Bya Kusapwila Kwingijisha kya Kutanchikapo Mabuku

Kusapwila kwingijisha kya kutanchikapo mabuku nangwa tebulu kubena kwingila bingi bulongo kukokela bantu ba michima ya kishinka mu bukine. (Yoa. 6:44) Onkao mambo, bakulumpe bebatundaika kunengezha busapwishi bwa ku mvula bantu mu nyaunda ya kipwilo mupita bantu bavula. Byo kiji kuba’mba bya kutanchikapo mabuku bebyendesha, kechi mwafwainwa kutambula luusa pa kwibingijisha ne. Bañanyi bafikilamo kwingila uno mwingilo? Basapwishi bafuukula bulongo, baamba na mushingi kabiji bayuka kwisamba na bantu. Abino bintu byalondelapo byobyo mwafwainwa kuba ne kubula kuba bya kukwasha basapwishi kwingila bulongo uno mwingilo.

Byo Mwafwainwa Kuba:

Ikalai balunda bawama, kutambwila bantu bulongo ne kukwasha babena kupita. Basapwishi bamo bamwemwesela ne kwimuna bantu na lusekelo. Umvwe muntu keatale pa kya kutanchikapo mabuku byo abena kupita, mwakonsha kumwambila’mba, “Mwakonsha kutolapo inge mubena kukeba.”
Imenaiko patalumuka bulongo na kuji kya kutanchikapo mabuku. Mu mapunzha amo, basapwishi bengila bulongo inge baimanako palepa mita umo nangwa abiji na kuji kya kutanchikapo mabuku. Bamo nabo bamba’mba kwimana kipikipi kulengela babena kupita kukankazhama kwimana, onkao mambo, bemenako palepa kufikatu ne byo basakumona muntu waiya pa kya kutanchikapo mabuku. Inge muntu waiya pa kya kutanchikapo mabuku, isambai nanji, kampe mwakonsha kumwipuzha’mba, “Nanchi mwakilangulukapo kala pa buno bwipuzho nyi?”
Ingijishai Baibolo javula inge kyakonsheka.
Bantu batola mabuku a kufundamo nabiji buku wa kuba’mba Baibolo Ufunjisha, balumbulwilai lunengezho lwa kufunda Baibolo. Inge kyakonsheka, batambishai vidyo wa kuba’mba Mambo ka a Kufunjila Baibolo? pa ka kiñambañamba ka kwenda nako.
Bantu bamwesha lusekelo mwakonsha kwibambila’mba bemubuule kwa kwibatana. Inge kechi bekala mu yoyo nyaunda ne, nembai kapepala ka kuba’mba, Mwane Monai Uno Muntu (S-43) ne kwikapana ku munembeshi ponkapotu.