Byamwekele mwaka wapwa

Yehoba Lesa watangijile ngauzhi Isaya na mupashi kwaula’mba: “Pajinga mukuba, nkapingakenyapo ngolode, kabiji pajinga kyela kya kapotwe nkapingakenyapo siliva, pajinga bichi nkapingakenyapo mukuba, pajinga mabwe, nkapingakenyapo kyela kya kapotwe.” (Isa. 60:17) Mwaka wapwa twamwene byavula byamwesheshenga kuba’mba buno bungauzhi bubena kufika. Byonkatu bintu byo biwaminako inge bafumyapo kintu kyatama bapingizhapo kyawama, ne Bakamonyi ba kwa Yehoba mu ano moba akupelako bemwena bintu byavula byo byawaminako mu jibumba ja Lesa.​—Mat. 24:⁠3.