Nanchi Kine Mpila ya Kukonkana kwa Byalo Yakonsha Kukwatankanya Bantu Nyi?—Baibolo Waambapo’mba Ka?

Bantu pepi na mamilyonyi 5 bo baketekelwa kutamba mpila itelwa’mba FIFA World Cup yatendekele pa 20 November kabiji ikapwa pa 18 December 2022. Bantu bavula balanguluka’mba makayo a uno mutundu kechi ajitu na bulume bwa kukwatankanya bantu kimye kyo babena kutambatu ne, pakuba akonsha ne kwibalengela kwikala na lusekelo.

• Nelson Mandela wajinga ndamakyalo mu South Africa waambile’mba: “Makayo a kwikyombesha aji na bulume bwa kupimpula ntanda yonse. Aji na bulume bwa kutundaika bantu kwiubila bintu byawama. Aji na bulume bwa kukwatankanya bantu mu jishinda jawama.”

• Mukulumpe wa FIFA aye Gianni Infantino waambile’mba: “Mpila . . . ikwatankanya bantu ne kwibalengela kusangalala, ikwatankanya bantu mu bintu byo bakeba, ilengela bantu kwitemwa ne kwibakwatankanya ne mu [bintutu] bikwabo byapusana pusana.”a

Nanchi Mpila ya Kukonkana kwa Byalo nangwa makayotu akwabo a kwikyombesha akonsha kulengela bantu kukwatankana ne kwikala na lusekelo nyi? Nanchi kine bantu bakekalapo mu mutende ne kukwatankana nyi?

Nanchi kine mpila ikwatankanya bantu nyi?

Mpila ya Kukonkana kwa Byalo ilengela bantu kulangulaka pa bintu byavula bingi kechi pa mpilatu ne. Ano makayo aleta mapata pa bwikalo ne bya bumulwilantanda byaamba pa luusa lwa bantu, misalululo ya bikoba ne buyanji.

Nangwa byonkabyo, bantu bavula batemwa kutamba makayo a kukonkana kwa byalo nabiji ino Mpila. Ano makayo kechi akonsha kukwatankanya bantu kikupu kwesakana na byo balanguluka ne. Pakuba ano makayo atundaikatu mabano ne byubilo bikwabo bibena kumwesha’mba tuji mu kimye kitelwa’mba “moba a kupelako” kwesekana na byaamba Baibolo.—2 Timoti 3:1-5.

Ukakwatankanya bantu bonse ntanda yonse

Baibolo witubuula mwine muntu ukakwatankanya bantu bonse ntanda yonse. Mu Baibolo muji milaye ya kuba’mba bantu bonse pa ntanda bakakwatankana mu kafulumende wa mwiulu utelwa’mba: “Bufumu bwa Lesa.”—Luka 4:43; Mateo 6:10.

Mfumu wa buno Bufumu aye Yesu Kilishitu ukalengela mutende kukumbana pa ntanda ponse. Baibolo waamba’mba:

• “Baoloka bakekalanga bulongo, ne mutende ukavula.”—Salamo 72:7.

• “Ukapokolola muyanji ukeba bukwasho . . . Ukebapokolola ku lumanamo ne ku bukapondo.”—Salamo 72:12, 14.

Nangwatu mu ano moba, bintu byafunjishanga Yesu byakwatankanya bantu bavula bingi mu byalo 239. Baleka kushikwa bantu bakwabo. Pa kuba’mba muyukilepo byavula, tangai bibaaba biji na mutwe wa kuba’mba: “Bya Kupwisha Lupato.”