Busapwishi bwa mu Mukwakwa Bwawama
1. Ñanyi jishinda jimo jo twakonsha kulondelamo Yesu?
1 Byo aingilanga mwingilo wanji pano pa ntanda, Yesu kechi wakankazhamanga kwamba na bantu bo atananga mu mukwakwa ne mu mapunzhatu akwabo ne. (Luka 9:57-61; Yoa. 4:7) Wakebanga kwisamba na bantu bavula mambo anji anema. Lelo jino, busapwishi bwa mu mukwakwa ke jishinda jimo ja kukwashishamo bantu kwikala na maana a Lesa. (Mana 1:20) Pa kuba’mba twingile bulongo, twafwainwa kwitendekelako atweba bene kusolomoka bantu ne kwikala ba milangwe.
2. Mu kwitendekelako kusolomoka bantu mu busapwishi bwa mu mukwakwa mwavwangwa ka?
2 Kwitendekelako Anweba Bene: Kyawama kusolomoka bantu mu kifulo kya kwimanatu nangwa kwikala na kupembelela bantu amba beye ko muji. Pa kwibasolomoka, mwafwainwa kumwemwesela, kwibatala pa kwamba, kwibakasulukila ne kwibamwesha lusekelo. Umvwe mubena kwingila na basapwishi bakwenu, kyawama kusolomoka bantu bunke bunke. Kabiji mwakonsha ne kwibikishako kubwelako ku muntu wamwesheshe lusekelo. Inge kyakonsheka, ku mpelo ya mwisambo, mwipuzhai ko mwakonsha kumutana kimye kikwabo. Basapwishi bamo basapwila bantu mu mukwakwa kimye kyonse pa mpuzha imotu. Kino kibalengela kwisamba na bantu bamotu kuba’mba bekale na muchima wa kukeba kufunda bukine.
3. Twakonsha kumwesha byepi milangwe kimye kyo tubena kuba busapwishi bwa mu mukwakwa?
3 Kwikala ba Milangwe: Yukainga bulongo po mwafwainwa kwimana mu mukwakwa kabiji ne bantu bo mwafwainwa kusolomoka. Kechi kikebewa kwisamba na muntu yense ubena kupita ne. Talatalainga. Kyakumwenako, Inge muntu wapayankana kyawama kumuleka wapita. Umvwe mubena kusapwila pa mpunzha ya busulu, mwafwainwa kumona kuba’mba kechi mubena kulengela mukulumpe wa nkito kumvwa kutama ne. Javula, kyawama kusapwila bantu babena kufuma mu shitolo kukila babena kutwela. Solomokainga bantu mu jishinda jawama kechi ja kwibachinyisha ne. Kabiji mwafwainwa kusala bantu bo mwafwainwa kupa mabuku. Inge muntu wabula kumwesha lusekelo lwa kine, mwakonsha kumupa talakiti mu kifulo kya kumupa magazini.
4. Mambo ka busapwishi bwa mu mukwakwa o bwawamina ne kwikala jishinda jawama kwingijilamo mwingilo?
4 Busapwishi bwa mu mukwakwa bwitulengela kusampanya nkunwa ya bukine mu kimye kicheche. (Sapwi. 11:6) Bantu bo tusambakana bakonsha kwikala boba bo tubula kutana pa mazubo kimye kyo twingila mwingilo wa ku nzubo ku nzubo. Mambo ka a kubujila kulangulukapo bya kwingilako busapwishi bwa mu mukwakwa? Jino ke jishinda jawama kwingijilamo mwingilo wa mu bujimi.