Kukwatankana Kwa Bena Kilishitu Bakine Kwakonsha Kwiyako Byepi?
1 Kika kyakonsha kukwatankanya bantu kukilaila pa 6 milyonyi bafuma mu byalo 234 ne mabumba a milaka nobe 380? Kupopwela Yehoba Lesa ko kwakonsha kuba bino kwapwa. (Mika 2:12; 4:1-3) Bakamonyi bakwa Yehoba bayuka kupichila mu bintu bibamwekela kuba’mba lelo jino kuji kukwatankana kwa kine kwa bwina Kilishitu. Byo tuji “kisaka kimo” ne ‘kafunga wetu umo,’ twasalapo kukana mupashi wa ino ntanda wa mabano—Yoa. 10:16; Efi. 2:2.
2 Nkebelo ya Lesa ibula kukankalwa kufikizhiwa ke ya kuba’mba bilengwa byonse bya maana bikwatankane mu mpopwelo ya kine. (Lum. 5:13) Yesu byo ayukile buneme bwa kino, walombejileko baana banji ba bwanga amba bakwatankane. (Yoa. 17:20, 21) Nga atweba pa muntu pa muntu twakonsha kuba byepi pa kuba’mba tukoseshe kukwatankana mu kipwilo kya bwina Kilishitu?
3 Kukwatankana Byo Kwiyako: Kwakubula Byambo bya Lesa ne mupashi wanji, kukwatankana kwa bwina Kilishitu kechi kwakonsha kwikalako ne. Kulondela bintu byo tutanga mu Baibolo kuswisha mupashi wa Lesa kwitutangijila bulongo mu bumi bwetu bonse. Kino kitulengela ‘kulama bumuchima umo wa mupashi mu lufungwa wa mutende.’ (Efi. 4:3) Kitutundaika kwitekenya atweba bene na bene mu butemwe. (Kolo. 3:13, 14; 1 Pe. 4:8) Abya mukosesha kukwatankana kupichila mu kulangulukalangulukapo pa Byambo bya Lesa pa juba pa juba nyi?
4 Mwingilo ye twapewa wa kusapwila ne kulenga baana ba bwanga naye witukwatankenya pamo. Umvwe twaingila na bakwetu mu mwingilo wa bwina Kilishitu, ‘kasa twibilwila na muchima umo abya byaitabilwa bya mambo awama,’ twikala “ba kwingila nabo mu mwingilo wa kwingijila bukine.” (Fili. 1:27; 3 Yoa. 8) Umvwe ke tube bino, kukwatankana kwa na butemwe kwa mu kipwilo kukoselako. Nga mambo ka a kubujila kwitako umo ye mukyangye kwingilapo nanji katataka kuba’mba muye nanji mu mwingilo wa mu bujimi uno mulungu?
5 Byo twashukwapo pa kwikala mu bwanabwankazhi bumotu bujiko bwa kine bwa ntanda yonse lelo jino! (1 Pe. 5:9) Katatakatu papo, bantu bavula bemwenejile bene kuno kukwatankana kwa ntanda yonse pa kupwila Kukatampe kwa Mikoka kwa “Pai Lesa Lukumo.” Twayai atweba bonse pa muntu pa muntu twibikeko kukosesha kuno kukwatankana kwawama byonkabye kupichila mu kutanga Byambo bya Lesa pa juba pa juba, kupwisha bulongo makatazho aleta mabano, ne kusapwila mambo awama “na muchima umo.”—Loma 15:6.