Nalombele Yehoba Amba Antangijile

BAMAMA bazhingijile bingi kimye amiwa ne bakazhi bami ba Tsitso kyo twaikele Bakamonyi ba kwa Yehoba. Juba jimo baichile balongo betu bonse kuba’mba betulekeshe kwikala Bakamonyi. Bañambijile kusalapo, kusha bupopweshi bwami nangwa bulongo kupwa.

Nasajilepo kufuma mu taunyi mwaikalanga balongo bami. Na mambo a kuba’mba najinga sendwe wa byela, nafuukwilepo kuya na kwikala mu muzhi mukatampe wa Kutaisi monka mu kyalo kya Georgia, mo kyakonsheshe kupeela kutaana nkito. Kabiji nayukile’mba mu uno muzhi mwakebewenga basapwishi ba Bufumu bavula. Onkao mambo, nalombele Yehoba amba antangijile.

Byo papichiletu kimye kicheche, namonañene na muntu umo ye nafunjishanga Baibolo waikalanga mu kamuzhi kacheche katelwanga’mba Jvari. Byo aumvwine’mba mbena kulanguluka kuvilukila ku Kutaisi, wañambijile’mba mvilukile mu muzhi mo aikalanga. Wambuujile’mba: “Tuji na nzubo yabaya. Baana betu basakulaalanga konka ko tulaala atweba, anweba musakulaalanga mu kibamba kikwabo.”

Na mambo a kuba’mba nakebelenga lutangijilo lwa Yehoba, namubuujile’mba nsakuvilukila mu nzubo yanji pa moba achechetu aku na kukeba nkito ne nzubo ya kusonkela. Kyankumishe ke kya kuba’mba pa jonkaja juba mabanga wampele mazhina a makampanyi ko bakebelenga ba mingilo.

Byo papichile moba acheche, amiwa ne kisemi kyami twavilukijile mu muzhi wa Jvari. Pa jubatu jitanshi, natwelele nkito yo nafolanga mali avula bingi. Mukulumpe wa uno kampanyi wampele nzubo ikatampe bingi yajinga ya kampanyi amba ngikalengamo. Palutwe kacheche, balongo bañambijile’mba nebakwasheko mwingilo wa kupulinta mabuku etu ne magazini mu bufyamfya. Kabiji na mambo a kuba’mba nzubo yetu yabayile bingi, amiwa ne mwinakwami twaswishishe balongo kwingijilanga uno mwingilo mu nzubo yetu.

Pa myaka yavula yapichilepo, mu nzubo yetu mo mwaikelanga Kivuluko ne kupwila kukwabotu. Na mambo a kino, bantu bavula bakila pa 500 babatizhiwe mu nzubo yetu. Nji bingi na lusekelo mambo nalondejile lutangijilo lwa Yehoba.