Butemwe bwa Bena Kilishitu Kechi Bupwa Ne

Ba Igor: Bonse babiji twajinga mu jibumba ja Bakamonyi bajinga mu muzhi wa Tkvarcheli mu kibuji kya Abkhazia. Na mambo a kuba’mba kipwilo kyatangijilanga jino jibumba kyajinga palepa makilomita 85 mu muzhi wa Jvari, nayangakotu jimo pa ñondo na kusenda mabuku alumbulula Baibolo. Kafulumende wa Soviet Union byo bamushinjile, kibunji kya Abkhazia kiji na kafulumende wakyo kyakebelenga kwikala kyalo bunke mu 1992. Kwabukile nkondo pakachi ka bamulwila ntanda ba mu Abkhazia ne bashilikale ba kyalo kya Georgia, kabiji ino nkondo yaletele bingi buyanji.

Ba Gizo: Nabatizhiwe saka nji na myaka 21, byo kwashajiletu mwaka umo kuba’mba nkondo itendeke. Nkondo byo yatendekele, balongo bachiinenga kusapwila. Bino ba Igor betutele bingi muchima, kabiji betutundaikanga’mba: “Akino kyo kimye bantu kyo bakeba bingi lutekenesho. Kusapwila ko konkatu kusakwitukwasha kutwajijila kukosesha bulunda bwetu na Yehoba.” Twatendekele kusapwila byambo bya lutekenesho biji mu Mambo Lesa pa juba pa juba ku bantu baikalanga kipi kipi, bino twaubanga bino mu bufyamfya.

Ba Igor: Na mambo a milukuchi, twalekele kwingijisha jishinda jo twapitangamo kala pa kuya ku Jvari na kusenda mabuku etu. Kabiji na mambo a kuba nakomejile mu yoya mpunzha, nataainepo jishinda jawama japita mu majimi a masamba ne mu mitumba. Bino kechi kyapelele ne, mambo naakaminwe’mba juba jimo nkasambakana jibumba ja bamulwila ntanda baji na mata nangwa kunyata pa kapata. Nangwa byonkabyo, kechi nakebelenga kubika bumi bwa balongo bami mu kizumba ne, onkao mambo, nayangatu bunke jimo pa ñondo pa ñondo. Yehoba wankwashanga bingi, mambo twatambulanga mabuku pa kimye kyafwainwa kabiji ano mabuku etukwashishe kwikala bakosa mu lwitabilo.

Nangwa kya kuba mu muzhi wa Tkvarcheli kechi mwajinga nkondo ne, bino palutwe kacheche, uno muzhi bamuzhokolokele ku bashilikale kabiji bashinkile ne mashinda. Bwikalo bwatendekele kukatazha. Bañondo ba mashika byo bafikile, kajo katendekele kukatazha ne bantu bonse batendekele kwakamwa’mba kechi basakupuluka ne. Kituletejile bingi lusekelo pa kumvwa’mba balongo mu muzhi wa Jvari betutumina kajo.

Ba Gizo: Juba jimo, ba Igor betwipwizhe inge nzubo yetu bakonsheshe kwiingijisha kulaminamo kajo ka kupa balongo. Banengezhezhenga kuya na kusenda kajo ku Jvari. Twaakaminwe amba kechi bakenda bulongo ne, mambo twayukile’mba mu jishinda muji mapunzha avula patanwa bakapokola kabiji bakonsha kusambakana na bantu baji na mata ne bangivi.—Yoa. 15:13.

Byo papichiletu moba acheche, twasangalele bingi pa kumona ba Igor babwela mu mutende saka babena kwendesha motoka mwajinga kajo kavula ka kuja mu bañondo bonse ba mashika. Mu bimye bya makatazho, twimwenejile bukishinka bwa byambo bya kuba’mba butemwe bwa bena Kilishitu ba kine kechi bupwa ne.—1 Ko. 13:8.