Kwatankanai Mwingijilenga Pamo
1 Jinga jomwakumyapo kala pamambo andengelo yalengelwamo muntu? (Sala. 139:14) Kibese kyonse kyamubiji kingijila pamo nabibese bikwabo. Byambo bya Lesa byafwanyikizha kipwilo kyabwina Kilishitu kumubiji wingijila pamo. Mwiaye Mutwe, Kilishitu, bonse bantu mukipwilo ‘mobakwatankena pamo ne kusambakana ke umo konka ku manungi onse.’ (Efi. 4:16a) Byonka bino, Yehoba byobyoengijishisha nebantu banji bakwatankana kwingila mingilo yawama.
2 Bantu bamukipwilo kyamukitota-myaka kitanshi baingijile “na muchima umo” mukwikwasha bene nabene kumupashi nekumubiji. (Byu. 2:44-47) Nalutangijilo lwa Yehoba, bakwatankenejile pamo kimye bapichilenga mumeseko akatampe nekwiashinda. (Byu. 4:24-31) Basapwijilenga mambo awama a Bufumu konse konse kobailenga, baendelenga miseke yalepa bingi nakusapwila kumapunzha akwalepa ayukanyikilwe’mba kine basapwijilemo mambo awama. (Kolo. 1:23) Muano moba alelo, bipwilo byabwina Kilishitu mukukwatankena pamo byaingila pabaya bingi ino yonka mingilo. Nga kika kyalengela kukwatankena pamo?
3 Lufunjisho lwa Lesa Lwibaleta Pamo: Kuzhokoloka ntanda yonse, twakwatankana bingi mumpopwelo yetu. Twakwatankana byepi? Tuji nalunengezho lwa Yehoba loetupelamo ‘kajo kakumupashi pakimye pafwainwa.’ (Mat. 24:45) Kabiji tusanchila bingi “byabupetu [mu banabalume, NW]” byoetupa kwikala bafunjishi mukipwilo. Byotutambwila kajo kakumupashi ketunengezhezha Yehoba, tuilako palutwe mukumvwisha Byambo bya Lesa nekukebesha kulonda Yesu byotuji bantu bamulondela. Twafwainwa kutwajijila kufunda Byambo bya Lesa namukoyo kuba’mba twikale ‘balumbuluka pamo nemulwitabilo.’ (Efi. 4:8, 11-13) Abya mubena kutundaika kukwatankana pamo kumupashi kupichila mukutanga Baibolo pajuba pajubanyi?
4 Bakwatankana Mukupwañena Pamo Kwabwina Kilishitu: Butemwe bwitupwanya mukukwatankena pamo pakupwila kwabwina Kilishitu. Pakupwila, popo ‘twilanguluka atwe bene na bene.’ (Hebe. 10:24, 25) Kino kechi kilumbululatu kumona balongo betu amba bakosane, kikebewa kwibayuka bulongo, kwibamona byonka Yehoba byoebamona, amba banema. (Hagai 2:7) Byotuteleka kubyobelumbulwila luketekelo lwabo, butemwe bwetu mwi abo builako palutwe kabiji kileta kukwatankana. Nanchi bakwenu bemuyuka’mba muya kukupwila kwakipwilonyi?
5 Pamo Nabakwenu Bamwingilo Mubujimi: Kusapwila mambo awama nabakwetu bamulwitabilo kwituleta pamo mukuba kyaswa muchima wa Lesa. Mutumwa Paulo wanemekele bingi bakwabo “na mambo a bufumu bwa Lesa.” (Kolo. 4:11) Kwisamba pabintu byotwapichilemo nekwikwasha atweba bene nabene mubusapwishi kwitulengela kwingila mwingilo wetu yebetupa wabwina Kilishitu nekwitukwasha kwikala namuchima umo.—Kolo. 3:14.
6 Mupashi Wazhila Witukwatankanya Pamo: Byotwibikishako atweba bene kuba kyaswa muchima wanji, Yehoba witutangijila namupashi wanji. Uno yewitukwasha kupwisha mepatulo nekukwatankena pamo jibiji namuchima umo. (Sala. 133:1) Witukwasha ‘kutesha muchima kulama bumuchima umo wa mupashi mu lufungwa wa mutende.’ (Efi. 4:3) Atweba umo umo twafwainwa kutundaika buumo buji pakachi kabantu ba Lesa umvwe twaikala nabipangwa byamupashi byotwingila nabakwetu.—Nga. 5:22, 23.
7 Kwingila mukukwatankena pamo mwiaye mutwe Kilishitu “mubiji uya na kubaya ne kwikomesha mwine monka mu butemwe.” (Efi. 4:16b) Kunungapo, kutumbijika Yehoba, “Lesa wa mutende.”—Loma 16:20.