GEORGIA
Namonanga Nobe Nji na Byonse Bikebewa mu Bwikalo
Ba Madona Kankia
BASEMEKELWE MU 1962
BABATIZHIWE MU 1990
BWIKALO BWABO Kala bajinga mu kipanyi kya Communist mu Georgia, bino luno bakwasha bantu bavula kufunda bukine. Mu 2015, bataainwe ku Sukulu wa Basapwishi ba Bufumu kimye kyo atendekeletu, mu muzhi wa Tbilisi.
NAFUNJILE bukine mu 1989, saka nji mu kipanyi kya Communist mu muzhi wa Senaki mo naikalanga, kabiji najinga mu kije kikatampe kya Supreme Soviet mu Georgia. Kino kije kyajinga byonka biji nzubo ya mizhilo ano moba. Kabiji kwajinga nsongwalume wangipangwizhe, onkao mambo, namonanga nobe nji na byonse bikebewa mu bwikalo.
Bamama ne batata bamfunjishe kutemwa Lesa. Nangwa kya kuba najinga mu kipanyi kya bamulwila ntanda kya Communist, bino naitabijile’mba Lesa koaji. Byo natendekele kufunda Baibolo, nataaine mikumbu ya mepuzho ami onse, kabiji nafuukwilepo kwipana kwi Yehoba. Bino bansemi bami, balunda nami ne mwanamulume wangipangwizhe kechi batemenwe ne.
Kufuukulapo kwikala Kamonyi kwalengejile balongo bami kunkana, kabiji kechi nakonsheshe kutwajijila kwingila nkito ya bumulwila ntanda ne. Nafuukwilwepo kufuma pa nzubo, kusha wamulume wangipangwizhe, kuleka nkito, ne kufumamo mu kipanyi kya Communist ne mu kije kikatampe kya Supreme Soviet. Byo nabatizhiwetu, balongo bami ne balunda nami po po bakizhizhemo kunkatazha. Na mambo a kuba’mba nayukanyikilwe bingi mu muzhi mo naikalanga, navilukijile mu muzhi wa Kutaisi mo nakatendekejile bupainiya.
Bantu inge bangipuzha umvwe kyajingatu bulongo kumanama na mambo a lwitabilo lwami, nkumbula kwa kubula ne kukankazhama amba nafuukwilepo kuba kintu kyawama. Nangwa kya kuba bansemi bami kechi bayukile ene mambo o nafuukwijilepo bino ne, nebasanchila pa kumfunjisha kutemwa Lesa ne bantu. Kino kyankwasha bingi mu bwikalo bwami.