Lamawizhainga “Buumo bwa Mupashi”
MUTUMWA PAULO watundaikile bena Kilishitu ba mu Efisesa amba “saka mwitekenya anwe bene na bene mu butemwe, ne kwibikishako kulama buumo bwa mupashi mu mutende ulengela kukwatankana.”—Efi. 4:2, 3.
“Buumo” nangwa’mba lukwatankano lwetu lwaikalako na mambo a “mupashi.” Kino kibena kulumbulula’mba bulume bwa Lesa bo bwitulengela kukwatankana. Pano bino Paulo waambile ne kuba’mba twafwainwa kwibulamawizhanga. Bañanyi bafwainwa kuba bino? Bonsetu bena Kilishitu bafwainwa “kulama buumo bwa mupashi mu mutende ulengela kukwatankana.”
Twambe’mba muntu wimupa motoka. Ñanyi wafwainwa kumuwamishanga? Mukumbu bonse twamuyuka. Kechi kyayilamo kupamo mambo wimupele motoka inge motoka wafwa ne.
Kyo kimotu, atweba bonse twafwainwa kulamawizhanga buumo bwetu, nangwa kya kuba kukwatankana kwa bena Kilishitu ke bupe bwitupa Lesa. Inge twizhingijisha na mulongo nangwa nyenga, twafwainwa kwiipuzha atwe bene amba, ‘Nanchi mbena kwibikako kulama buumo bwa mupashi kupichila mu kukebesha kupwana nanji nyi?’
‘IBIKISHAINGAKO KULAMAWIZHA’ LUKWATANKANO
Byonka byaambile Paulo, pa bimye bimo twafwainwa kwibikishako kulama buumo bwa mupashi, kikatakata inge betuzhingijisha ku mulongo nangwa nyenga. Pano nanchi kulamawizha mutende kulumbulula’mba kimye kyonse kyo betuzhingijisha ku mulongo nangwa nyenga tukayanga na kumumona’mba tupwane nyi? Ine. Mwafwainwa kwishikisha’mba, ‘Nanchi kuya na kwisamba nanji pa kino kintu kusakutundaika mutende nyi, inyi kusakuletatu lutobo?’ Javula kyawama bingi kulubakotu nangwa kumulekelako mambo.—Maana 19:11; Mako 11:25.
Mwafwainwa kwishikisha’mba, ‘Nanchi kuya na kwisamba nanji pa kino kintu kusakutundaika mutende nyi, inyi kusakuletatu lutobo?
Kabiji mutumwa Paulo wanembele’mba, twafwainwa ‘kwitekenyanga atwe bene na bene mu butemwe.’ (Efi. 4:2) Buku umo waamba pa bino byambo amba bilumbulula “kwibatambwila byonka byo baji.” Kino kibena kulumbulula’mba twafwainwa kuswa kuba’mba bakwetu ba mu lwitabilo bambulwakulumbuluka byonka byo tuji. Bonsetu tubena kwibikako bingi kuvwala “bumuntu bupya.” (Efi. 4:23, 24) Bino kafwako nangwa umo ubula kulubankanya ne. (Loma 3:23) Inge twaswa kino kishinka, kiketupelelanga kwitekenya atweba bene na bene, kulekelako bakwetu mambo ne “kulama buumo bwa mupashi.”
Inge twalekelako bakwetu mambo ne kulubako, tukekala na “mutende ulengela kukwatankana” mu kipwilo. Kyambo kya Kingiliki kyatuntululwa’mba “ulengela kukwatankana” pa Efisesa 4:3, kyo kyatuntululwa ne kuba’mba “mishipeshipe” pa Kolose 2:19. Mishipeshipe ke tubisisa twakwatankanya bikupa mu manungi. Kyo kimotu, mutende ne kutemwa balongo ne banyenga kwitulengela kutwajijila kwikala balunda nabo nangwa kya kuba twapusenamo nabo pa bintu bimo.
Onkao mambo, inge mukwetu wa mu lwitabilo wituzhingijisha, twafwainwa kwibikishako kutwajijila kumubila kifyele, kechi kumufiila mfika ne. (Kolo. 3:12) Na mambo a kuba’mba bonse twibandengamambo, ne anweba pa kimye kimo mwafichishepo bakwenu ku muchima. Kuvuluka kino kishinka kukemulengelanga “kwibikishako kulama buumo bwa mupashi.”