GEORGIA
Bamwatawami Bakankelwe Kumutulapo!
Marina Kopaliani
BASEMEKELWE MU 1957
BABATIZHIWE MU 1990
BWIKALO BWABO Ba Marina ne bamwatawabo ba Badri basapwilanga na mukoyo aku na kukomesha baana babiji. Ba Badri bajinga mu Kavoto ka Kyalo kabiji baingijijile Yehoba mu bukishinka kufikatu ne byo bafwile mu 2010.
AMIWA ne bamwatawami twamonañene na Bakamonyi pa nzubo ya balunda netu bakinkalankulo mu 1989. Ba Givi Barnadze bafunjishanga bano balunda netu Baibolo kechi bajinga na Baibolo ne, mambo mu oa moba kyakatezhe bingi kutaana Baibolo mu kyalo kya Georgia.
Bintu byo twaumvwine joja juba bitusangajikile bingi, kabiji twakebeshe bingi kwikala na Baibolo. Bamwatawami byo bamonañene na bakolojabo, bebabuujile’mba babena kukeba kwa kutaana Baibolo. Kyamwekele kibakumishe bingi, mambo bakolojabo baambile’mba baji na Baibolo ye bapoteletu katataka wa mu mulaka wa bena Georgia, kabiji bebabuujile’mba basakwibapa uno Baibolo.
Ba Badri byo babwelele ku nzubo, baikele panshi ne kutanga Baibolo kufikatu ne bufuku. Juba jalondejilepo byo babuukile, batwajijile na kutanga. Byo nabwelele ku nzubo kufuma ku nkito, nebataaine baikala babena kutanga Baibolo. Bakankelwe kumutulapo! Onkao mambo, nebabuujile’mba kyakonsha kuwama inge balombako moba acheche ku nkito pa kuba’mba bekaletu panshi ne kupwisha kutanga Baibolo. Ne byo papichiletu moba acheche, bapwishishe kutanga Baibolo yense.
Palutwe kacheche byo twatendekele kufunda mu buku wa kuba’mba The Truth That Leads to Eternal Life (Bukine Butangijila ku Bumi bwa Myaka), twatemenwe bingi mambo twajinga na Baibolo wetu. Kyawamine bingi mambo Mulongo Barnadze witufunjishenga kechi wajinga na Baibolo ne, kabiji atweba kechi twajinga na buku wa The Truth ne. Byo papichile mwaka umo, amiwa ne ba Badri twabatizhiwe.