Bya Kuba pa Kwikala mu Mutende mu Ntanda Muji Nkondo ne Malwañano
Ba Gary bajinga kala bashilikale baambile’mba: “Saka nkyangye kutendeka kufunda Baibolo, kechi nayukile ene mambo malwañano, nshiji ne makatazho o byavujila bibye mu ntanda ne. Bino luno nji na mutende wa mu milanguluko. Nayuka’mba Yehoba Lesa ukalula ino ntanda kwikala yawama kabiji ya mutende.”
Bantu bavula bamba byonkatu byaamba ba Gary. Akimonai Baibolo byo akwasha bantu bavula.
BAIBOLO WAAMBA’MBA: “Anweba Yehoba mwawama kabiji mwaswila jimo kulekela mambo.”—Salamo 86:5.
BAIBOLO WANKWASHA: Ba Wilmar bekala ku Colombia baambile’mba: “Akino kyepelo kyankwasha bingi kuyuka’mba Yehoba wa lusa. Kabiji nashiinwa kuba’mba waswa kundekelako mambo ami onse o nalengele byo nevwangile mu nkondo.”
BAIBOLO WAAMBA’MBA: “Amiwa mbena kulenga meulu apya ne ntanda ipya; kabiji bintu bya kala kechi bakebivulukapo jibiji ne, kabiji kechi bikeyapo jibiji mu michima yabo ne.”—Isaya 65:17.
BAIBOLO WANKWASHA: Ba Zafirah bekala ku United States baambile’mba: “Amiwa nkolwa kikola kya ku bongo ne bijikila na mambo a bintu byatama byo napichilemo byo najinga mushilikale. Bino kino kinembelo kyankwasha kuyuka’mba katatakatu Yehoba akafumyepo bintu byonse byatama binkatazha ku muchima. Kechi nkebivulukepo jibiji ne. Akino kintu byo kikawamapo!
BAIBOLO WAAMBA’MBA: “Mu kimye kya bukalama bwanji baoloka bakekalanga bulongo, ne mutende ukavula moba onse kufikatu ne ñondo byo akabula kwikalako.”—Salamo 72:7.
BAIBOLO WANKWASHA: Ba Oleksandra bekala ku Ukraine baambile’mba: “Abino byambo nebilangulukapo kimye kyonse. Mambo nayuka’mba katatakatu Yehoba akafumyepo nkondo ne bintu byonse byatama bifumamo. Kabiji kechi tukakamwapo jibiji pa kuzhikijilwa kwa balongo betu ne balunda netu ne.”
BAIBOLO WAAMBA’MBA: “Bantu benu bafwa bakekala na bumi jibiji. . . . Buukai ne kubijika na lusekelo, anweba muji mu maloba!”—Isaya 26:19.
BAIBOLO WANKWASHA: Ba Marie bekala ku Rwanda baambile’mba: “Balongo bami bavula bebepayile mambo bajinga ba Tutsi. Bino kino kyepelo kyankwasha kushiinwa’mba balongo bami bafwa nkebamona jibiji. Kashika mbena kutengela bingi kukomvwa mawi abo a lusekelo byo bakebasangula.”
BAIBOLO WAAMBA’MBA: “Kwashalatu pacheche, babi kechi bakekalako ne . . . Pakuba bakimote bakaswana ntanda, kabiji bakasangalelanga mu kuvula kwa mutende.”—Salamo 37:10, 11.
BAIBOLO WANKWASHA: Ba Daler bekala ku Tajikistan baambile’mba: “Nangwa kya kuba nkondo yapwa, bino nshiji ne bambanzhi ko bakiji. Abino byepelo byankwasha kuchinchika bingi. Yehoba umona bintu byonse ne byo mbena kupitamo. Witulaya’mba katatakatu makatazho onse akapwe kabiji kechi tukeavulukapo jibiji ne.”
Bantu bo twaambapo mu kino kyamba kya usopa ke Bakamonyi ba kwa Yehoba bo bakwasha ku Baibolo bya kutaana mutende. Bafunda bya kukana misalululo, kutemwatu kyalo kyabo, mulaka wabo ne kushikwatu bantu bakwabo. (Efisesa 4:31, 32) Bakamonyi ba kwa Yehoba kechi bevwanga mu bya ino ntanda ne. Kabiji kechi baya ku nkondo ne.—Yoano 18:36.
Kabiji Bakamonyi ba kwa Yehoba bekwasha mulwabo abo bene na bene. (Yoano 13:35) Ba Oleksandra bo twaambapo peulupo, bayijile pamo na kolojabo wamukazhi ku kyalo kingi na mambo a kuchina nkondo. Baambile’mba: “Byo twapichile ku mupaka wa kyalo mo twanyemejilenga, twamwene Bakamonyi ba kwa Yehoba saka babena kwitupembelela kwitutambwila. Bukwasho bwabo bwitulengejile kuyuka bya kwikala mu kyalo kingi byo twajinga bipuluka.”
Tubena kwimwita kwiya na kutanwa ku kupwila kwetu ko tufunjila byaamba Baibolo pa bwikalo bwa mutende ne bya kwingijisha bintu byo tufunda. Tubena kwimutundaika namba yai pa keyala wetu wa jw.org pa kuba’mba mumonepo mpunzha iji kwipi na ko mwikala. Nangwa buulaipo Kamonyi wa kwa Yehoba umo kwimufunjishanga Baibolo kwingijisha buku wa kuba’mba Mukekala Myaka ne Myaka!