Nemwenejile Byaamba Baibolo!

KIMYE kitanshi kyo naumvwine pa Bakamonyi, najinga pa sukulu mukatampe mu muzhi wa Kutaisi. Mukwetu wambuujile’mba Bakamonyi kechi bengijisha bipashañano mu bupopweshi bwabo ne, kabiji kechi baitabila’mba Yesu ye Lesa wa Bulume Bonse ne. Bino byapusene bingi na mafunjisho o naitabijilemo mu Chechi wa Orthodox.

Mu 1992, mu kimye kya kisalo, nabwelele mu muzhi wa Tsageri mo nasemekejilwe, kabiji nataaine’mba namo mwajinga Bakamonyi basapwijilenga. Bamama baumvwine bintu byavula byawama pa Bakamonyi. Na mambo a kuba’mba nebashikilwe Bakamonyi, bamama bambuujile’mba: “Ya ukemwene byo bafunjisha.”

Balongo babiji bapainiya, ba Pavle ne ba Paata javula baiyanga na kumona kisemi kyaikalanga kwipi na kwetu. Bavula bo twalamankene nabo bayanga na kuteleka byo bafunjishanga ne kwibepuzha mepuzho. Onkao mambo, ne amiwa nafuukwilepo kuya na kutelekako. Kimye kyonse kyo nebepuzhanga mepuzho, bano balongo bazhikulanga Baibolo ne kuñambila’mba tanga papo. Kino kyandengejile kuyuka’mba bwajinga bupopweshi bwa kine, mambo nemwenejile byaamba Baibolo!

Kechi papichile ne kimye kyabaya ne, natwelele mu jibumba ja balongo bafunjilenga Baibolo. Mwaka walondejilepo, amiwa ne bakwetu batanu na bana twabatizhiwe. Mu kuya kwa kimye, bamama nabo baikele Bakamonyi ba kwa Yehoba.

Inge nalanguluka pa bintu byo napitamo, nsanchila bingi balongo pa kukumbula mepuzho onse o najinga nao kupichila mu kuzhikula Baibolo ne kumpa kuba’mba netangile mikumbu amiwa mwine. Kino kyankwashishe kuyuka’mba byo naitabijilemo kala kechi byafumine mu Baibolo ne. Kuvuluka balongo byo baingijishe Baibolo pa kunkwasha, kundengela ne amiwa kulondela jonkaje jishinda pa kufunjisha bantu.