Ene Mambo Jizhina ja Yehoba o Janemena kwi Yesu

1-2. (a) Ñanyi kintu kyaubile Yesu bufuku saka bakyangye kumwipaya? (b) Ñanyi mepuzho o tusakwisambapo mu uno mutwe?

PAJINGA pa Kina mu kimye kya mabanga, pa Nisanyi 14, mu 33 C.E., kabiji Yesu bajinga pepi kumufutukamo, kumutotolwesha, kumuzhachisha, kumumanyika ne kumwipaya. Po po apwishishetu kuja kijiilo mu kibamba kya peulu pamo na batumwa banji bakishinka. Byo bapwishishe kuja kino kijiilo, Yesu waambijile batumwa banji byambo byapeleleko bya kwibatundaika. Kabiji saka bakyangye kufuma mu kino kibamba kya peulu, Yesu walombele lulombelo lwanema bingi. Mutumwa Yoano wanembele luno lulombelo kabiji lutanwa mu Yoano kitango 17.

² Lulombelo lwalombele Yesu lwitumwesha ñanyi bintu byo atelepo muchima pa kyokya kimye? Luno lulombelo lumwesha byepi bintu Yesu byo anemekele kimye kyo aingijilenga mwingilo wanji pano pa ntanda? Twayai twisambe pa mikumbu ya ano mepuzho.

“NEJISOLOLA JIZHINA JENU KWI ABO”

3. Ñanyi bintu Yesu byo aambile pa jizhina ja Yehoba, kabiji watazhizhe mwepi? (Yoano 17:6, 26)

³ Mu lulombelo, Yesu waambile’mba: “Nejisolola jizhina jenu kwi abo.” Kabiji waambile pa bimye bibiji kuba’mba wasolwele jizhina ja Yehoba ku baana banji ba bwanga. (Tangai Yoano 17:6, 26.) Pano watazhizhe mwepi? Nanchi wasolwele jizhina jo babujile kuyuka nyi? Na mambo a kuba’mba baana ba bwanga ba kwa Yesu bajinga Bayudea, bayukile’mba jizhina ja Lesa Yehoba. Jino jizhina jatanwangamo bimye 7,000 mu Binembelo bya Kihebelu. Onkao mambo, Yesu kechi waambilenga pa jizhina jine ja Lesa ne, pakuba waambilenga pa bilumbulula jino jizhina. Yesu walumbululwile bulongo biji mwine mwina jino jizhina, kuvwangako ne kyaswa muchima wanji, bintu byo auba, byo akoba kulutwe ne byubilo byanji. Yesu ye yenkatu walumbulwile bulongo biji Yehoba.

4-5. (a) Twakonsha kumwesha byepi byo kilumbulula kuyuka jizhina ja muntu? (b) Batumwa ba kwa Yesu bayukile byepi bilumbulula jizhina ja Yehoba?

⁴ Fwanyikizhai kuba’mba mukulumpe umo mu kipwilo kyenu wa jizhina ja David dokotala utumbulañana. Uno mulongo mwamuyuka pa myaka yavula. Onkao mambo, juba jimo byo mwakolwa, bemunyemesha ku kipatela kwingila uno mulongo. Kabiji uno mulongo waingijisha busendwe bwanji kupulusha bumi bwenu. Uno mulongo mukamunemeka ne kumutemwa bingi. Kabiji inge mwaumvwatu jizhina janji, mukavulukanga byo apulwishe bumi bwenu. Kufumatu kyokyo kimye, mukayuka’mba mulongo David kechi mukulumpetu mu kipwilo ne, bino ke dokotala wapulwishe bumi bwenu.

⁵ Kyo kimotu, baana ba bwanga ba kwa Yesu nabo bayukile jizhina ja Yehoba kufumatu ne kala. Nangwa byonkabyo, jino jizhina baishile kwijinemeka bingi na mambo a mwingilo wa kusapwila waingijilenga Yesu. Mambo ka o twaambila bino? Mambo Yesu wamweshanga biji Shanji mu byonse byo aambanga ne byo aubanga. Baana ba bwanga ba kwa Yesu batelekanga ku byafunjishanga Yesu ne byo aubanga na bantu. Kino kibalengejile ‘kuyuka’ bulongo biji Yehoba.​—Yoa. 14:9; 17:3.

“JIZHINA JENU, JO MWAMPA”

6. Mu ñanyi jishinda Yehoba mo apeelejile Yesu jizhina janji? (Yoano 17:11, 12)

⁶ Mu lulombelo lwanji, Yesu walombejileko baana banji ba bwanga amba: “Mwibazhikijilenga na mambo a jizhina jenu jo mwampa.” (Tangai Yoano 17:11, 12.) Nanchi kino kyalumbulwilenga’mba Yesu naye pano usakutelwanga’mba Yehoba nyi? Ine. Yesu byo aambile pa jizhina ja Yehoba, waambile’mba “jizhina jenu.” Onkao mambo, jizhina ja Yehoba kechi jaikele jizhina ja kwa Yesu ne. Pano Yesu watazhizhe mwepi byo aambile’mba bamupa jizhina ja Lesa? Kitanshi, Yesu waambilangako ne kwimenako Yehoba. Waishile pano pa ntanda mu jizhina ja Shanji kabiji waubile bya kukumya byavula bingi kwingijisha jonka jino jizhina. (Yoa. 5:43; 10:25) Kunungapo, jizhina ja kuba’mba Yesu jilumbulula’mba “Yehoba ye Lupulukilo.” Onkao mambo, mu jizhina ja kwa Yesu mwavwangwa ne jizhina ja kwa Yehoba.

7. Lumbululai jishinda Yesu jo aambijilengamo mu jizhina ja Yehoba.

⁷ Na mambo a kuba’mba ntomesha wimenako kalama wa mu kyalo kyanji, wakonsha kwamba byambo bya kwimenako kalama wa mu kyalo kyanji. Onkao mambo, byambo byamba ntomesha bebinemeka bingi mambo bikalatu nobe bebyamba ku mwine kalama. Kyo kimotu, Yesu waimenejilengako Yehoba ne kwamba ku bantu kwingijisha jizhina ja Shanji.​—Mat. 21:9; Luka 13:35.

8. Jizhina ja kwa Yehoba jajinga byepi pe Yesu saka akyangye kwiya pano pa ntanda? (Kulupuka 23:20, 21)

⁸ Yesu byo aji Mambo, wambilako Yehoba kupichila mu kutwala byambo ne mikambizho ku bilengwa bikwabo bya mupashi bya Lesa ne ku bantu. (Yoa. 1:1-3) Kyamweka Yesu ye malaika ye batumine kwi Yehoba kuya na kutangijila bena Isalela byo bajinga mu Kiselebwa. Yehoba byo aambijile bena Isalela kukookela uno malaika, waambile’mba: “Mambo jizhina jami jiji pe aye.”a (Tangai Kulupuka 23:20, 21.) Jizhina ja Yehoba jajinga “pe” Yesu na mambo a kuba’mba wimenako Yehoba kabiji ye mwine uzhijika jizhina ja Shanji.

“TATA TUMBIJIKAI JIZHINA JENU”

9. Jizhina ja Yehoba janemene byepi kwi Yesu? Lumbululai.

⁹ Byonka byo twisambapo kala, nangwatu saka akyangye kwiya pano pa ntanda, Yesu wanemekele bingi jizhina ja Yehoba. O ene mambo bintu byonse Yesu byo aubanga byo ajinga pano pa ntanda o byakunzhile jizhina ja Yehoba. Ku mpelo ya mwingilo wanji, Yesu waambile’mba: “Tata tumbijikai jizhina jenu.” Ponkapotu, Shanji wakumbwile na jiwi jikatampe kufuma mwiulu amba: “Amiwa ne jitumbijika kabiji nkejitumbijika jibiji.”​—Yoa. 12:28.

10-11. (a) Yesu watumbijikile byepi jizhina ja Yehoba? (Monai ne kipikichala.) (b) Mambo ka jizhina ja Yehoba o jafwainwa kuzhijikwa ne kutumbijikwa?

¹⁰ Yesu watumbijikile jizhina ja Shanji. Mu ñanyi jishinda? Jishinda jimo jo aubijile bino ke kusolola byubilo byawama biji na Shanji ne bintu byawama byo oba. Nangwa byonkabyo, mu kutumbijika jizhina ja Yehoba mwavwangilwe byavula. Yesu wafwainwe kumwesha’mba Yehoba kimye kyonse uba byaoloka kabiji jizhina janji jazhila.b Yesu wamwesheshe’mba kino kyanema bingi byo afunjishenga baana banji ba bwanga bya kulomba. Waambile’mba: “Tata wetu wa mwiulu, jizhina jenu jizhile.”​—Mat. 6:9.

¹¹ Mambo ka jizhina ja Yehoba o jafwainwa kuzhijikwa ne kutumbijikwa? Ke na mambo a kuba’mba mu bujimi bwa Edena, Satana Diabola walengulwile ne kwamba bya bubela pe Yehoba Lesa. Satana waambile’mba Yehoba wa bubela kabiji wataine ba Adama ne Evwa bintu byawama. (Nte. 3:1-5) Byo aubile bino, Satana walumbulwilenga’mba jishinda Yehoba jo obilamo bintu kechi jawama ne. Byambo bya bubela byaambile Satana byatamishe jizhina ja Yehoba. Kabiji kulutwe mu moba ajingako Yoba, Satana waambile’mba bantu bonse bengijila Yehoba bamwingijila na mambo a kuba’mba wibobila bintu byawama. Kabiji Satana waambile’mba kafwako muntu nangwa umo watemwa Yehoba wakonsha kutwajijila na kumwingijila inge ubena kupita mu makatazho ne. (Yoba 1:9-11; 2:4) Pakebewenga kupita kimye kyabaya pa kuba’mba kiyukanyikwe waambilenga kine, pe Yehoba ne Satana.

“MPANA BUMI BWAMI”

12. Ñanyi bintu Yesu byo epaine kuba na mambo a kuba’mba watemenwe jizhina ja Yehoba?

¹² Na mambo a kuba’mba watemenwe bingi Yehoba, Yesu waingijile papelejile bulume bwanji kuzhijika ne kutumbijika jizhina ja Yehoba. Yesu waambile’mba: “Mpana bumi bwami.” (Yoa. 10:17, 18) Ibyo, Yesu wipaine kufwila jizhina ja Yehoba.c Bantu batanshi abo ba Adama ne Evwa, bamukaine Yehoba ne kulondela Satana. Kupusanako, Yesu aye wipaine kwiya pano pa ntanda kabiji wamwesheshe byo atemenwe Yehoba. Yesu waubile bino byo atwajijile kwikala wa kishinka mu bwikalo bwanji bonse. (Hebe. 4:15; 5:7-10) Watwajijile kwikala wa kishinka kufikatu ne byo afwile pa kichi kya lumanamo. (Hebe. 12:2.) Byo aubile bino, wamwesheshe amba watemwa bingi Yehoba ne jizhina janji.

13. Mambo ka Yesu o afikijilemo kushinawina Satana amba wa bubela? (Monai ne kipikichala.)

¹³ Mu bwikalo bwanji bonse, Yesu wamwesheshe patoka kuba’mba Satana wa bubela, kechi Yehoba ne. (Yoa. 8:44) Yesu wayukile bingi bulongo biji Yehoba kukila muntu yense wakikalapo kala pano pa ntanda. Inge mwajingapo bukine mu byambo byonse Satana byo aambile pe Yehoba, Yesu inge wayukile. Pano bino, Yesu watwajijile kuzhijika jizhina ja Yehoba. Nangwatu byo kyamwekele nobe Yehoba wamushatu bunke, Yesu wafuukwilepo kutwajijila kwikala wa kishinka kufikatu ne ku lufu, kukila kusatukila Shanji.​—Mat. 27:46.d

“NAPWISHA KWINGILA MWINGILO YE MWAMPELE”

14. Yehoba wapesheshe byepi bukishinka bwa kwa Yesu?

¹⁴ Mu lulombelo lo alombele bufuku saka akyangye kufwa, Yesu waambilemba: “Napwisha kwingila mwingilo ye mwampele.” Waketekejile’mba Yehoba ukamupesha na mambo a kutwajijila kwikala wa kishinka. (Yoa. 17:4, 5) Yesu waubile bingi bulongo pa kuketekela mwi Shanji, mambo Yehoba kechi wamulekele kwikajijila mu kilende ne. (Byu. 2:23, 24) Wasangwile Yesu ne kumupa kifulo kikatampe mwiulu. (Fili. 2:8, 9) Mu kuya kwa kimye, Yesu waikele Mfumu wa Bufumu bwa Lesa. Ñanyi bintu bikoba buno Bufumu? Byambo bikwabo biji mu lulombelo lwa Nkambo byaamba’mba: “Kyaswa muchima wenu kyubiwe pano pa ntanda, byonka byo kibena kubiwa mwiulu.”​—Mat. 6:10.

15. Ñanyi bintu bikwabo bikoba Yesu?

¹⁵ Katatakatu Yesu akalwe nkondo na balwanyi ba Lesa ne konauna babi pa Amagedonyi. (Lum. 16:14, 16; 19:11-16) Panyuma ya bino, ukataya Satana mu “kalengwa kabula kupela,” mo akekala kwakubula kuba kintu kiji kyonse ne. (Lum. 20:1-3) Yesu ukabwezha mutende ne kukwasha bantu kwikala balumbuluka mu Myaka Kiumbi Kimo ya Bukalama bwanji. Ukasangula bantu bafwa. Kabiji ukaalula ino ntanda yonse kwikala Paladisa. Kyaswa muchima wa Yehoba kikobiwa.​—Lum. 21:1-4.

16. Ñanyi bintu bikamweka ku mpelo ya Bukalama bwa Myaka Kiumbi Kimo?

¹⁶ Ñanyi bintu bikamweka ku mpelo ya Bukalama bwa Myaka Kiumbi Kimo? Bundengamambo ne bumbulwakulumbuluka kechi bikekalako jibiji ne. Bantu kechi bakakebewanga kulomba lulekelo lwa mambo kwingijisha bukuzhi ne. Kabiji kechi bakakebewanga Yesu kwikala ñanga mukatampe wa kwibemenako ne. “Mulwanyi wapelako, ko kuba’mba lufu [lwaletele Adama] bakeluzhiya.” Bantu bafwa bakebasangula. Bantu bonse bakekalanga pano pa ntanda bakekala balumbuluka.​—1 Ko. 15:25, 26.

17-18. (a) Ñanyi kintu kikwabo kikamweka ku mpelo ya Bukalama bwa Myaka Kiumbi Kimo? (b) Ñanyi kintu kikoba Yesu inge myaka yanji ya kulama yapwa? (1 Kolinda 15:24, 28) (Monai ne kipikichala.)

¹⁷ Ñanyi kintu kikwabo kikamweka ku mpelo ya Bukalama bwa Myaka Kiumbi Kimo? Pa kyokya kimye, kukamweka kintu kyanema bingi. Mambo akolomwene Satana aamba pa kuzhijika jizhina ja Yehoba akapwa. Mu Bujimi bwa Edena, Satana waambile’mba Yehoba wa bubela kabiji kechi ulama bantu banji na butemwe ne. Bantu banji bamunemeka bazhijika jizhina janji. Batwajijila kutumbijika bumfumu bwanji. Onkao mambo, ku mpelo ya Bukalama bwa Myaka Kiumbi Kimo, jizhina ja Yehoba jikatumbijikwa bingi. Yehoba ukamwesha patoka kuba’mba ke Shetu wa mwiulu uji bingi na butemwe.

¹⁸ Ku mpelo, bantu bonse bakayuka’mba byambo byamba Satana pe Yehoba bya bubela. Ñanyi kintu kikoba Yesu inge myaka yanji ya kulama yapwa? Nanchi ukasatukila Yehoba byonka byaubile Satana nyi? Ine, kwalepeshatu. (Tangai 1 Kolinda 15:24, 28.) Yesu ukabwezha Bufumu kwi Shanji. Ukakookelanga bukalama bwa Yehoba. Kupusanako na Satana, Yesu ukabwezha kwi Shanji bulume bo bamupele bwa kulama na mambo a kutemwa Yehoba.

19. Yesu umona byepi jizhina ja Yehoba?

¹⁹ O ene mambo Yehoba o apeelejile Yesu jizhina janji. Yesu wamwesheshe bulongo biji Shanji. Pano Yesu umona byepi jizhina ja Yehoba? Wijinemeka bingi kukila bintu byonse. Wafuukwilepo kufwa na mambo a jino jizhina, kabiji ku mpelo ya Bukalama bwa Myaka Kiumbi Kimo, ukekepesha ne kubwezha byonse kwi Yehoba. Twakonsha kulondela byepi byaubile Yesu? Tukesamba pa mukumbu wa buno bwipuzho mu mutwe walondelapo.