Bya Kwikala Mulunda wa Kine

NANCHI mwakikalapo kala mu lukatazho kwakubula muntu wa kwimukwasha nenyi? Tubena kwikala mu “bimye byakatazha” kabiji twakonsha kulefulwa ne kwikala na binyenge. (2 Timo. 3:1) Nangwa byonkabyo, kuji bantu bakonsha kwitukwasha inge tubena kupita mu makatazho. Baibolo umwesha patoka’mba balunda ba kine bakonsha kwitukwasha “mu kimye kya bya malwa.”​—Maana 17:17.

BALUNDA BA KINE BYO BAKONSHA KWITUKWASHA

Mutumwa Paulo bamukwashishe mu mashinda avula bingi ku balunda nanji bo ayile nabo mu mwingilo wanji wa bumishonale. (Kolo. 4:7-11) Paulo byo bamukashile mu kaleya mu Loma, balunda nanji baingijilenga mingilo yo abujile kukonsha kwingila aye mwine. Epafolodita wapele Paulo bintu byo akebelenga byamutumijile balongo ne banyenga ba mu Filipai. (Fili. 4:18) Tikikusa watwajile makalata a kwa Paulo mu bipwilo byapusana pusana. (Kolo. 4:7) Na bukwasho bwa balunda nanji, Paulo watwajijile kwingila mwingilo wanji nangwa kya kuba bamukainye kufuma pa nzubo panji ne kumukasa mu kaleya palutwe kacheche. Mwakonsha kwikala byepi mulunda wa kine lelo jino?

Balongo ne banyenga ba mu ano moba bamwesha kuba’mba kyanema bingi kwikala na balunda ba kine. Akilangulukai pa nyenga Elisabet byo bamukwashishe ku painiya wa kimye kyonse wikala mu kyalo kya Spain. Bainanji byo bakolelwe kikola kya kansa, uno nyenga watumijile Elisabet byambo byavula pa foni bya kumutundaika byafumine mu Baibolo. Nyenga Elisabet waambile’mba: “Abino byambo byankoseshenga ne kundengela kuyuka’mba kechi nji bunke ne.”—Maana 18:24.

Twakonsha kukosesha bulunda bwetu na bena Kilishitu bakwetu inge ke twibatundaike kusapwilanga ne kutanwa ku kupwila. Nanchi mwakonsha kusendako mu motoka mulongo nangwa nyenga wakikulumpe kuya na kupwila nangwa mu mwingilo nyi? Inge mwauba bino, mukekosesha anwe bene na bene. (Loma 1:12) Nangwa byonkabyo, bena Kilishitu bamo bakankalwa kwenda kabiji bekalatu pa nzubo. Twakonsha kwikala byepi mulunda wabo wa kine?

IKALAI BALUNDA BA KINE KU BOBA BAKANKALWA KWENDA BEKALATU PA NZUBO

Bena Kilishitu bakwetu bamo bakolwakolwa kabiji bakwabo nabo kuji bintu bikwabo bibalengela kukankalwa kutanwa ku kupwila. Akilangulukai pa mulongo David wakolelwe kansa. Bamupelenga muchi pa bañondo batanu na umo. Mu kikye kimye kyonse, mulongo David ne mukazhanji batanwanga ku kupwila kwingijisha Zoom.

Balunda mu kipwilo bebakwashishe byepi? Jonse inge kupwila kwapwa, balongo ne banyenga bamo bajinga pa Nzubo ya Bufumu besambanga na mulongo David ne mukazhanji Lidia pa Zoom. Kabiji inge ba David ne ba Lidia bakumbulapo pa kupwila, balongo ne banyenga bebatuminanga byambo pa foni bya kwibatundaika. Ñanyi bintu byafuminemo? Ba David ne ba Lidia bashiinwe’mba bebatemenwe ku balongo ne banyenga.

Nanchi twakonsha kunengezha kwingijila pamo mu mwingilo na boba bakankalwa kwenda bekalatu pa nzubo nyi? Twakonsha kupimpulako ñingijilo yetu pa kuba’mba twingilenga nabo mu mwingilo. Kino kimwesha patoka’mba kechi twibalubako ne. (Maana 3:27) Twakonsha kumonapo kimye kya kusapwila nabo kwingijisha makalata nangwa foni. Aba bakankalwa kwenda bakonsha kutanwa ku kusambakana kwa kuya mu mwingilo kwingijisha Zoom. Ba David ne ba Lidia bamwenejilemo bingi mu luno lunengezho. Ba David balumbulwile’mba, “Kutanwa ku mwisambo mwipi wa kuya mu mwingilo pamo na jibumba jetu ja mwingilo ne lulombelo kwitutundaikile bingi.” Kabiji kwesakana na bintu byo biji, pa kimye pa kimye mwakonsha kunengezha na ye mufunjisha Baibolo kuya na kumufunjishisha ku nzubo ya musapwishi ukankalwa kwenda.

Inge ke twingijile pamo na balongo ne banyenga bakankalwa kwenda bekalatu pa nzubo ne kumona byubilo byabo byawama, kino kiketulengela kufwenya kwipi ne abo. Inge kemwingile nabo mu mwingilo wa kusapwila ne kumona byo bengijisha bulongo Mambo a Lesa kufika muntu pa muchima, kino kikemulengela kufwenya bingi kwipi ne abo. Inge kemukwashe bena Kilishitu bakwenu kuba’mba bengijilenga Yehoba bulongo, mukalenga ne balunda bakwabo ba katataka.​—2 Ko. 6:13.

Paulo byo ajinga na makatazho, bamutekeneshe bingi ku mulunda nanji aye Titusa. (2 Ko. 7:5-7) Jino jishimikila jituvululamo kuba’mba kechi twakonsha kutekeneshatu boba baji na makatazho kupichila mu kwibambila byambo bya kwibatundaika ne, bino twakonsha kwibafwakesha ne kumonapo mashinda mo twakonsha kwibakwashisha.​—1 Yoa. 3:18.

IKALAI MULUNDA WA KINE INGE BAKWENU BABENA KWIBAMANYIKA

Balongo ne banyenga yetu mu kyalo kya Russia batwajijila kukwasha bakwabo kabiji byo byo twafwainwa kubanga ne atweba. Akilangulukai pa byamwekejile mulongo Sergey ne mukazhanji Tatyana. Bakapokola byo baishile na kupikita mu nzubo yabo, bebatwajile na kwibatotolwesha. Batendekejilepo kutotolwesha nyenga Tatyana kabiji bamwambijile’mba ayenga ku nzubo. Mulongo Sergey washimikizha’mba: “Ba [Tatyana] byo bafikile pa nzubo, nyenga umo wayile na kwibafwakesha pa nzubo petu. Balunda netu bakwabo bavula baishile kabiji betukwashishe kuwamisha mu kibamba mwapikichile bakapokola.”

Mulongo Sergey wanungilepo’mba: “Kinembelo kya Byambo bya Maana 17:17 nekitemwa bingi mambo kyaamba’mba: ‘Mulunda wa kine umwesha butemwe kimye kyonse kabiji ye mulongo ye wakonsha kuketekela mu kimye kya bya malwa.’ Nemwena kuba’mba abino byambo bya kine kikatakata mu kino kimye kyo babena kwitumanyika mambo kechi nakonsha kuchinchika bunke bwami ne. Yehoba wampa balunda nami bachinchika kabiji bankwasha bingi.”a

Kwambatu kine, tukeba bukwasho bwa balunda netu mu ano moba akatazha bingi. Kabiji tukakebesha bingi bukwasho bwabo mu kimye kya malwa akatampe abena kwiya. Onkao mambo, twayai tutwajijile kwikala mulunda wa kine.​—1 Pe. 4:7, 8.