Nsongwalume ubena kutala bantu babena kutwela mu nzubo ya Bufumu

BANYIKE BEPUZHA’MBA

Mambo ka a Kuyila na Kupwila pa Nzubo ya Bufumu?

Bakamonyi ba kwa Yehoba bekala na kupwila mu mazubo a Bufumu jibiji mu mulungu. Ñanyi bintu byubiwa pa nzubo ya Bufumu? Kabiji mwafwainwa kumwenamo byepi inge mwatanwako?

Ñanyi bintu byubiwa pa Nzubo ya Bufumu?

Pa Nzubo ya Bufumu yo mpunzha po tufunjila bintu biji mu Baibolo. Kupwila kwikela pa Nzubo ya Bufumu kukemukwasha bingi:

kufunda bukine bwaamba pe Lesa.
kumvwisha bintu bibena kumweka mu ntanda lelo.
kwikala muntu wawama.
kutaana balunda bawama.

Bishinka bikwabo: Mpunzha papwijila Bakamonyi ba kwa Yehoba itelwa’mba Nzubo ya Bufumu mambo Bufumu bwa Lesa ye mutwe javula ye bambapo bingi.—Mateo 6:9, 10; 24:14; Luka 4:43.

Mambo ka o mwafwainwa kuya na kupwila?

Bishinka byo mukafunda bikemukwasha bingi. Mafunde a mu Baibolo o besambapo pa kupwila kwa Bakamonyi ba kwa Yehoba akemukwasha bingi anweba ‘kwikala na maana.’ (Byambo bya Maana 4:5) Akino kibena kulumbulula’mba Baibolo wafwainwa kwimukwasha kufuukulanga kuba bintu byawama mu bwikalo bwenu. Wafwainwa ne kwimukwasha kukumbula mepuzho anema bingi nabiji ano:

Mitwe iji panshipo ke imo pa majashi o bamba ku mpelo ya mulungu:

Mambo ka o Twafwainwa Kutangijilwanga na Baibolo?
Kwepi ko Mwakonsha Kutaana Bukwasho mu Bimye bya Malwa?
Bintu Bibena Kwitubila Bufumu bwa Lesa Lelo Jino

Brenda waambile’mba: “Mukwetu mo twafunjilanga sukulu umo waishile na kupwila. Waikele pamo na kisemi kyami kabiji twaingijishe pamo nanji mabuku etu. Kupwila byo kwapwile, wambuujile’mba waji kutemwa bingi mikumbu yaji kukumbulanga bantu kimye kya majashi a kwisamba na luonde. Kabiji waambile ne kuba’mba ku chechi ko aya kechi baji na mabuku a kufundamo nabiji o tuji nao atweba ne.”

Mwayuka nyi? Muntu yense wakasuluka kwikala ponse po akeba mu nzubo ya Bufumu. Kabiji kechi kwikala kupishamo nsanyi amba baiya na kupwila babikemo mali ne.

Balongo ne banyenga bakemutundaika bingi. Baibolo walumbulula ene mambo bena Kilishitu o bafwainwa kupwilanga pamo kuba’mba “twitundaikenga atwe bene na bene.” (Bahebelu 10:24, 25) Kupwila pamo na bantu bakebesha kutokesha Lesa ku muchima ne bakwabo kukila byo beta muchima abo bene, ke kintu kyawama bingi kyabula mu ino ntanda muji bantu betatu muchima abo bene kwapwa.

Elisa waambile’mba: “Inge naingila juba jonse mpopomenwa ne kukooka bingi, bino inge nataanwa na bantu pa Nzubo ya Bufumu kimye kyonse bandengela kusangalala bingi. Inge twapwisha kupwila pa kuya ku nzubo, ntemwa bingi ne kwinengezha mwa kukoobila inge bwakya.

Mwayuka nyi? Kuji bipwilo bya Bakamonyi ba kwa Yehoba mwaya ntanda kukila pa 120,000 kabiji bapwijila pa mapunzha kukila pa 60,000. Pa mwaka pa mwaka, babena kushimika Mazubo a Bufumu kukila pa 1,500 pa kuba’mba mupwijilenga bantu bavula babena kutanwa ku kupwila.a

Byambapo bakwenu

Jessica waambile’mba: “Byo najinga pa sukulu, mukwetu mo twafunjilanga waishile na kupwila pa moba amo. Kabiji watemenwe bingi kuyuka bantu ba mafumbi apusana pusana bonse babena kufunda Baibolo pamo. Katatakatu papo nasendeleko mukulumpe wami wa nkito ku kupwila kabiji wakuminye bingi byo twaingijishenga Baibolo pa kupwila. Byo namwene’mba watemenwe kupwila ne amiwa natemenwe bingi kupwila.”

Timothy waambile’mba: “Nemwena kuba’mba kutaanwa ku kupwila kunkwasha kubula kwakamwa pa bintu bimo ne kubula kwikala na bijikila. Ku kupwila tufunda byo twafwainwa kwikala, bya kwikala muntu wawama ne bintutu bikwabo. Kimye kyonse inge nafuma na kupwila pa Nzubo ya Bufumu, ntundaikwa bingi ne kukasuluka mu milanguluko.”

Jacob waambile’mba: “Muntu umo ye naichile ku kupwila pa kupwisha kupwila waambile’mba: ‘Naji kwiyatu na kupwila kuba’mba mmone pa kulengulwila bintu byo mwaitabilamo. Pakuba amiwa nanchi yami naitabila mu bintu bya bubela.’ Kabiji watemenwe bingi Bakamonyi ba kwa Yehoba byo bakasuluka. Uno yenka muntu waambile’mba: ‘Nangwa kya kuba kyo kimye kitanshi kupwila nenu, mwantambwijile bingi bulongo kyajingatu nobe twiyukile kala!’ ”

Madison waambile’mba: ‘Bimye bimo nalangulukanga’mba inge bapwishetu kupwila nsakulupukamo.’ Kimye kya kupwila byo kyafikile, nalekele kulanguluka bino. Inge kupwila kwapwatu, nesambanga na bantu kabiji kechi mbena kuvulukapo ene mambo o nalangulukilanga byobya kimye kitanshi ne. Inge nalekele kupwila, inge kechi njipo na balunda bawama bo nji nabo luno ne.”

a Pa kuba’mba mutaane mpunzha ko bapwijila, yai po banemba’mba “Kupwila kwa Bakamonyi ba kwa Yehoba” chintai po banemba’mba “Kebai Mpunzha Iji Kwipi na ko Mwikala.”