Kusapwila Bantu Babula Kutanwa pa Mazubo

MWINGILO wa kusapwila ku nzubo ku nzubo byo aji jishinda jikatampe Bakamonyi ba kwa Yehoba jo basampenyamo bukine bwa mu Baibolo, kwingijisha bya kutanchikapo mabuku ke jishinda jawama bingi kusapwila mambo awama a Bufumu bwa Lesa. (Mat. 24:14) Basapwishi babena kwingijisha pa kutanchika mabuku, matebulu ne bintutu bikwabo bya kutanchikapo mabuku pa kuba’mba basapwile bantu bavula. Kabiji bipwilo mwaya ntanda yonse bebitumina bya kutanchikapo mabuku 250,000. Ñanyi bintu bibena kufumamo?

Mu Dar es Salaam ku Tanzania, bantu bafika ku 700 babena kukeba kufunda Baibolo kufumatu mu 2014 kimye kyo batendekele mukwekele wa kusapwila ku mpunzha kutanwa bantu bavula. Bantu bavula bakeba kufunda Baibolo beya na kupwila kabiji babena kufwenya kwipi ne Lesa. Mu mwakatu umo, bantu bafumine mu byalo bya mu Africa ne byalo bya kwalepa, basendele mabuku kukila pa 250,000 pa bya kutanchikapo mabuku.

Mu Solomon Islands, mujitu basapwishi babula kufika ku 2,000 babena kusapwila mu nyaunda ikatampe mwikala bantu bavula kukila pa makuji 300, kusapwila kutanwa bantu bavula ke jishinda jawama bingi ja kusampenyamo bukine. Mu muzhi mukatampe wa Honiara balongo bapeele bantu magazini kukila pa 104,000 ne mabuloshuwa 23,600 ku bantu bafumine ku makuji ne mizhi yapusana pusana kwabula Bakamonyi. Pa jubatu jimo mabanga, bapeele bantu mabuku 400 a Nanchi Baibolo Waamba’mba Ka? kabiji bantu 60 babena kukeba kufunda Baibolo.

Juba jimo lukelo, bapainiya babiji Michael ne Linda baimikilenga pa kutanchika mabuku ku bwipi na kiito kiji ku jikuji ja Margarita ku Venezuela. Mwanamulume umo wa jizhina ja Aníbal waishile po batanchikile mabuku ne kusendapo buku wa Baibolo Waamba’mba Ka? Wibabuujile’mba, bashanji bafwijile pa kino kyonka kiito papita ne myaka itanu na ibiji, kabiji kufumatu kyonkakya kimye bamama baji bingi na binyenge. Mulungu walondejilepo, Aníbal wabwelele ne kubuula Michael ne Linda amba jino jo juba jafwile batata. Watolele foni wanji ne kutumina bainanji, ne kwambila Michael amba ebatekeneshe. Kufumatu kyokya kimye, bamama besamba ne Michael ne Linda pa foni, kabiji bebatundaika kwingijisha binembelo. Bainanji Aníbal batumine byambo pa foni bya kuba’mba, “Lelo naumvwako bulongo mambo mwaji kuntundaika ne kunkwasha kukosesha lwitabilo lwami.”

Mwingilo wa kusapwila ku mapunzha kutanwa bantu bavula bamubika mu mapunzha 127 mu mizhi 14 ya mu United States. Mu bañondo batanu na babiji mu mwaka wa mwingilo wa 2015, bantu bo bafunjishenga Baibolo bafikile 8,445! Ajino jishinda ja kusapwilamo jawama bingi kukwashishamo bantu bavula balekele kupwila kutendeka kupwila jikwabo. Mwanamulume umo wa jizhina ja Terry watajilenga pa bya kutanchikapo mabuku mu muzhi wa Los Angeles ku California, ba mulume ne mukazhi bajinga ku tebulu bamushikishe umvwe wakitangapo kala mabuku etu. Waambile’mba ne Kamonyi wa kwa Yehoba, pano naikala myaka ina kwa kubula kupwila. Ba mulume ne mukazhi batangile ne kwisamba nanji Ezikyo 34:11, Yehoba po aamba’mba: “Amiwa mwine nkeikeba mikooko yami ne kwiilama bulongo.” Bamumwesheshe keyala wetu ne TV wa JW. Juba jalondejilepo, Terry watumijile mulongo nkalata ne kumubuula’mba saka akyangye kwiya po batanchikile mabuku, walombele lulekelo lwa mambo kwi Lesa pa kuleka kupwila. Kabiji walombele’mba amukwashe kufwenya kwipi ne Yehoba. Terry waambile’mba, “Mwantambwijile bingi bulongo. Mwantangijile kinembelo kyantundaikile bingi kabiji mwambuujile ko nakonsha kutaana bintu bya kunkwasha kubwela mu jibumba ja Yehoba. Lesa wakumbwile lulombelo lwami.”

Kuji mapunzha ana kutanwa bantu bavula ko baya na kusapwila mu Addis Ababa ku Ethiopia. Mu bañondotu basatu, balongo bapeele bantu mabuku 37,275, kabiji bantu 629 bakebelenga kwibafwakesha ku Bakamonyi. Pa bantu batambwileko buku wa Baibolo Waamba’mba Ka? pajinga ne mwanamulume mukote waubile aku bamupatu buku watendeka ne kutanga. Wakifundapo kala pa sukulu wa bupopweshi, kabiji wakebelenga kuyuka byavula pe Yesu ne pa Bufumu bwa Lesa. Juba jalondejilepo, wabwelele ku mpunzha ko batanchika mabuku kuba’mba bakumbule mepuzho anji. Kechi papichile kimye kyabaya ne, waswile kufunda Baibolo kabiji ku mpelo ya mulungu wayile na kupwila. Aluno uya na kupwila kimye kyonse kabiji ubena kuba bingi bulongo.

Mwanamulume umo Muyudea wayile ko batanchika mabuku mu Mexico, kabiji waipwizhe balongo babiji inge baji na magazini aamba pa lufu. Bamubuujile’mba magazini aamba pa lufu apwa, bino bamupeele magazini waambilenga pa bwikalo bwa kulutwe. Uno mwanamulume wakwachile mulongo ku kuboko ne kumwambila’mba: “Kechi mbena kukeba mabuku aamba pa bwikalo bwa kulutwe ne. Mbena kukeba kwiipaya.” Watendekele kujila. Balongo bamwipwizhe ene mambo o akebejilenga kwiipaya. Wakumbwile saka ajila amba: “Nafwisha mwanami wa mulume.” Balongo bamumwesheshe kitango 7 mu buku wa Baibolo Waamba’mba Ka? Batangile nanji mafuka abiji pa kamutwe ka kuba’mba “Kukekala Lusanguko!” ne mafuka apelako po baamba pa lusanguko lwa bantu bafwa. Byo atemenwe bintu byo bamubuujile, wakwachile jikwabo ku kuboko kwa mulongo ne kumwambila’mba, “Nanchi kine kikobiwa nyi?” Balongo bamubuujile’mba, Yehoba ukasangula bantu bafwa. Aye wibashikishe’mba, “Nafwainwa kuba byepi pa kuba’mba nkamonañane na mwanami jibiji?” Baumvwañene kumufwakesha pa nzubo yanji. Byo bafikile pa nzubo yanji, bataaine ubena kwibapembelela kutendeka kufunda Baibolo.

Kalama wa mwanzo umo wakwashishe kunengezha pa kutanchikila mabuku mu New York waambile’mba, “Yehoba wapesha bingi uno mwingilo! Ajino jishinda jawama bingi kukwasha bantu bavula, kabiji jalengela ne kukwasha bantu bavula balekele kupwila ne bo bapangile mu kipwilo, bano bonse ke ‘mikooko yaeleka’ yo twafwainwa kukwasha kubwela mu kipwilo.”—Ezikyo 34:15, 16.