Mwajinga Kwepi Myaka Yonse Yapitapo?

BYO nabatizhiwetu, bakulumpe mu kipwilo bangipwizhe inge nkeba kwingilako pakatampe mu mwingilo wa Lesa. Pa 4 May, mu 1992, nataainweko ku kusambakana ko banengezhezhe kuba’mba bakwashe boba bakebelenga kuya na kwingijila kwakepele basapwishi. Juba jalondejilepo, amiwa ne mulongo ye nasapwilanga nanji javula twayile ku muzhi wa Batumi waikela ku kitulu kya kalunga ka mema mu kibunji kya Ajaria.

Kimye kitanshi kyo nayile mu busapwishi mu muzhi wa Batumi, naumvwinenga bingi moyo. Neshikishenga’mba, ‘Nsakwisamba byepi na bantu?’ Bino nakuminye byankumbwile mwanamukazhi mutanshi ye nasapwijile. Wangipwizhe’mba: “Mwajinga kwepi myaka yonse yapitapo?” Wakebeshe bingi kufunda byavula pa Bakamonyi ba kwa Yehoba kya kuba juba jalondejilepo, waswile kufunda Baibolo.

Saka tukyangye kufumako ku Batumi, betupele makeyala a bantu bakebelenga kufunda Baibolo. Na mambo kuba kechi twayukile bulongo uno muzhi ne, twashikishenga bantu bo twataananga mu mukakwa. Bavula bakankelwenga kwitubuula makeyala o twakebelenga mambo mikwakwa yavula beitumbile mazhina a katataka, pano bino, baswilenga mambo awama o twibasapwijilenga. Mu kimye kichechetu, twatendekele kufunjisha bantu Baibolo, kabiji twibafunjishanga mu mabumba a bantu 10 nangwa 15 pa kimye kimo.

Byo papichiletu bañondo bana kufuma kimye kyo twafikile, bantu kukila pa 40 batendekele kwiya na kupwila kimye kyonse. Onkao mambo, twiipwizhenga’mba, ‘Bañanyi bakatangijilanga bano bantu?’ Na mambo a nkondo yalwile bashilikale bena Georgia na bantu ba mu kibunji kya Abkhazia bakebelenga kwilama abo bene, basapwishi bonse bajinga mu kipwilo kyo najingamo kala bavilukijile ku muzhi wa Batumi. Onkao mambo, kipwilo kya katataka kyalengelwetu mu juba jimo kabiji kyajinga na bakulumpe mu kipwilo ne bapainiya babanda mu lwitabilo.