Bakafunga Bateleko Muchima Kufunjisha Basapwishi

Ku ntendekelo ya ma 1990, bipwilo byavula mu Georgia byajingatu na mukulumpe mu kipwilo umo nangwa nkwasho. Mu oa moba, basapwishi baikalanga mu mapunzha a mwalepa, kimo kimye ne mu mizhi ikwabotu, onkao mambo, pa kupwila, basambakananga mu mabumba ache ache.

Ba Joni Shalamberidze ne ba Pavle Abdushelishvili, bonse babiji baingijilepo mu mapunzha a mwalepa, bebatumine kuya na kukosesha kipwilo mu Telavi, muzhi uji mu kibunji kya Kakheti. Kino kipwilo kyajinga na basapwishi 300, bino kechi kyajingapo na mukulumpe mu kipwilo ne. Kyajinga na mabumba 13 asambakenanga mu mapunzha apusana pusana.

Ba Joni ne ba Pavle bataaine lukatazho lwalengejilenga balongo kubula kufikilamo kwingila mingilo mu kipwilo. Ba Joni baambile’mba: “Balongo bavula bajinga na majimi akatampe a kajo ne majimi a miñanzañanza. Mambo a kuba’mba kyo kisho mu mapunzha a mu mizhi kwikwasha mingilo, balongo batanwanga na bantu babula kwitabila.”—1 Ko. 15:33.

Ba Joni ne ba Pavle babujile balongo amba bafwainwa kwambilanga bakwabo Bakamonyi kwibakwashako mingilo mu majimi. Kuba bino kwakonsheshe kwibalengela kupwanañana na bapopweshi bakwabo saka babena kwingila mu majimi. (Sapwi. 4:9, 10) Ba Joni bashimikizhe’mba: “Balongo mu kipwilo bakwatankene ne kwitemwa bene na bene.” Byo papichile myaka isatu, ba Joni ne ba Pavle bafumineko ku kino kibunji kya Kakheti, kabiji bashileko bakulumpe 5 ne bankwasho 12.

Kupwila Kwibakwashishe Kuwamishako Busendwe bwa Kusapwila

Mwingilo wetu bamukainye kufikatu ne ku ntendekelo ya myaka ya mu ma 1990. Bakamonyi bapwilangatu mu mabumba ache ache kabiji bapwilangatu Lufunjisho lwa Buku lwa Kipwilo ne Kyamba kya Usopa. Nangwa kya kuba kuno kupwila kwibatundaikanga, bino kechi bekunengezhejile kufunjisha basapwishi bya kusapwila ne.

Bintu byapimpwilwetu kimye kafulumende wa Communist kyo afuminepo. Kufumatu kyokya kimye, jibumba ja kwa Yehoba jabuujile bipwilo kutendeka kupwila kwa Sukulu wa Mwingilo wa Lesa pa mulungu pa mulungu.

Bankasa ne kolo babiji, ba Naili Khutsishvili ne ba Lali Alekperova bavuluka byo kyaikalanga pa kuno kupwila. Ba Lali bavuluka’mba: “Twiyowanga bingi. Bonse baumvwine bingi bulongo mambo banyenga nabo batendekele kwambako majashi pa kupwila.”

Ba Naili bashimikizha’mba: “Kimye kimo mu kimwesho, mwina nzubo watangilenga pepala wa byambo pa mutuntamo, kepo banyenga babiji bakonkonsheshe ku kinzhilo. Byo bebabuujile’mba batwele, bafumine pangye ne kutwela mu Nzubo ya Bufumu ne kuya pa mutuntamo.” Ba Lali banungilepo amba: “Nangwa kya kuba kimo kimye kuno kupwila kwalengelanga bantu kuseka, bino kwitukwashishe kuwamishako busendwe bwa kusapwila.”

Kwakebewenga Mabuku Alumbulula Baibolo Avula

Pa myaka yavula, balongo bakopololanga mabuku alumbulula Baibolo kwingijisha munkinyi wa kukopolwelako pa mazubo abo. Na mambo a kuba’mba mabuku avula akebewenga, balongo batendekele kuya ku makampanyi apulinta mabuku ne kulipila mali pa kuba’mba bebapulinchileko magazini.

Balongo baingilanga na ngovu kunengezha magazini wa kutwala ku makampanyi apulintanga mabuku kuba’mba bebapulinchileko. Batuntululanga bulongo magazini wa Kizungu kutwala mu mulaka wa bena Georgia ne kutanchika byambo byonka byo biji mu Kizungu. Bachibaulanga bipikichala kufuma mu magazini wa Kizungu ne kwibilamika pa mapepala po bataipa byambo bya mu mulaka wa bena Georgia. Pa kunemba mutwe wa pa nkupiko, bachibaulanga bisopelo byawama bya mu mapepala a byambo ne kwibilamika pa nkupiko. Inge bapwisha kuba bino, batwalanga uno magazini ku makampanyi kuba’mba bamupulinte.

Bantu byo batendekele kwikala na makompyuta, balongo banyike babiji, abo ba Levani Kopaliani ne ba Leri Mirzashvili bayile ku sukulu na kufunda bya kwingijisha makompyuta. Ba Leri bavuluka’mba: “Kechi twayukile bulongo bya kwingijisha makompyuta ne, kabiji kimo kimye bintu byakatazhanga bingi. Bino Yehoba witukwashishe, kabiji pa kupitapo kimye twatendekele kutaipa ne kulenga bulongo magazini etu.”

Nangwa kya kuba kwajinga makatazho, bino bipwilo mu Georgia byatatwile kutambwila magazini ajinga na bipikichala byawama o bapulinchilanga monka mu kyalo kyabo. Bino mu kuya kwa kimye, magazini atendekele kukepa mambo bantu bakebelenga kufunda bukine bavujile. Bino bakalume ba Yehoba mu Georgia batambwijile bukwasho kufuma ku jibumba ja Yehoba pa kimye kyafwainwa.

Lupimpu Lukatampe Lwaubiwe

Pa kukonkana kwa byalo kwajingako mu 1992 mu muzhi wa St. Petersburg mu Russia, balongo bafumine ku Georgia bamwenepo kimye kya kwisamba na balongo baimenejilengako musampi wa ku Germany. Ba Genadi Gudadze bashimikizha’mba: “Betulumbulwijile byo twafwainwe kwingila mwingilo wa kutuntulula. Betubuujile’mba baketutumina bantu ba kwiya na kwitufunjisha bya kutuntulula.”

Kupulinta mabuku alumbulula Baibolo mu mulaka wa bena Georgia kwakatezhe bingi. Bakamonyi ba kwa Yehoba baji na mutanchi wa pa kompyuta utelwa’mba MEPS wibakwasha kupulinta mabuku mu milaka yavula pa kimye kimo. Bino mulaka wa bena Georgia kechi wajingapo pa uno mutanchi ne, mambo uji na bisopelo byapusanako na milaka ikwabo. Onkao mambo, batendekele kulenga bisopelo bya uno mulaka pa kompyuta pa kuba’mba naye bamupulintenga.

Kala ku mpelo ya myaka ya mu ma 1970, kisemi kya ba Datikashvili kyavilukijile ku United States. Byo papichile kimye, mwanabo wamukazhi aye Marina wafunjile bukine. Balongo pa musampi mu Brooklyn byo batendekele kutwezha bisopelo bya mu mulaka wa bena Georgia mu mutanchi wa MEPS pa kompyuta, Marina wibakwashishe bingi na uno mwingilo. Byo bapwishishe, bapulinchile matalakiti ne buloshuwa wa kuba’mba “Look! I Am Making All Things New” mu Germany.

Bebakwashishe Kutendeka Mwingilo wa Kutuntulula

Mu 1993, ba Michael Fleckenstein ne benakwabo baSilvia baishile mu muzhi wa Tbilisi kufuma ku musampi wa Germany na kunengezha ofweshi wa bantuntuluzhi. Ba Michael bashimikizha’mba: “Navulukilenga byo twisambilepo pa kupwila kwajingako mu St. Petersburg. Byo twafikile mu Tbilisi saka papita ne bañondo 18, twakuminye bingi kutaana’mba kwajinga jibumba ja bantuntuluzhi jaingijilenga bulongo.”

Byo papichile bañondo bacheche, kwalengelwe jibumba ja bantuntuluzhi 11 baingijijilenga mu nzubo. Na mambo a kuba’mba jibumba ja Yehoba jafunjishenga bano bantuntuluzhi, bipwilo byatendekele kutambwila kajo ka ku mupashi pa kimye kyafwainwa.

Mashinda o Batambwilangamo Mabuku Alumbulula Baibolo mu Kimye kya Milukuchi

Kafulumende wa Soviet Union byo bamushinjile, mu byalo byavula byalamwanga na uno kafulumende mwaikele milukuchi, kubikapotu ne kyalo kya Georgia. Kino kyalengejile ñendelo kukatazha, kikatakata kufuma mu kyalo kimo kuya mu kikwabo.

Juba jimo, mu November 1994, ba Aleko Gvritishvili ne balongo babiji bafuminenga mu kyalo kimo kuya mu kyalo kikwabo, bebemikile ku jibumba jajinga na mata ne kwibabuula’mba bafume mu motoka wabo. Ba Aleko bashimikizha’mba: “Bano banabalume bazhingijile bingi byo bamwene mabuku etu. Onkao mambo, betutanchikile nobe babena kukeba kwitwipaya. Twalombele kwi Yehoba kwitukwasha. Byo papichile maola abiji, umo pe abo witwambijile’mba, ‘Tolai mabuku enu muyenga, bino inge mukabweleko jibiji kuno, tukemusokela motoka ne kwimwipaya.’”

Nangwa byonkabyo, balongo kechi balekele kutwala mabuku ne. Mulongo Zaza Jikurashvili wipaine kutwala mabuku mu kyalo kya Georgia waambile’mba: “Twayukile’mba balongo bakebelenga kajo ka ku mupashi. Benakwetu nabo betukwashanga bingi mu uno mwingilo.”

Ba Aleko baambile’mba: “Balongo bavula batwalanga mabuku bajinga na bisemi.” Ki ka kibalengejile kutwajijila kwingila uno mwingilo wabikilenga bumi bwabo mu kizumba? Baambile’mba: “Kine kintu kyalengelanga ke kutemwa Yehoba ne kumusanchila. Kabiji twakebele kumwesha byo twatemwa balongo betu byonkatu Yehoba byo ebatemwa.”

Na mambo a kwipana kwa bano balongo, bipwilo byatwajijile kutambwila mabuku mu myaka yonse ya milukuchi. Palutwe kacheche, balongo bataainepo mashinda awama mwa kupichila kufuma ku Germany kuya ku Georgia.

Kushonkena Kwatundaikile Bingi Balongo

Milukuchi ya bumulwila ntanda byo yapwile mu 1995, Bakamonyi banengezhezhe kushonkena kwa nkambi kutanshi. Mu 1996, bantu 6,000 bayile na kushonkena mu mapunzha asatu: mu muzhi wa Gori, mu muzhi wa Marneuli, ne wa Tsnori.

Bantu bataainwe ku kushonkena kwaikejile kwipi na muzhi wa Gori, kechi balubilemo bintu byajingako ne. Patanshi balongo bazhinaukilenga inge bantu bakonsheshe kuyula mu kishimikwa kikatampe kimye kya Kivuluko. Pano pa kikye kimye baketekejile’mba ku kushonkena kukatanwa bantu kukila pa 2,000, onkao mambo, bakankelwe kutana kishimikwa kyabaya kya kushonkenamo. Bafuukwilepo kwikala na kushonkena pangye ku mpunzha yawama ya mitumba yajinga kwipi na muzhi mukatampe.

Mulongo Kako Lomidze wajinga mu Kavoto ka Kushonkena, waambile’mba: “Pa moba onse asatu inge mutanchi wa kushonkena wapwa, balongo ne banyenga besambanga ne kwimba nyimbo. Kyamwekeletu patoka’mba bantu ba Lesa betemenwe bene na bene kabiji bakwatankene bingi.” —Yoa. 13:35.

Bakalama Benda Bakwashishe Mwingilo Kuyilako Palutwe

Kutendeka mu 1996, bakalama benda batendekele kufwakesha bipwilo byonse mu kyalo ne kwikalapo mulungu mutuntulu pa kipwilo kimo. Pa kuba’mba luno lunengezho lwingile bulongo, batongwejilepo bakalama benda bakwabo kununga pa bajingapo kala mu Georgia.

Kwa kubula ne kuzhinaukatu ne, mwingilo waingijilenga bano bakalama ‘na mambo a butemwe’ ne bukishinka wakwashishe bipwilo kukomenako ne kulondela bulongo mikambizho ya mu jibumba ja Lesa. (1 Tesa. 1:3) Kutendeka mu 1990 kufika mu 1997, basapwishi bavujijileko bingi. Mu 1990, kwajingatu basapwishi 904 basapwijilenga mambo awama, bino byo papichiletu myaka itanu na ibiji, basapwishi bafikile 11,082.

Mwingilo wa kusapwila watendekele myaka ya kala wayijileko bingi palutwe, kabiji wakumbene kyalo kyonse. Bino palutwe kacheche, Yehoba waubijile bantu banji mu Georgia bintu bikwabo byawama.