Nanchi Kilumbulula ka Kwikala Mwina Kilishitu?—Baibolo Waambapo’mba Ka?

Lelo jino bantu bavula bamba’mba bena Kilishitu; pano bino, boba bakwabo bintu byatama. Bamo betemwatu abo bene, kechi baji na bukishinka ne, kabiji kechi baji na lusa ne. Bantu bamo kechi bekala bakishinka ku benakwabo ne. Bino byubilo bilengela bantu bamo kwipuzha’mba: ‘Nanchi kine kilumbulula ka kwikala mwina Kilishitu?’

Byo kilumbulula kwikala mwina Kilishitu

Kyapeela bingi muntu kwitela’mba mwina Kilishitu. Bino kwikala mwina Kilishitu mwavwangwa bintu byavula. Kwesakana na byaamba Baibolo, mwina Kilishitu ke mwana wa bwanga wa kwa Yesu Kilishitu. (Byubilo 11:26) Yesu aye mwine waambile’mba: “Umvwe saka mulama byambo byami, ko kuba’mba mwi baana bami ba bwanga.” (Yoano 8:31) Ibyo kuba’mba kafwako muntu wakonsha kukookela byambo bya kwa Yesu sukasuka ne. Pano bino, mwina Kilishitu wibikako kulondela byafunjishanga Yesu kabiji umwesha bino kupichila mu byo oba. Bino byo bintu bimo byuba bena Kilishitu.

Bena Kilishitu batemwa bakwabo

Byaambile Yesu: “Mbena kwimupa mukambizho mupya, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.”—Yoano 13:34, 35.

Yesu byo aubile: Yesu watemenwe bantu bonse kikale bajinga bayanji, banonshi, batumbalele nangwa bafumine ku mpunzha ya mutundu ka. Wabukile bakolwa, wajishishe bajinga na nzala kabiji wafwijile ne bantu.—Mateo 14:14-21; 20:28.

Byuba bena Kilishitu: Bena Kilishitu bamwesha’mba batemwa bantu bonse kupichila mu kwikala bampanyi, kubula kwikala na misalululo ne kulekelako bakwabo mambo. Bakwasha bantu bakajilwa kabiji bapana bintu byabo byanema pa kuba’mba bakwashe bakwabo.—1 Yoano 3:16.

Bena Kilishitu bakishinka

Byaambile Yesu: “Amiwa yami . . . bukine.”—Yoano 14:6.

Yesu byo aubile: Yesu wajinga wa kishinka mu byonse byo aambanga ne kuba. Kechi wajimbaikanga bantu nangwa kwibalengela kuketekela bintu bya bubela ne. Bantu bamuyukile’mba wajinga wa kishinka nangwatu mu makatazho.—Mateo 22:16; 26:63-67.

Byuba bena Kilishitu: Bena Kilishitu kechi babepa ne. Bapana misonko, kechi beba ne, kabiji bengila na ngovu pa nkito kwesakana na maola ne mali o baumvwañene na bakulumpe ba nkito. (Loma 13:5-7; Efisesa 4:28) Kechi babepa pa kuba’mba bamwenemo nsabo, kwingijisha mashinda a bujimuku pa kunemba mpeso, kunemba bya bubela pa mapepala a kwipwizhapo kutwela nkito nangwa pa mapepalatu akwabo ne.—Bahebelu 13:18.

Bena Kilishitu bobila bakwabo lusa

Byaambile Yesu: “Iyai ko nji, anweba bonse bakooka ne kunemenwa, ne amiwa nkemukokolosha. Sendai kikonkoji kyami ne kufunda kwi amiwa, mambo nekimote kabiji nakooka muchima, ne anweba mukakokoloka. Mambo kikonkoji kyami kyapeela, ne kipe kyami kyapeela.”—Mateo 11:28-30.

Yesu byo aubile: Yesu wajinga na lusa kabiji walengelanga bantu kukasuluka. Watambwilanga baana ba bacheche, watekeneshanga bapopomenwa kabiji wanemekele bantu.—Mako 10:13-15; Luka 9:11.

Byuba bena Kilishitu: Bena Kilishitu bengijisha ñambilo yawama ku bakwabo, kechi baji na mwenga ne. (Efisesa 4:29, 31, 32) Bata muchima bakwabo ne kwibakwasha.—Ngalatiya 6:10.

Bena Kilishitu bakishinka ku benakwabo

Byaambile Yesu: “Akya kyasambakanya Lesa, muntu kechi ekyabanye ne.”—Mako 10:9.

Yesu byo aubile: Nangwa kya kuba Yesu kechi wasongwele ne, pano bino, watundaikanga bantu baji mu masongola kwikala bakishinka ku benakwabo. (Mateo 19:9) Wibajimwineko pa bintu byakonsha konauna masongola abo.—Mateo 5:28.

Byuba bena Kilishitu: Bena Kilishitu bachinuzhuka byubilo byonauna masongola. (Bahebelu 13:4) Bantu baji mu masongola betemwa ne kwimwesha mushingi.—Efisesa 5:28, 33.