Ene Mambo o Tusanchila Yehoba pa Kwitulekelako Mambo

1-2. Mu ñanyi jishinda bantu mo baikejile nobe nsongwalume ye baambapo mu jifuka jitanshi?

FWANYIKIZHAI nsongwalume umo ye bakomesha mu kisemi kinonshi. Juba jimo kwamweka kyatama. Bansemi banji bafwa mu mapuso a pa mukwakwa. Kino kyamuletela bingi bulanda kabiji kuji ne bikwabo byatama byo bamubuula. Bamubuula’mba bansemi banji baingijishe mali onse ne kwitwezha mu nkongole ikatampe. Mu kifulo kya kuswana bunonshi bwa kisemi, aye waswanako nkongole. Kabiji bantu ko bakongwele mali bakeba’mba bebabwezhezhe nkongole yabo. Pano bino, ino nkongole yabaya bingi kabiji kechi ukakonsha kwiibwezha ne.

² Twakonsha kwamba’mba ne atweba tuji nobe uno nsongwalume. Bansemi betu batanshi ba Adama ne Evwa bajinga balumbuluka kabiji baikelenga mu Paladisa wawama bingi. (Nte. 1:27; 2:7-9) Bakonsheshe kwikala bwikalo bwawama myaka ne myaka. Pano bino, bintu byonse byapimpwilwe. Bebapangile mu Paladisa kabiji luketekelo lwabo lwa kwikala myaka ne myaka lwapwijile pa mpuki. Ñanyi buswanyi bo bashijiile baana babo? Baibolo witubuula’mba: “Byonkatu bundengamambo byo bwatwelele pano pa ntanda mu muntu umo [Adama], ne lufu nalo lwaishijile mu bundengamambo, byonkabyo lufu lwakumbene ku bantu bonse mambo bonse balengele mambo.” (Loma 5:12) Kya buswanyi Adama kyo etushijiile ke bundengamambo bwitulengela kufwa. Buno bundengamambo bo twaswana buji nobe nkongole ikatampe kabiji kafwako muntu nangwa umo wakonsha kwiibwezha ne.​—Sala. 49:8.

3. Mambo ka bundengamambo bwetu o bebwambilapo’mba buji nobe “nkongole”?

³ Mu Baibolo, bundengamambo bwetu bebwambapo’mba buji nobe “nkongole.” (Mat. 18:32-35) Inge twalenga mambo, kiji nobe tuji na nkongole kwi Yehoba. Yehoba ukeba’mba tubwezhe nkongole ya bundengamambo bwetu. Ino nkongole inge babula kwiibwezha, yafwainwa kupwatu inge twafwa.​—Loma 6:7, 23.

4. (a) Kwa kubula bukwasho bwa Yehoba, ñanyi kintu kyakonsha kumwekela bandengamambo bonse? (Salamo 49:7-9) (b) Mu Baibolo kyambo kya kuba’mba “bundengamambo” kilumbulula ka? (Monai kakitenguluzha ka kuba’mba “Bundengamambo.”)

⁴ Nanchi twakonsha kubwezha bintu byonse byaelele Adama ne Evwa nyi? Kechi twakonsha atweba bene na bulume bwetu ne. (Tangai Salamo 49:7-9.) Kwa kubula bukwasho bwa Yehoba, kechi twakonsha kwikala na luketekelo lwa kukekala myaka ne myaka nangwa kusangulwa ne. Kabiji inge tufwatu nobe banyama kwa kubula kwikala na luno luketekelo.​—Sapwi. 3:19; 2 Pe. 2:12.

5. Shetu wa butemwe waubapo byepi pa bundengamambo bo twaswana? (Monai kya pa nkupiko.)

⁵ Akilangulukai pa nsongwalume ye baambapo ku ntendekelo, wakonsha kumvwa byepi inge munonshi umo wipana kubwezha nkongole yanji yonse? Kwa kubula nangwa kuzhinaukatu ne, uno nsongwalume wakonsha kusanchila bingi munonshi pa buno bupe. Po pamotu, Shetu aye Yehoba witupa bupe bukatampe bingi bwa kufumyapo bundengamambo bo twaswaine kwi Adama. Yesu walumbulwile kino kishinka’mba: “Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.” (Yoa. 3:16) Kunungapo, bonka buno bupe bwitulengela kwikala na bulunda bwawama ne Yehoba.

6. Ñanyi byambo byo baingijisha mu Baibolo byo tusakwisambapo mu uno mutwe kabiji mambo ka?

⁶ Twakonsha kumwenamo byepi mu buno bupe bwanema ne kulekelwa mambo etu nangwa’mba “nkongole”? Mukumbu wa buno bwipuzho uji mu byambo byo baingijisha mu Baibolo bya kuba’mba kupwanya, kufuta mambo, mulambo wa mfuto, bukuzhi, kukuula ne kutelwa waoloka. Mu uno mutwe, tusakwisamba pa bino byambo byonse byo bilumbulula. Inge ketulanguluke pa bino byambo byo bilumbulula, tukamusanchilanga bingi Yehoba pa kuyuka kine kintu kyamulengejile kwitulekelako mambo.

KYALENGEJILE: KWITUPWANYA KWI YEHOBA

7. (a) Ñanyi kintu kikwabo Adama ne Evwa kyo baelele? (b) Byo tuji baana ba kwa Adama ne Evwa, ñanyi kintu kyo tukebesha? (Loma 5:10, 11)

⁷ Adama ne Evwa baelele luketekelo lwabo lwa kwikala myaka ne myaka kabiji baonawine bulunda bwabo bwanema ne Shabo aye Yehoba. Patanshitu, Adama ne Evwa bajinga mu kisemi kya Lesa. (Luka 3:38) Pano bino, byo basatukijile Yehoba, bebapangilemo mu kisemi kyanji saka bakyangye kutendeka kusema baana. (Nte. 3:23, 24; 4:1) Onkao mambo, byo tuji baana babo, Yehoba wafwainwa kwitupwanya kwi aye. (Tangai Loma 5:10, 11.) Mu jishinda jikwabo, kino kilumbulula’mba twafwainwa kwikala na bulunda bwawama ne Yehoba. Kwesakana na buku umo, kyambo kya Kingiliki kyatuntululwa’mba “kupwanya” kyakonsha ne kulumbulula “kwalula mulwanyi obe kwikala ke mulunda.” Akikilangulukaipotu, Yehoba watendekejilepo kwitupwanya kwi aye kuba’mba twikale balunda nanji. Waubile byepi bino?

BYO ANENGEZHEZHE: KUFUTA MAMBO

8. Bino byambo bilumbulula ka (a) kufuta mambo? (b) mulambo wa mfuto?

⁸ Kufuta mambo ke lunengezho Yehoba lo abikileko lwa kulengela bandengamambo kwikala jikwabo na bulunda bwawama ne aye. Kyavwangamo kupana kintu kyaesakana na kintu kyaonaikile, ko kuba’mba kubwezha kintu kyaelekele nangwa kyaonaikile. Binembelo bya Kingiliki bya Bwina Kilishitu byaingijisha kyambo kya kuba’mba mulambo wa mfuto, kyaesakana na kyambo kya kuba’mba “kufuta mambo.” (Loma 3:25) Mulambo wa mfuto witulengela kwikala na mutende wa Lesa ne bulunda bwawama ne aye.

9. Ñanyi lunengezho Yehoba lo abikileko mu moba a bena Isalela lwa kwibalekelako mambo abo?

⁹ Pa kuba’mba bena Isalela bekale na bulunda bwawama ne Yehoba, mu moba abo wabikileko lunengezho lwa kwibalekelako mambo. Mu Isalela, Juba ja Kufuta Mambo jaikalangako pa mwaka pa mwaka. Pa jino juba, ñanga mukatampe wapananga bitapisho bya banyama kuba’mba balekeleko bantu mambo. Nangwa byonkabyo, bitapisho bya banyama kechi byakonsheshe kufumyapo mambo a bantu ne, mambo banyama kechi banema kukila bantu ne. Pano bino, bena Isalela balapila byo bapananga bitapisho bya banyama kwesakana na bibambijile Yehoba, aye wibalekelangako mambo abo. (Hebe. 10:1-4) Kunungapo, luno lunengezho ne milambo ya bubi yo bapananga kimye kyonse yavululangamo bena Isalela kuba’mba bajinga bandengamambo ne kuba’mba bakebewenga kintu kyafwainwe kwibakuula ku bundengamambo myaka ne myaka.

10. Ñanyi lunengezho Yehoba lo abikileko lwa kukuula bantu ku bundengamambo?

¹⁰ Yehoba waikejile jimo na lunengezho lwa kukuula bantu ku bundengamambo. Wapaine Mwananji ye atemenwe bingi kuba’mba “[elambule] jimotu pa kufumyapo bundengamambo bwa bantu bavula.” (Hebe. 9:28) Yesu wapaine “bumi bwanji kwikala bukuzhi bwa kukuula bavula.” (Mat. 20:28) Bukuzhi bo bu ka?

KINTU KYO APAINE: BUKUZHI

11. (a) Kwesakana na Baibolo, bukuzhi bo bu ka? (b) Muntu wa mutundu ka wakonsheshe kupana buno bukuzhi?

¹¹ Kwesakana na Baibolo, bukuzhi ke kintu kyo bapana pa kuba’mba bafuute mambo ne kupwanya bantu.a Kwesakana na mumwena Yehoba bintu, kino kibena kulumbulula kubwezha kintu kyaelekele. Mu ñanyi jishinda? Vulukai kuba’mba Adama ne Evwa baelele bumi bwalumbuluka ne luketekelo lwa kwikala myaka ne myaka. Onkao mambo, bukuzhi bwafwainwa kwesakana na kintu kyaelekele. (1 Timo. 2:6) Muntu wakonsheshetu kupana buno bukuzhi ke muntu wakoma kabiji (1) walumbuluka; (2) wakonsheshe kwikala myaka ne myaka pano pa ntanda; ne (3) wipaine kupana bumi bwanji kwikala kitapisho kyetu. Bumi bwa uno muntu bo bwakonsheshetu kukuula nangwa kubwezha bumi bwaelekele.

12. Mambo ka Yesu o apanyijile kitapisho kyakebewenga?

¹² Akilangulukai pa bintu bisatu byalengejile Yesu kupana bukuzhi. (1) Aye wajinga walumbuluka kabiji “kechi walengelepo mambo ne.” (1 Pe. 2:22) (2) Na mambo a bino, wakonsheshe kwikala myaka ne myaka pano pa ntanda. (3) Wipaine kufwa ne kupana bumi bwanji na mambo a atweba. (Hebe. 10:9, 10) Muntu walumbuluka aye Yesu waesakene pamo na muntu mutanshi Adama saka akyangye kulenga mambo. (1 Ko. 15:45) Onkao mambo, kupichila mu lufu lwanji, Yesu wafuuchile mambo alengele Adama ko kuba’mba wabwezhezhe kintu kyaelele Adama. (Loma 5:19) Mu jino jishinda, Yesu waikele “Adama wapelako.” Kafwako muntu mukwabo walumbuluka wafwainwe kwiya ne kupana kyaelele Adama ne. Yesu wafwile “jimotu.”​—Hebe. 7:27; 10:12.

13. Ñanyi lupusano luji pakachi ka kufuta mambo ne bukuzhi?

¹³ Pano ñanyi lupusano luji pakachi ka kufuta mambo ne bukuzhi? Kufuta mambo ke kyubilo Lesa kyo abwezhezhamo bulunda bwanji bwawama na bantu. Bukuzhi ke kintu Lesa kyo apaine pa kuba’mba afuute mambo a bantu. Kino kintu kyaimenejilengako mashi a kwa Yesu aichikile pa kuba’mba tulekelwe mambo etu.​—Efi. 1:7; Hebe. 9:14.

BYAFUMAMO: BANTU BAKUULWA NE KUTELWA’MBA BAOLOKA

14. Ñanyi bintu byo tusakwisambapo, kabiji mambo ka?

¹⁴ Ñanyi bintu byawama byafuma mu lunengezho lwa kufuta mambo? Baibolo waingijisha byambo byapusana pusana kumwesha bintu byawama byafumamo. Nangwa kya kuba bino byambo byalumbulula bintu bipashako, pano bino, byambo byonse kimo kimo byalumbulula bulongo lunengezho lwa kufuta mambo lulengela bantu kwibalekelako mambo kwi Yehoba. Kabiji byo tusakupitulukanga mu bino byambo, tusakumona byo bitukwasha atweba bonse pa muntu pa muntu.

15-16. (a) Mu Baibolo, kyambo kya kuba’mba “kukuula” kilumbulula ka? (b) Kwitukasulula ku bundengamambo ne lufu kwitulengela kuba ka?

¹⁵ Mu Baibolo, kyambo kya kukuula kilumbulula kukasulula muntu nangwa kumubingisha na mambo a mali o bapana nangwa’mba bukuzhi. Mutumwa Petelo walumbulwile kino kishinka kuba’mba: “Mwayuka’mba kechi bemukasulwile [mu Kingiliki, “bemukuujile; bemupokolwele”] ku bwikalo bwenu buncha bo mwatambwile ku bashakulu benu na bintu bibola, na siliva nangwa na ngolode ne. Bino bemukasulwile na mashi anema aji nobe mashi a mukooko wabula bulema ne biko, ko kuba’mba a Kilishitu.”​—1 Pe. 1:18, 19; tubyambo twa munshi.

¹⁶ Na mambo a kitapisho kya bukuzhi, betukasulula ku bundengamambo ne lufu bitulengela kumanama. (Loma 5:21) Onkao mambo, twayuka kine kintu kyafwainwa kwitulengela kusanchila Yehoba ne Yesu pa kwitukuula kupichila mu mashi anema nangwa’mba bumi bwa kwa Yesu.​—1 Ko. 15:22.

17-18. (a) Kutelwa’mba baoloka kulumbulula ka? (b) Ñanyi bintu byawama byo tumwenamo mu kutelwa baoloka?

¹⁷ Kutelwa Baoloka kulumbulula’mba betubingisha ku mambo etu ne kuba’mba mambo etu beafuuta nangwa’mba twalekelwa mambo. Kuba bino kechi kulumbulula’mba Yehoba wazhilulula mizhilo yaamba pa bunchibamambo bwanji ne. Kechi witutela’mba twaoloka na mambotu a byubilo byetu byawama nangwa kutalapotu pa mambo etu ne. Pano bino, na mambo a lwitabilo lwetu mu lunengezho lwa kufuta mambo ne bukuzhi bo bapaine, kino kyalengela Yehoba kwitulekelako nkongole yetu nangwa’mba mambo etu.​—Loma 3:24; Nga. 2:16.

¹⁸ Kutelwa baoloka kulumbulula ka kwi atweba? Aba bo basala kulama pamo ne Yesu mwiulu bebatela kala amba baoloka kwikala baana ba Lesa. (Titu. 3:7; 1 Yoa. 3:1) Bebalekelako mambo abo ne kumweka nobe kechi ajingako ne, kabiji bafikilamo kwikala mu Bufumu. (Loma 8:1, 2, 30) Aba baji na luketekelo lwa kukekala myaka ne myaka pano pa ntanda bebatela’mba baoloka kwikala balunda ne Lesa kabiji mambo abo alekelwa. (Yako. 2:21-23) Ba mu jibumba jikatampe bakapuluka pa Amagedonyi, baji na luketekelo lwa kukekala myaka ne myaka. (Yoa. 11:26) “Baoloka” ne “babula koloka” bafwa, bonse bakebasangula. (Byu. 24:15; Yoa. 5:28, 29) Pa kupitapo kimye bakalume ba Yehoba bonse ba lukookelo pano pa ntanda bakekala “na bwana bwa bene bwa lukumo lwa baana ba Lesa.” (Loma 8:21) Kino ke kintu kyawama bingi kyo tukamwenamo na mambo a lunengezho lwa kufuta mambo, ko kuba’mba kwitupwanya kwikala jikwabo baana balumbuluka ba Shetu aye Yehoba.

19. Bwikalo bwetu bwapimpulwa byepi na mambo a bitubila Yehoba ne Yesu? (Monai ne kakitenguluzha ka kuba’mba “Byo Kilumbulula kwi Atweba.”)

¹⁹ Kwambatu kine, ne atweba twajinga nobe nsongwalume ye baambapo ku ntendekelo waelele bintu byonse ne kuswana nkongole ikatampe yo akonsheshe kubula kubwezha. Pano bino, Yehoba witukwasha. Bwikalo bwetu bwapimpulwa na mambo a lunengezho lwa kufuta mambo ne bukuzhi. Kwitabila mwi Yesu Kilishitu kwitulengela kwitukuula nangwa’mba kwitukasulula ku bundengamambo ne lufu. Kabiji mambo etu beafuuta ne kumweka nobe kechi ajingako ne. Kabiji kintu kyanema pa byonse ke kya kuba’mba tuji na bulunda bwawama na Shetu wa mwiulu wa butemwe aye Yehoba.

20. Ñanyi kintu kyo tukesambapo mu mutwe walondelapo?

²⁰ Tusanchila bingi Yehoba ne Yesu inge ketulanguluke languluke pa bintu byonse byawama byo betubila. (2 Ko. 5:15) Kwa kubula bukwasho bwabo, inge kechi tuji na luketekelo lwa bintu byawama biji kulutwe ne. Pano nga kwitulekelako mambo kwi Yehoba kulumbulula ka kwi atweba bonse pa muntu pa muntu? Kino kyo kyo tukesambapo mu mutwe walondelapo.