Ene Mambo o Twafwainwa Kunemekela Jizhina ja Yehoba

1-2. Twayuka byepi kuba’mba Yesu wanemeka jizhina ja Shanji?

YESU wanemeka bingi jizhina ja Yehoba. Kafwako muntu mukwabo wasolwele jizhina ja Yehoba byonka byaubile Yesu ne. Byonka byo twafunjile mu mutwe wafumako, Yesu wipaine kufwa na mambo a jizhina ja Yehoba ne byo jimenako. (Mako 14:36; Hebe. 10:7-9) Kabiji ku mpelo ya bukalama bwanji bwa myaka kiumbi kimo, Yesu ukekepesha ne kubwezha luusa lwa kulama lo bamupele pa kuba’mba azhijike jizhina ja Yehoba. (1 Ko. 15:26-28) Butemwe Yesu bo atemwa jizhina ja Lesa, bumwesha’mba uji na bulunda bwakosa bingi ne Shanji. Kwakubula nangwa kuzhinaukatu ne, kino kimwesha’mba Yesu watemwa bingi Yehoba.

² Yesu waishile pano pa ntanda mu jizhina ja Shanji. (Yoa. 5:43; 12:13) Wasolwele jizhina ja Shanji ku baana banji ba bwanga. (Yoa. 17:6, 26) Wafunjishanga ne kuba bya kukumya mu jizhina ja Yehoba. (Yoa. 10:25) Kabiji Yesu walombele kwi Yehoba kuba’mba azhikijile baana banji ba bwanga ‘na mambo a jizhina ja Yehoba.’ (Yoa. 17:11) Onkao mambo, inge Yesu wanemekele bingi jizhina ja Yehoba, muntu wakonsha kwamba byepi amba mwana wa bwanga wa kine wa kwa Kilishitu bino saka abula kuyuka nangwa kwingijisha jizhina ja Shanji?

3. Ñanyi bintu byo tusakwisambapo mu uno mutwe?

³ Atweba bena Kilishitu twibikako kulondela mu ngayo ya kwa Yesu kabiji twanemeka bingi jizhina ja Shanji. (1 Pe. 2:21) Mu uno mutwe, tusakwisamba pa jizhina ja Yehoba byo jiyukanyikisha aba basapwila “mambo awama a Bufumu” lelo jino. (Mat. 24:14) Kabiji tusakwisamba pa byo twafwainwa kunemekanga jizhina ja Yehoba atweba bonse pa muntu pa muntu.

“BANTU BA JIZHINA JANJI”

4. (a) Ñanyi mwingilo Yesu ye apele baana banji ba bwanga saka akyangye kuya mwiulu? (b) Ñanyi bwipuzho bo tusakwisambapo?

⁴ Saka akyangye kubwela mwiulu, Yesu wabuujile baana banji ba bwanga amba: “Mukatambula bulume kimye mupashi wazhila kyo akemwikijila, kabiji mukekala bakamonyi bami mu Yelusalema, monse mu Yudea ne mu Samaliya, ne monse mwapela ntanda.” (Byu. 1:8) Kino kimwesha kuba’mba mambo awama afwainwe kusapwilwa ne mu mapunzha akwabo, kechi mu Isalela monkatu ne. Mu kuya kwa kimye, kino kyalengejile ne bantu ba mu bisaka byonse nabo kwikala baana ba bwanga ba kwa Yesu. (Mat. 28:19, 20) Pano bino, Yesu waambile’mba: “Mukekala bakamonyi bami.” Nanchi bano baana ba bwanga bakatataka bafwainwe kuyuka jizhina ja Yehoba nyi, inyi bafwainwe kwikalatu bakamonyi ba kwa Yesu kwapwa? Bintu byamwekele byo baambapo mu Byubilo kitango 15 bisakwitukwasha kukumbula buno bwipuzho.

5. Batumwa ne bakulumpe ba mu Yelusalema bamwesheshe byepi kuba’mba bantu bonse bafwainwe kuyuka jizhina ja Yehoba? (Monai ne kipikichala.)

⁵ Mu mwaka wa 49 CE., batumwa ne bakulumpe ba mu Yelusalema basambakene pamo na kwisamba pa byafwainwe kuba bantu ba mu bisaka bikwabo babujile kuya ku mukanda pa kuba’mba bekale bena Kilishitu. Ku mpelo ya mwisambo wabo, Yakoba nkasanji Yesu waambile’mba: “[Petelo] walumbulula bingi bulongo Lesa byo aalulukila ku bisaka bya bantu pa kimye kitanshi ne kusalamo bantu ba jizhina janji.” Yakoba waambilenga pe ñanyi? Kwingijisha byambo byaambile Amosi, waambile’mba: “Kuba’mba bantu bashalapo bakamukebeshe Yehoba, pamo na bantu ba mu bisaka byonse, bantu batelwa pa jizhina jami, byo byaamba Yehoba.” (Byu. 15:14-18) Bano baana ba bwanga bakatataka bafunjile pe Yehoba ne kutelwa pa jizhina janji. Kino kyalumbulwilenga’mba bafwainwe kukwasha bantu kuyuka jizhina ja Lesa ne kutelwa pa jino jizhina.

6-7. (a) Mambo ka Yesu o aishijile pano pa ntanda? (b) Ñanyi kintu kikwabo kyanema kyavwangiwemo?

⁶ Jizhina ja kwa Yesu jilumbulula’mba “Yehoba ye Lupulukilo,” kabiji jo jishinda Yehoba jo aingijishe kupulushishamo bantu baji na lwitabilo mwi aye. Yesu waishile pano pa ntanda ne kufwila bantu. (Mat. 20:28) Bukuzhi bo apaine bwalengela bantu kupuluka ne kukekala na bumi bwa myaka ne myaka.​—Yoa. 3:16.

⁷ Pano mambo ka bantu o bakebewenga bukuzhi? Ke na mambo a bintu byamwekele mu bujimi bwa Edena. Byonka byo twaambilepo mu mutwe wafumako, bansemi betu batanshi ba Adama ne Evwa, basatukijile Yehoba kabiji kino kibalengejile kubula kwikala na luketekelo lwa kwikala myaka ne myaka. (Nte. 3:6, 24) Nangwa byonkabyo, kuji ne kintu kikwabo kyanema bingi kyavwangiwemo kyakijile pa kupulusha bantu. Bintu bya bubela byaambile Satana, byatamishe bingi jizhina ja Yehoba. (Nte. 3:4, 5) Onkao mambo, lupulukilo lwa baana ba kwa Adama ne Evwa mwavwangwa kintu kyanema bingi, ko kuba’mba kuzhijika jizhina ja Yehoba. Na mambo kuba Yesu waimenejilengako Yehoba ne kusolola jizhina ja Yehoba ku bantu, waingijile mwingilo wanema bingi wa kuzhijika jizhina ja Yehoba.

8. Ñanyi bintu byafwainwe kuyuka bantu bonse baitabijile mwi Yesu?

⁸ Bantu bonse bafwainwe kwitabila mwi Yesu, Bayudea ne ba mu bisaka bya bantu bafwainwe kuyuka kwafumine lupulukilo lwabo, ko kuba’mba kwi shanji Yesu aye Yehoba. (Yoa. 17:3) Kabiji byonka byo kyajinga kwi Yesu, nabo bafwainwe kutelwa pa jizhina ja Yehoba. Bafwainwe ne kuyuka ene mambo o kyanemena kuzhijika jizhina janji, mambo po paimenejile lupulukilo lwabo. (Byu. 2:21, 22) Onkao mambo, baana ba bwanga bakishinka bonse ba kwa Yesu, bafwainwe kufunda pe Yehoba ne Yesu. O ene mambo Yesu o aambijile byambo bya kupezhako mu lulombelo lwanji luji mu Yoano kitango 17 bya kuba’mba: “Nejisolola jizhina jenu kwi abo kabiji nkejisolola, kuba’mba butemwe bo mwantemwa bwikale mwi abo, ne amiwa ngikale ne abo”​—Yoa. 17:26.

“ANWEBA YENU BAKAMONYI BAMI”

9. Twakonsha kumwesha byepi’mba twanemeka jizhina ja Yehoba?

⁹ Baana ba bwanga bonse ba kwa Yesu bafwainwa kuzhijika jizhina ja Yehoba. (Mat. 6:9, 10) Bafwainwa kumonanga’mba jizhina ja Yehoba janema bingi kukila bintu byonse. Kabiji bintu byo bamba ne byo boba byafwainwa kumwesha’mba bejinemeka. Pano twakonsha kuba byepi pa kuba’mba tuzhijike jizhina ja Yehoba nangwa kumwesha’mba byaambile Satana pe Yehoba bya bubela?

10. Ñanyi Kochi wa kifwanyikizho ye baambapo mu buku wa Isaya kitango 42 kufika ku 44? (Isaya 43:9; 44:7-9) (Monai ne kipikichala.)

¹⁰ Mu buku wa Isaya kitango 42 kufika ku 44, tufunda pa byo twafwainwa kuba pa kuba’mba tuzhijike jizhina ja Yehoba. Bino bitango mu bukifwanyikizho byaamba pa Kochi mo babena kutotolola mambo aamba pa bumfumu bwa Lesa. Yehoba waipuzha bantu bapopwela bankishi kumwesha inge balesa babo ba kine. Kabiji byonka byo kikalatu mu Kochi, waipuzha inge kujipo bakamonyi bakonsha kumwesha’mba bano balesa ba kine. Pano bino, kafwako nangwa umo wamwesha kino ne.​—Tangai Isaya 43:9; 44:7-9.

11. Ñanyi byambo Yehoba byo aamba ku bantu banji biji pa Isaya 43:10-12?

¹¹ Tangai Isaya 43:10-12. Yehoba waamba pa bantu banji amba: “Anweba mwi bakamonyi bami, kabiji yami Lesa.” Yehoba ubena kwibepuzha buno bwipuzho’mba: Nanchi kujipo Lesa mukwabo nyi? (Isa. 44:8) Onkao mambo, atweba bonse twafwainwa kukumbula buno bwipuzho. Tumwesha’mba Yehoba ye Lesa yenka wa kine kupichila mu byo twamba ne byo tuba. Jizhina janji jakila mazhina onse. Bwikalo bwetu bwafwainwa kumweshanga’mba twatemwa Yehoba ne kuba’mba twi bakishinka kwi aye, kechi na mambo a makatazho akonsha kwituletela Satana ne. Kuba bino kukamwesha’mba tubena kuzhijika jizhina ja Yehoba.

12. Bungauzhi buji pa Isaya 40:3, 5 bwafikile byepi?

¹² Tulondela byaubile Yesu Kilishitu inge ketuzhijike jizhina ja Yehoba. Isaya waawile’mba awa ukatangilako ‘ukawamisha jishinda ja Yehoba’ nangwa’mba kwijinengezha. (Isa. 40:3) Buno bungauzhi bwafikile byepi? Yoano Mubatizhi wanengezhejile Yesu jishinda, waishile mu jizhina ja Yehoba ne kwamba mu jizhina ja Yehoba. (Mat. 3:3 Mako 1:2-4 Luka 3:3-6) Buno bungauzhi bwaambile ne kuba’mba: “Lukumo lwa Yehoba lukamweka.” (Isa. 40:5.) Buno bungauzhi nabo bwafikile byepi? Yesu byo aishile pano pa ntanda, waubile bintu kwesakana na byakebelenga Yehoba ubatu nobe Yehoba mwine ye waishile pano pa ntanda.​—Yoa. 12:45.

13. Twakonsha kulondela byepi byaubile Yesu?

¹³ Ne atweba twi bakamonyi ba kwa Yehoba byonka byajinga Yesu. Tutelwa pa jizhina ja Yehoba kabiji tubuulako bantu bonse bintu byawama byo auba. Nangwa byonkabyo, pa kuba’mba twingile bulongo uno mwingilo, twafwainwa kukwasha bantu kuyuka mwingilo wanema uji ne Yesu wa kuzhijika jizhina ja Yehoba. (Byu. 1:8) Yesu ye Kamonyi mwine wa kwa Yehoba, kabiji tulondela byo aingijile. (Lum. 1:5) Pano atweba bonse pa muntu pa muntu, twafwainwa kumonanga byepi jizhina ja Yehoba?

BYO TWAFWAINWA KUNEMEKA JIZHINA JA YEHOBA

14. Kwesakana na byaamba Salamo 105:3, tumvwa byepi pa jizhina ja Yehoba?

¹⁴ Tumvwa bingi bulongo kutelwa pa jizhina ja Yehoba. (Tangai Salamo 105:3.) Yehoba umvwa bingi bulongo inge ketwitotele mu jizhina janji. (Yele. 9:23, 24; 1 Ko. 1:31; 2 Ko. 10:17) ‘Kwitotela mwi Yehoba’ kulumbulula kusangalela mwi Yehoba Lesa wetu. Tutemwa bingi kwingila mwingilo wa kunemeka ne kuzhijika jizhina ja Yehoba. Kechi twafwainwa kwifya ku bakwetu mo twingijila nkito, mo tufunjila sukulu, bakinkalankulo ne bantutu bakwabo amba twi Bakamonyi ba kwa Yehoba ne. Diabola kechi ukeba’mba twambenga pa jizhina ja Yehoba ku bantu ne. (Yele. 11:21; Lum. 12:17) Satana ne bangauzhi banji ba bubela bakeba’mba bantu bavulame jizhina ja Yehoba. (Yele. 23:26, 27) Nangwa byonkabyo, na mambo a kuba’mba twatemwa jizhina ja Yehoba, tusangalela mwi aye “kimye kyonse.”​—Sala. 5:11; 89:16.

15. Kwita pa jizhina ja Yehoba kulumbulula ka?

¹⁵ Tutwajijila kwita pa jizhina ja Yehoba. (Yoe. 2:32; Loma 10:13, 14) Kwita pa jizhina ja Yehoba kwavwangamo byavula, kechi kwijiyukatu ne kwijingijisha ne. Twafwainwa kuyuka’mba Lesa kine koaji, kuketekela mwi aye, kukeba bukwasho ne lutangijilo lwanji. (Sala. 20:7; 99:6; 116:4; 145:18) Tusapwila ku bantu pa jizhina ne byubilo byanji kwibakwasha kulapila ne kwibakwasha kupimpula bwikalo bwabo pa kuba’mba betabilwe kwi Yehoba.​—Isa. 12:4; Byu. 2:21, 38.

16. Twakonsha kumwesha byepi’mba Satana wa bubela?

¹⁶ Twipana kumanama na mambo a jizhina ja Yehoba. (Yako. 5:10, 11) Inge twatwajijila kwikala bakishinka kwi Yehoba kimye kyo tubena kupita mu makatazho, tumwesha patoka’mba Satana wa bubela. Mu moba ajingako Yoba, Satana waambile pa bantu bonse bengijila Yehoba amba: “Muntu wakonsha kupana kintu kyonse kyo aji nakyo pa kuba’mba apulushe bumi bwanji.” (Yoba 2:4) Satana walumbulwilenga’mba bantu bakonsha kwingijilatu Yehoba inge bintu bibena kwibendela bulongo. Pano bino, inge kebapite mu makatazho, bakonsha kuleka kwingijila Yehoba. Yoba wamwesheshe’mba bino byambo byaambile Satana bya bubela. Ne atweba kechi twafwainwa kwisulwa kuleka kwingijila Yehoba inge tubena kupita mu makatazho ne. Twafwainwa kushiinwa’mba Yehoba ukatwajijila kwituzhikijila na mambo a jizhina janji.—Yoa. 17:11

17. Mu ñanyi jishinda jikwabo mo twakonsha kuletela lukumo pa jizhina ja Yehoba kwesakana na byaamba 1 Petelo 2:12?

¹⁷ Tunemeka jizhina ja Yehoba. (Maana 30:9; Yele. 7:8-11) Na mambo a kuba’mba twimenako Yehoba kabiji tutelwa pa jizhina janji, byo tuba byakonsha kuleta lukumo nangwa mwenga pa jizhina janji. (1 Petelo 2:12.) Onkao mambo, twafwainwa kwibikako kutota Yehoba mu ñambilo ne mu byubilo byetu. Inge ketwibikeko kuba bino nangwa kya kuba twi bambulwakulumbuluka, tukaleta lukumo pa jizhina janji.

18. Mu ñanyi jishinda jikwabo mo twakonsha kumweshesha’mba twanemeka jizhina ja Yehoba? (Monai tubyambo twa munshi.)

¹⁸ Tuta muchima pa kunemeka jizhina ja Yehoba kechi na mambo a byakonsha kwitumona bantu ne. (Sala. 138:2) Mambo ka kuba bino o kwanemena? Mambo kutemwa jizhina ja Yehoba kwakonsha kulengela bantu kwitushikwa ne kwamba byatama pe atweba.a Yesu wipaine kufwa lufu lwatama bingi nobe kapondo, waubile bino pa kuba’mba atumbijike jizhina ja Yehoba. Byo apichilenga mu bino byonse, kechi wateleko muchima ku bumvu ne, kabiji kechi watele muchima pa bintu byatama byamubilenga bantu ne. (Hebe. 12:2-4) Aye wateletu muchima pa kuba kyaswa muchima wa Lesa.​—Mat. 26:39.

19. Mumvwa byepi pa jizhina ja Yehoba, kabiji mambo ka?

¹⁹ Tumvwa bingi bulongo kwingijila Yehoba ne kutelwa’mba Bakamonyi ba kwa Yehoba. Na mambo a kino, tutwajijila kwingijila Yehoba nangwa kya kuba betuba mwenga nangwa kwitumanyika. Twafwainwa kuta muchima pa kwingijila Yehoba kukila kwitatu muchima atweba bene. Onkao mambo, twayai tutwajijile kutota jizhina ja Yehoba kechi na mambo a makatazho akonsha kwituletela Satana ne. Inge twauba bino, tukamwesha’mba twanemeka bingi jizhina ja Yehoba byonkatu bijinemeka Yesu Kilishitu.