banabakazhi bakishinka bajinga “byonka byo tuji.”—YAKOBA 5:17.

Mwatala Bino Byambo

Mu Baibolo muji mashimikila a banabalume ne banabakazhi bapichile mu bintu byapusana pusana. Inge ke tutange ano mashimikila, twakonsha kutaana umo wapichilepo mu bintu byo tubena kupitamo.

Bino Byambo byo Byakonsha Kwimukwasha

Atweba bonse tukeba bantu kuyuka bintu byo tubena kupitamo. Kabiji tukebesha bino inge tubena kupita mu makatazho a mu milanguluko. Inge ke tutange mashimikila a bantu bo banemba mu Baibolo, twakonsha kutaana umo wapichile mu bintu byo tubena kupitamo. Akino kitulengela kuyuka’mba bakwetu nabo bapichile mu makatazho o tubena kupitamo ne kuba’mba kechi tuji bunke ne.

Mu Baibolo muji byambo byavula byaambile bantu bapichilenga mu makatazho. Nanchi mwakilangulukapo’mba: ‘Kechi nsakukonsha kutwajijila nenyi’? Abino byo biumvwine Mosesa, Elaija ne Davida.—Kubala 11:14; 1 Bamfumu 19:4; Salamo 55:4.
Baibolo waamba pa mwanamukazhi wa jizhina ja Hana “wajinga na bulanda bukatampe” mambo kechi wasemenepo mwana ne, kabiji mpaji nanji wamwendelekangatu kimye kyonse.—1 Samwela 1:6, 10.
Baibolo waamba pa mwanamulume wa jizhina ja Yoba wapichile mu makatazho o twakonsha kupitamo. Wapichile mu makatazho avula bingi kabiji nangwa kya kuba wajinga na lwitabilo, waambile’mba: “Nashikwa bumi bwami; kechi mbena kukeba kutwajijila kwikala na bumi ne.”—Yoba 7:16.

Kufunda pa bano bantu bo banemba mu Baibolo byo baubile na makatazho o bapichilengamo, kwitupa bulume bwa kuchinchika makatazho o tubena kupitamo.

Baibolo byo Abena Kukwasha Bantu Kevin

Kikola kya Bukonye Kinkatazha

“Bantaine’mba nji na kikola kya bukonye byo kwashajiletu pacheche’mba mfikizhe myaka ya kusemwa 50. Bimye bimo ndanguluka’mba nakonsha kupwisha makatazho onse akonsha kummwekela. Kabiji bimye bikwabo ndanguluka’mba kyawamatu ne kufwa.”

Binkwasha Baibolo

“Muntu umo ye banemba mu Baibolo wapichile mu bintu byo mpitamo ke mutumwa Petelo. Walengele mambo amulengejile kulanguluka’mba kechi wanema ne. Pa kuba’mba aleke kulanguluka bino, wapwanañananga na balunda bamutele muchima. Inge kikola kya bukonye kyatendeka, ñumvwa kutama ku muchima na mambo a bumbulwakulumbuluka bwami kabiji ndanguluka’mba kechi nanema ne. Nafunda kwi Petelo kutwajijila kupwanañana na balunda bantundaika kutwajijila kuchinchika.

“Muntu mukwabo ye banemba mu Baibolo untekenesha bingi ke Mfumu Davida. Walefulwanga na mambo bintu byo apichilengamo kabiji waumvwanga bibi ku muchima inge wavuluka mambo o alengele kala. Ndanguluka’mba wapichile mu makatazho o mbena kupitamo mambo bimye bimo ñamba nangwa kuba bintu bindengela kwilangulusha. Byambo byaambile Davida biji mu Salamo 51 bintekenesha bingi. Pa kyepelo 3 Davida waambile’mba: ‘Nayukishatu bulongo mizhilulwila yami, kabiji mambo ami aji ku meso ami kimye kyonse.’ Abino byo byo neumvwa inge nalefulwa, mambo kinkatazha bingi kulanguluka’mba nanema. Ndanguluka ne pa byambo byaambile Davida pa kyepelo 10 bya kuba’mba: ‘Lengai mwi amiwa muchima watoka, kabiji bikai mwi amiwa milanguluko ipya, yashikimana.’ Ñingijisha bino byambo kubuula Lesa amba ankwashe kulanguluka’mba nanema. Kabiji kyepelo 17 kintekenesha bingi, kyaamba’mba: ‘Anweba Lesa, kechi mukakana muchima walajika kabiji wa bulanda ne.’ Akino kyepelo kinkwasha kushiinwa’mba Lesa wantemwa.

“Kuta muchima pa bantu bo banemba mu Baibolo ne pa bintu byampa Lesa, kunkosesha ne kumpa luketekelo lwa kulutwe. Kushiinwa’mba milaye iji mu Baibolo ikafika kunkwasha kutwajijila kuchinchika.”