BANYIKE BEPUZHA’MBA
Mambo ka o Nafwainwa Kukookela Mizhilo ya pa Nzubo?
Nanchi kimukatazha kukookela mizhilo ya pa nzubo nyi? Kino kibaaba ne mapepala a kunembapo mikumbu bisakwimukwasha kuyuka bya kwisamba na bansemi benu.
Ndangulukilo yawama
Bubela: Inge watendeka kwiikela, ukeubilanga byo ukeba kwa kubula kulondela mizhilo.
Kishinka: Nangwatu inge watendeka kwiikela ukakookelanga mizhilo.Ukatwajijila kukookela mizhilo ya bantu, kampe bakulumpe ba nkito, ye usonkelako nzubo, nangwa kafulumende. Danielle uji na myaka 19 waambile’mba: “Banyike bavula bakankalwa kukookela mizhilo ya pa nzubo bakakumya bingi umvwe batendeka kwiikela.”
Baibolo waamba’mba: Mwafwainwa “kukookela makafulumende ne ba luusa.” (Titusa 3:1) Kukookela mizhilo ya bansemi benu kwanema mambo ikemukwasha mu mashinda avula inge mwakoma.
Byo mwakonsha kuba: Monainga amba mizhilo ya bansemi benu yawama. Jeremy waambile’mba: “Mizhilo ya bansemi bami ya nkwashishe kusala bulongo balunda ne kuyuka bya kwingijisha kimye. Kabiji yankwashishe kubula kutambanga TV kimye kya baya, ne makayo a pa vidyo kabiji yankwasha kusala bintu byawama bindetela lusekelo ne luno.”
Jishinda jawama kwisambilamo
Wakonsha kuba byepi inge wakankalwa kuyuka ene mambo o muzhilo kyo aikeleko? Nsongwakazhi wa jizhina ja Tamara waambile’mba: “Bansemi bami banswishanga kuya ku kyalo kingi, bino inge nabwela kechi banswishishanga kufuma pa nzubo ne kuya kuji konse ne.”
Inge byo byo kiji kwi obewa, nanchi kyatama kwisamba na bansemi bobe pa uno muzhilo nyi? Kechi kyatama ne. Kyanema ke kuyuka kimye kyakwisamba nabo ne jishinda ja kwibasolomokelamo.
Kimye. Amanda waambile’mba: “Inge kya kuba ukookela mizhilo ya bansemi kimye kyonse kabiji nabo bakuketekela po po wakonsha kwisamba nabo pa kuba’mba bapimpuleko uno muzhilo.”
Nsongwakazhi wa jishina ja Daria waitabizhe bino. Waambile’mba: “Bamama baswile kupimpulako muzhilo mambo a kuba’mba ne bakookelanga kimye kyonse.” Vuluka’mba bintu byo uba byo bilengela bantu kukuketekela, kechi kwibambila’mba bakuketekele ne.
Kwikala mu nzubo mo babula kulondela mizhilo kijitu nobe ndeke ibena kwikila mu kibanza kwa kubula kulondela mizhilo
Baibolo waamba’mba: “Lama mikambizho ya bashobe, kabiji kange ukane bikufunjisha bainobe ne.” (Byambo bya Maana 6:20) Umvwe keukookele bino byambo, bansemi bobe bakakuketekela kabiji kikakupelela kwisamba nabo.
Bya kwisamba nabo: Steven waambile’mba: “Kwamba na mushingi ne kutekanya jo jishinda jawama kwisambilamo na bansemi kechi kwinyinyisha ne kupatauka ne.”
Daria ye twaambapo ku ntendekelo waswisha bino. Waambile’mba: “Inge natendeka kwipachika ne bamama kafwako byawama bifumamo ne. Kimye kimo kino kilengela bamama bakizhamo ne kukosesha mizhilo.”
Baibolo waamba’mba: “Muntu wakosama usolola bukaji bwanji bonse, Bino muntu wa maana wikanya.” (Byambo bya Maana 29:11) Kwikanya kukemukwasha bingi pa nzubo, ku sukulu, ku nkito ne kuji konsetu.
Byo wakonsha kuba: Wafwainwa patanshi kulangulukapo saka ukyangye kwamba. Kwamba saka wazhingila kwakonsha kulengela bansemi baleka ku kuketekala. O ene mambo Baibolo o aambila’mba “Awa ubanda kuzhingila ye wa milangwe.”—Byambo bya Maana 14:29.
Byakonsha ku kukwasha: Wafwainwa kwingijisha pepala wa kunembapo mikumbu pa kulanguluka pa mizhilo, kabiji inge kyakonsheka ne kwisambapo na bansemi bobe.